લોહીના સંબંધોની હત્યા / અમદાવાદમાં ઘરમાં ઝઘડા બાદ ભાઈએ જ જાહેરમાં ભાઈને મારી નાંખ્યો, પથ્થરો-પાઈપથી કર્યો હતો હુમલો

• અમદાવાદના બાપુનગરમાં હત્યા મામલે ધરપકડ
• બાપુનગર પોલીસે આરોપીની કરી ધરપકડ
• ભાઈએ જ ભાઈની કરી હતી હત્યા 
• પારિવારિક ઝઘડામાં જાહેરમાં કર્યો હતો હુમલો

 અમદાવાદમાં ધોળે દહાડે ખૂન ખરાબા વધી રહ્યા છે. લોકોને પોલીસનો કોઈ જ ખોફ ના હોય તેમ જાહેરમાં ખૂની હુમલા થઈ રહ્યા છે.  ત્યારે ગઈકાલે બાપુનગર અજીત મિલ વિસ્તારમાં સગા ભાઈ ઉપર ભાઈએ હુમલો કરતાં મૃત્યુ થયું છે. ભાઈએ જ ધોળા દહાડે ખુલ્લેઆમ જાહેરમાં ભાઈની હત્યા કરતાં ચકચાર મચી ગઈ છે. સામાન્ય બોલાચાલીમાં બે ભાઈઓ વચ્ચે મોટી બબાલ થઈ જતાં જીવલેણ હુમલો કરી દીધો. ઈજાગ્રસ્ત ભાઈને હોસ્પિટલમાં દાખલ કરાયો જ્યાં તેનું મોત થયું છે. રોડ ઉપર ખુલ્લેઆમ હુમલાની આ ઘટનાથી આજુબાજુના રહીશો પણ ગભરાઈ ગયા છે. 

સોસાયટીના ગેટ ઉપર જાહેરમાં જ મારામારી થઈ હતી
અમદાવાદ બાપુનગરમાં અનિલ સ્ટાર્ચની બાજુમાં રાધારમણ ફ્લેટમાં રહેતા કનુભાઈ ચંદુભાઈ પટણી  બપોરના એક વાગ્યા આસપાસ સોસાયટીના ગેટ પાસે હતા. તે દરમિયાન તેમના ભાઈએ આવીને ગાળાગાળી કરી હતી. પરેશભાઈ ચંદુભાઈ પટણી તથા તેમનો દીકરો મેહુલ ગેટ પાસે ગઈકાલે 4 વાગ્યાની આસપાસ ઊભા હતા તે દરમિયાન તેના ભાઈ અને સાળા લોકો આવ્યા હતા. અને બંને પક્ષે બોલાચાલી અને ગાળા ગાળી થઈ હતી. સોસાયટીના ગેટ ઉપર જાહેરમાં જ મારામારી થઈ હતી.

પહેલા ગડદાપાટુનો માર માર્યો પછી લોખંડની પાઈપથી હુમલો કર્યો
આ ઘટનાથી આજુબાજુના લોકો પણ હતપ્રભ બની ગયા હતા. ઘટના વધુ વકરતા દિનેશ ચંદુભાઈ પટણી, સુરેશ ચમનભાઈ પટણી, સુરેશ તેમજ જયેશ પટણી સહિતના લોકોએ કનુભાઈ તથા તેમના ભાઈ સાથે ગડદાપાટુનો માર મારવા લાગ્યા હતા. એ પછીથી લોખંડનો પાઈપ વડે હુમલો કર્યો હતો. આ હુમલામાં કનુભાઈ પટણી, પરેશભાઈ પટણી તથા મેહુલભાઈ ઈજાગ્રસ્ત થયા હતા. આ ઘટનામાં પરેશભાઈને વધુ ઈજા થતાં ખાનગી હોસ્પિટલમાં દાખલ કરવામાં આવ્યા બાદ ત્યાં તેઓનું મોત થયું હતું. પોલીસ આ બાબતે વધુ તપાસ હાથ ધરી રહી છે.

પોલીસે 5 આરોપીની ધરપકડ પણ કરી
આ ઘટનામાં બાપુનગર પોલીસે 5 આરોપીની ધરપકડ પણ કરી છે. જેમાં મૃતક વ્યક્તિના મોટાભાઈ અને સાથે તેમનો દીકરો અને તેમના સાળાએ સાથે મળીને હત્યાને અંજામ આપ્યો હતો. સામાન્ય બોલાચાલી બાદ લાકડી અને પાઇપની મારામારીમાં મૃતકને માથાના ભાગે ઇજા થતા તેમને હોસ્પિટલમાં દાખલ કરવામાં આવ્યા હતા. જ્યાં તેમનું સારવાર દરમિયાન મોટ થયું હતું. હાલમાં બાપુનગર પોલીસે આરોપીની ધરપકડ કરીને આગળની કાર્યવાહી હાથ ધરી છે.