પાવર / હવે ચીન આંખ ઉઠાવીને પણ નહી જોઈ શકે, અમેરિકાના એક ફેસલા ઉપર ભારતની તાકાત વધશે

• ભારતને CAATSA માંથી મુક્તિ આપવા US મદદ કરે 
• બન્ને ગૃહોમાંથી બીલ પસાર થયું જેમાં બહુમતી મળી 
• ચીનના વધતા આક્રમક પગલામાં અમેરિકાએ ભારતની મદદ કરવી જોઈએ 

અમેરિકાની પ્રતિનિધિ સભામાં ભારતને રશિયા પાસેથી એસ-400 મિસાઇલ ડિફેન્સ સિસ્ટમ ખરીદવા માટે CAATSA પ્રતિબંધમાંથી વિશેષ છૂટ આપવા માટે સંશોધિત બિલ ગુરુવારે પસાર કર્યું છે. ભારતીય-અમેરિકન સાંસદ રો ખન્ના દ્વારા રજૂ કરવામાં આવેલા આ સંશોધિત બિલમાં અમેરિકી રાષ્ટ્રપતિ જો બાઈડેનના પ્રશાસનને અનુરોધ કરવામાં આવ્યો છે કે તે ભારતને ચીન જેવા આક્રમક દેશ પર અંકુશ લગાવવામાં મદદ કરવા માટે કાઉન્ટરિંગ અમેરિકાઝ એડવર્સરીઝ થ્રૂ સેંકશન એક્ટથી ભારતને છૂટ આપવાની પોતાની સત્તાનો ઉપયોગ કરે.

સાંસદે શું કહ્યું?
નેશનલ ડિફેન્સ ઓથોરાઇઝેશન એક્ટ પર ગૃહમાં ચર્ચા દરમિયાન સુધારેલા બિલને ધ્વનિમતથી પસાર કરવામાં આવ્યું હતું. ખન્નાએ કહ્યું, "અમેરિકાએ ચીનના વધતા આક્રમક વલણને પગલે ભારતની સાથે ઉભા રહેવું જોઈએ. ઇન્ડિયા કોકસના વાઇસ પ્રેસિડેન્ટ તરીકે હું આપણા દેશો વચ્ચેની ભાગીદારીને મજબૂત કરવા અને એ સુનિશ્ચિત કરવા પર કામ કરી રહ્યો છું કે ભારત-ચીન સરહદ પર ભારત પોતાનું રક્ષણ કરી શકે."

વધુમાં જણાવ્યું 
ખન્નાએ ગૃહમાં પોતાની ટિપ્પણીમાં કહ્યું કે, "આ સુધારો ખૂબ જ મહત્વપૂર્ણ છે અને મને એ જોઈને ગર્વ થયો કે તે બંને પક્ષોના સમર્થનથી પસાર કરવામાં આવ્યો છે." ખન્નાએ કહ્યું કે, અમેરિકા-ભારતની ભાગીદારીથી વધુ વ્યૂહાત્મક હિતમાં બીજું કશું જ મહત્વનું નથી. વિધેયકમાં જણાવાયું છે કે 'યુનાઇટેડ સ્ટેટ્સ-ઇન્ડિયા ઇનિશિયેટિવ ઓન ક્રિટિકલ એન્ડ ઇમર્જિંગ ટેકનોલોજીસ' એ આર્ટિફિશિયલ ઇન્ટેલિજન્સ, ક્વોન્ટમ કમ્પ્યુટિંગ, બાયોટેકનોલોજી, એરોસ્પેસ અને સેમિકન્ડક્ટર મેન્યુફેક્ચરિંગમાં નવીનતમ પ્રગતિને અપનાવવા માટે બંને દેશોની સરકારો, શિક્ષણવિદો અને ઉદ્યોગો વચ્ચે ગાઢ ભાગીદારી વિકસાવવા માટેનું એક આવકારદાયક અને આવશ્યક પગલું છે. તેમાં કહેવામાં આવ્યું છે કે ઇજનેરો અને કમ્પ્યુટર વૈજ્ઞાનિકો વચ્ચેની આ પ્રકારની ભાગીદારી એ સુનિશ્ચિત કરવા માટે મહત્વપૂર્ણ છે કે અમેરિકા અને ભારત તેમજ વિશ્વભરના અન્ય લોકશાહીઓ નવીનતા અને તકનીકી પ્રગતિને પ્રોત્સાહન આપી શકે છે જેથી તેઓ રશિયા અને ચીનની તકનીકીને પાછળ છોડી શકે.વર્ષ 2017માં રજૂ કરવામાં આવેલા CAATSA માં રશિયા સાથે રક્ષા અને ગુપ્ત માહિતી માટે જે પણ દેશ વ્યવહાર કરે છે તેની સામે શિક્ષાત્મક કાર્યવાહી કરવાની જોગવાઈ છે. તે 2014માં ક્રિમિયા પર રશિયાના કબજા અને 2016 ની યુ.એસ. રાષ્ટ્રપતિની ચૂંટણીમાં મોસ્કોની કથિત દખલના જવાબમાં લાવવામાં આવ્યું હતું.