નિર્ણય / ગુજરાતમાં મહેસૂલી નિયમોમાં સરકારે કર્યા નીતિવિષયક સુધારા,આ કેસમાં સ્ટેમ્પ ડ્યૂટીમાંથી મળશે રાહત

• રાજ્ય સરકારે મહેસૂલી નિયમોમાં કર્યા ફેરફાર
• સખાવતી હેતુસર તબદીલીમાં સ્ટેમ્પ ડ્યુટીમાં મળશે રાહત
• વારસાઇ વખતે દિકરીના સંતાનોને સ્ટેમ્પ ડ્યુટીમાંથી રાહત 
   

રાજ્ય સરકારે મહેસૂલી નિયમોમાં નીતિવિષયક સુધારા કર્યા છે.  સખાવતી હેતુસર તબદિલીમાં સ્ટેમ્પ ડ્યુટીમાં રાહત મળશે. ખેડૂત ખાતેદારના મૃત્યુ બાદ વારસાઈ વખતે દીકરીના સંતાનોને પણ સ્ટેમ્પ ડ્યુટીમાં રાહત અપાશે.  રિવાઈઝ્ડ એન.એ. સમયે પુનઃઅભિપ્રાયમાંથી મુક્તિ આપવામાં આવી છે.. જ્યારે ટ્રસ્ટને ફાળવેલી સરકારી જમીનના કિસ્સામાં નમૂના નં.7માં સ્પષ્ટતા કરવાનો નિર્ણય કરવામાં આવ્યો છે.  સ્ટે-ઓર્ડર ન હોય તેવા પડતર દાવાની નોંધ નમૂના-7માં ન કરવાનો નિર્ણય કરવામાં આવ્યો છે આ ઉપરાંત  લીસ પેન્ડેન્સીનું રજિસ્ટ્રેશન ન કરવાનો નિર્ણય લેવાયો છે. સિટી સર્વે રેકર્ડ-હક્કચોકસી-પ્રમોલગેશનમાં ક્ષતિ કે ભૂલસૂધારણાની સમયમર્યાદામાં વઘારો કરીને 31 ડિસેમ્બર 2023 સુધી કરવામાં આવી છે. 

સ્ટેમ્પ ડ્યુટી શું હોય છે ?

ભારતમાં ટેક્સ સ્ટ્રક્ચર મુજબ અલગ અલગ ઉત્પાદનની લે-વેચ કે રજિસ્ટ્રેશન વખતે કર ભરવો પડે છે. આ કર મકાનની ખરીદી વખતે પણ ભરવો પડે છે. જેને સ્ટેમ્પ ડ્યુટી કહેવામાં આવે છે. આ ચાર્જ મકાનના રજિસ્ટ્રેશમન માટે લેવામાં આવે છે. જે અલગ અલગ રાજ્યોમાં 5થી 7 ટકા હોય છે. મહત્વનું છે કે મિલકતની ખરીદી-નોંધણી કરતી વખતે સ્ટેમ્પ ડ્યુટી, નોંધણી ચાર્જ, સેસ અને સરચાર્જ લેવામાં આવે છે જે તમામનો ચાર્જ પ્રોપર્ટીના બજાર મૂલ્યના 7થી 10 ટકા કે તેનાથી વધુ હોઇ શકે છે. 

સ્ટેમ્પ ડ્યુટી બાદ જ દસ્તાવેજો માન્ય

મિલકતનું માલિકીનું ટાઇટલ અન્ય વ્યક્તિને ટ્રાન્સફર કરતી વખતે તમારી પાસેથી પ્રોપર્ટી સ્ટેમ્પ ડ્યુટી લેવામાં આવે છે. આ એક પ્રકારની ફી છે. જે રાજ્ય સરકાર દ્વારા તમારી સંપત્તિની નોંધણી કરવા માટે જરૂરી દસ્તાવેજો પર વસૂલવામાં આવે છે. ભારતીય સ્ટેમ્પ એક્ટ, 1899ની કલમ 3 હેઠળ આ ફી ફરજિયાત છે. આ ફી ચૂકવ્યા પછી મિલકતના દસ્તાવેજો માન્ય બની જાય છે.

સ્ટેમ્પ ડ્યુટીની ગણતરી કયા આધારે થાય છે ?

સ્ટેમ્પ ડ્યુટીની કિંમત મિલકત કેટલી જૂની છે, મિલકતની બજાર કિંમત, માલિકની ઉંમર, માલિક મહિલા છે કે પુરુષ, મિલકતનો હેતુ, મિલકત જે શહેરમાં હોય તે સ્થાન તથા મિલકત સાથે મળતી અન્ય સુવિધાઓને આધારે સ્ટેમ્પ ડ્યુટી નક્કી કરવામાં આવે છે. મહત્વનું છે કે  સ્ટેમ્પ ડ્યુટી એ એક દસ્તાવેજ છે જેને કોર્ટમાં પુરાવા તરીકે રજૂ શકો છો. સ્ટેમ્પ ડ્યુટી હંમેશા મિલકત ખરીદનાર ચૂકવે છે. મિલકતની અદલા બદલી મામલે ખરીદનાર-વેચનાર બંનેએ સ્ટેમ્પ ડ્યુટી ચૂકવવી પડે છે.