- ટ્વિટર ખરીદ્યા બાદ એલન મસ્કને TESLAમાં મોટું નુકસાન
- મંગળવારે ટેસ્લાને 126 બિલિયન ડૉલરનું નુકસાન થયું
- ટેસ્લા ટ્વિટર ડીલમાં સામેલ નથી, છતાં તેના શેર અંગે લોકોમાં મૂંઝવણ
એલન મસ્ક અને ટ્વિટર વચ્ચેની ડીલ (કરાર) બાદ રોકાણકારોની ચિંતા વચ્ચે ટેસ્લા ઇન્કને મંગળવારે 126 બિલિયન ડૉલરનું નુકસાન થયું હતું. રોકાણકારો ચિંતિત હતા કે ચીફ એક્ઝિક્યુટિવ એલન મસ્કને ટ્વિટર ઇન્કના 44 બિલિયન ડૉલરની ખરીદી માટે ટેસ્લાના શેર વેચવા પડશે. જો કે ટેસ્લા ટ્વિટર ડીલમાં સામેલ નથી, તેમ છતાં તેના શેર અંગે લોકોમાં મૂંઝવણ છે. કારણ કે મસ્કે સાર્વજનિક રીતે આ ખુલાસો કરવાથી ઇનકાર કરી દીધો હતો કે સંપાદન માટે તેઓની પાસે ભંડોળ ક્યાંથી આવશે.
મંગળવારે ટેસ્લાને 126 બિલિયન ડૉલરનું નુકસાન થયું હતું
જ્યાર બાદ મંગળવારે ટેસ્લાના શેર 12.2% તૂટ્યા હતા અને ટેસ્લાને 126 બિલિયન ડૉલરનું નુકસાન થયું હતું. મંગળવારે ટ્વિટરના શેરમાં પણ 3.9 ટકાનો ઘટાડો થયો હતો. જો કે, સોમવારે એલન મસ્કે તેને 54.20 ડૉલર પ્રતિ શેર રોકડમાં ખરીદવા માટે સહમતિ વ્યક્ત કરી હતી. નિષ્ણાંતો કહે છે કે, ટેસ્લાના શેરમાં ઘટાડો મસ્કને ટ્વિટર માટે જરૂરી ભંડોળને પહોંચી વળવા અન્ય વિકલ્પ પર વિચાર કરવા દબાણ કરી શકે છે.
તમને જણાવી દઈએ કે, સોમવારે વિશ્વના સૌથી અમીર વ્યક્તિ એલન મસ્ક અને ટ્વિટર વચ્ચેની ડીલ ફાઈનલ થઈ ગઈ હતી. ડીલ ફાઇનલ થઇ ગયા બાદ મસ્કે ટ્વિટ કર્યું હતું કે, "હું આશા રાખું છું કે મારા સૌથી ખરાબ આલોચકો પણ ટ્વિટર પર યથાવત રહેશે, કારણ કે સ્વતંત્ર ભાષણનો અર્થ જ આ છે."
તેઓ ટ્વિટરને વધારે નવા ફીચર્સ સાથે બનાવવા ઇચ્છે છે : એલન મસ્ક
અમેરિકન અબજોપતિ અને ટેસ્લા કંપનીના માલિક એલન મસ્ક (Elon Musk) એ Twitter ને 44 બિલિયન ડોલરમાં ખરીદી લીધા બાદ તેઓ ટ્વિટ કરીને જણાવ્યું કે, 'તેઓ ટ્વિટરને વધારે નવા ફીચર્સ સાથે બનાવવા ઇચ્છે છે.'
તેઓએ ટ્વિટ કરીને જણાવ્યું કે, 'કોઈ પણ લોકશાહીને કામ કરવા માટે ભાષણની સ્વતંત્રતા ખૂબ જ મહત્વપૂર્ણ છે. Twitter એક ડિજિટલ ટાઉન સ્ક્વેર છે કે જ્યાં માનવતાના ભવિષ્ય પર ચર્ચા થાય છે. ટ્વિટરને તેઓ નવા ફીચર્સ સાથે વધારે સારું બનાવવા ઇચ્છે છે. તેઓ તેના અલ્ગોરિધમને ઓપન સોર્સ રાખીને વિશ્વાસને વધારવા ઇચ્છે છે. તેઓ સ્પૈમ બોટ્સને દૂર કરી તમામ અધિકૃત માનવને આ પ્લેટફોર્મ પર રાખવા માંગે છે.'
યુઝર્સ 280થી વધુ અક્ષરો પોસ્ટ કરી શકશે તેવાં ફીચર્સ પર વિચારણા
આ સિવાય ટ્વિટર પોતાના ડાયરેક્ટ મેસેજને પાવરફુલ બનાવવા પર પણ કામ કરી શકે છે. તેને શોધી શકાય તેવી અને એન્ક્રિપ્ટેડ મેસેજિંગ સિસ્ટમ તરીકે ડિઝાઇન કરી શકાય. કંપની પોતાના સૌથી વધુ ડિમાન્ડવાળા લાંબા ટ્વિટના ફીચરને પણ બહાર પાડી શકે છે. આ સાથે, યુઝર્સ 280થી વધુ અક્ષરો પોસ્ટ કરી શકશે. ઘણાં લોકો એવું માને છે કે, ટ્વિટરે Communities ફીચર પર પણ કામ કરવાની જરૂર છે. આ સાથે, તેઓ ટાઈમલાઈન પર પોતાની મનપસંદ વસ્તુઓ જ જોઈ શકશે. તેમાં, અન્ય લોકો સાથે વાતચીત કરવાની વધુ રીતો આપી શકાય છે.
CEO અગ્રવાલે કર્મચારીઓને કહ્યું, 'કંપનીનું ભવિષ્ય અંધારામાં'
એલન મસ્ક ટ્વિટરના નવા માલિક બનતા જ CEO પરાગ અગ્રવાલે કહ્યું હતું કે, 'એલન મસ્કની ખરીદી બાદ કંપનીનું ભવિષ્ય અંધકારમાં આવી જશે.' કંપની દ્વારા કર્મચારીઓને આપવામાં આવેલી માહિતીમાં એમ કહેવામાં આવ્યું કે, મસ્ક ટૂંક સમયમાં જ સવાલ-જવાબ સેશન માટે ટ્વિટર સ્ટાફને મળશે. જો કે તેની તારીખ હજુ સુધી જાણી શકાઈ નથી. રિપોર્ટ અનુસાર, પરાગ અગ્રવાલ આ મીટિંગમાં મસ્કની કંપનીની યોજનાઓ વિશે વાત કરી રહ્યા હતા. આ દરમિયાન તેઓએ કર્મચારીઓને કાઢી મૂકવા જેવા સવાલોના જવાબ આપ્યા છે. જો કે, મસ્કે એ સ્પષ્ટ કરી દીધું છે કે કંપનીમાંથી કોઇને પણ બહાર નીકાળવાની યોજના તેઓએ નથી બનાવી.
