ગાંધીનગર / બાપ રે! PM આવાસમાં રહેતા આ ભાઈને UGVCLએ ફટકાર્યું રૂ. 4.97 લાખનું વીજ બિલ

ગાંધીનગર જિલ્લાના ન્યૂ વાવોલ વિસ્તારમાં આવેલી PM આવાસ યોજનામાં રહેતા એક લાભાર્થીને UGVCL તરફથી રૂ. 4,97,420.38નું વીજ બિલ મળતાં ભારે ચકચાર મચી છે. સામાન્ય આવક ધરાવતા પરિવારને અચાનક લાખો રૂપિયાનું બિલ મળતાં તેઓ આર્થિક તેમજ માનસિક મુશ્કેલીમાં મુકાયા હોવાનું સામે આવ્યું છે.

માહિતી મુજબ, ન્યૂ વાવોલ સ્થિત PM આવાસ યોજનામાં રહેતા રણજીત ઠાકોરને UGVCL દ્વારા રૂ. 4.97 લાખનું વીજ બિલ ફટકારવામાં આવ્યું છે. આટલી મોટી રકમનું બિલ મળતાં પરિવાર ચિંતામાં મુકાયો છે અને બિલમાં કોઈ તકનિકી ખામી અથવા મીટર રીડિંગમાં ભૂલ થઈ હોવાની શંકા વ્યક્ત કરવામાં આવી રહી છે.

આ સમગ્ર મામલે અસરગ્રસ્ત લાભાર્થીએ UGVCL સમક્ષ રજૂઆત કરી તાત્કાલિક બિલની તપાસ કરવાની તેમજ યોગ્ય કાર્યવાહી કરવાની માંગ કરી છે. સ્થાનિકોમાં પણ આ ઘટનાને લઈને ભારે અસંતોષ જોવા મળી રહ્યો છે અને વીજ કંપનીની કામગીરી સામે સવાલો ઉઠી રહ્યા છે.

હાલ UGVCL દ્વારા આ મામલે કોઈ સત્તાવાર સ્પષ્ટતા કરવામાં આવી નથી. જો બિલમાં ખરેખર ટેકનિકલ ખામી કે મીટર રીડિંગમાં ગેરરીતિ હોવાનું સામે આવશે તો તેને સુધારવાની કાર્યવાહી હાથ ધરાશે તેવી અપેક્ષા વ્યક્ત કરવામાં આવી રહી છે. ત્યાં સુધી અસરગ્રસ્ત પરિવાર માટે લાખો રૂપિયાનું બિલ ચિંતાનો વિષય બન્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ