મુશ્કેલી / ભાવનગરમાં કપાસના ખેડૂતોની હાલત અત્યંત દયનીય! એક તરફ ઉત્પાદનમાં ઘટાડો, બીજી બાજુ ભાવ તળિયે બેસી જતા કહ્યું 'આવું ને આવું રહેશે તો...'

• ભાવનગરના ખેડૂતોની હાલત કફોડી 
• કપાસના ભાવ ગગડ્યા
• ગત વર્ષની સરખામણીમાં નીચા ભાવ
• ગત વર્ષે 2000-2200 ભાવ હતો
• ચાલુ વર્ષે 1400 ભાવ બોલાયો

ભાવનગર જિલ્લમાં ચોમાસાની અનિયમિતતા અને વાતાવરણમાં થતા ફેરફારો તેમજ રોગચાળાના કારણે આ વર્ષે સ્થાનીકે કક્ષાએ કપાસનું ઉત્પાદન ઓછું થયું છે. જેને લઈને ખેડૂતો મુંજાયા છે. ભાવ પણ ગત વર્ષની સરખામણીમાં 1 મણએ 700 જેટલો ઘટાડો થવાથી  ખેડૂતો પારાવાર મુશ્કેલીનો સામનો કરી રહ્યાં છે. બીજીબાજુ બ્રાઝીલ જેવા દેશમાં કપાસના મબલખ ઉત્પાદનને કારણે ત્યાંનો માલ ચીનમાં સસ્તામાં વહેંચાતો હોઈ ભારતના માલની માંગ ઓછી રહેવાથી ખેડૂતોને નુકસાની થવા પામી છે. ત્યારે હવે આગામી દિવસોમાં ખેડૂતો કપાસ ના પાક ના બદલે અન્ય પાકો તરફ દોટ  મુકશે તેમ મનાઈ રહ્યું છે.

મજૂરીના પૈસા પણ ન નીકળે તેવી સ્થતિ

ભાવનગર જિલ્લામાં રવિ પાકની સીઝન પુરબહારમાં ખીલી ઉઠી હતી..જેમાં કપાસ સહિતની જણસો તૈયાર થઈ ગઈ હોવાથી હવે માર્કેટિંગ યાર્ડમાં મગફળી અને કપાસની આવક ધીમે ધીમે સારું થવા લાગી છે. ભાવનગર અને  તળાજા યાર્ડમાં અત્યાર સુધીની સીઝનમાં સૌથી ઊંચા ભાવે કપાસનું વેચાણ થતું હતું. ગત  વર્ષે કપાસના ભાવ 2000 થી 2200 સુધી પહોંચ્યા હતા. પરંતુ હાલ યાર્ડમાં માલ આવતાની સાથે જ કપાસના ભાવ 1400 થઇ જતા ખેડૂતોને મજૂરીના પૈસા પણ ન નીકળે તેવી સ્થતિ ઉભી થવા પામી છે.

કપાસના ભાવ 1400 ભાવ થયા છે
ભાવનગર અને તળાજાના યાર્ડમાં ખેડૂતોને પૂરતા ભાવ મળતા નથી. આજે કપાસના ભાવ 1400 ભાવ થયા છે. આમ તો ગત વર્ષમાં  વાવાઝોડું અને પાછોતરા વરસાદના કારણે કપાસને ભારે નુકસાન થતા ઉત્પાદન ઓછું થયું એક તરફ ઉત્પન્નમાં ઘટાડો અને બીજીબાજુ ભાવ પણ નીચા બેસી જતા ખેડૂતો પાયમાલ થઇ રહ્યાં છે. ભાવનગર જિલ્લામાં ચાલુ સીઝનમાં કપાસનું વાવેતર  2.50 લાખ હેકટરમાં થવા પામ્યુ હતું. આ વર્ષે ઉત્પાદનમાં ભારે ઘટાડા વચ્ચે ખેડૂતોને પોષણક્ષમ ભાવ નહીં મળતા ખેડૂતો નારાજ છે.

ઉત્પાદનમાં થતા ખર્ચની  વિગત 

• કપાસ માં 1 વીઘે ઉતારો આવે છે 20 મણ 
• 1 થેલી ડીએપી ખાતર 1300 રૂપિયા 
• દવા બિયારણ  1 વીઘે 300 રૂપિયા 
• વિણાટ નું કામ 1 વ્યક્તિ નું 1 મણે  ખર્ચ 200
• વાડી  થી યાર્ડ નું ભાડું 225 રૂપિયા 
• યુરિયા ખાતર 1 થેલી  600 રૂપિયા ( 3 વખત નાખવી પડે સીઝન માં )
• 4 માણસ ની મજૂરી રોજના 2000 રૂપિયા 
• (4 મહિના કામ ચાલે )