આંદોલન / આરોગ્યકર્મીઓ બાદ શિક્ષકોએ રાજ્ય સરકાર સામે બાંયો ચઢાવી, પડતર માંગોને લઈને આજે કલેક્ટર કચેરીએ કરશે રજૂઆત

• રાજ્ય સરકાર સામે શિક્ષકોનું આંદોલન
• આજે કલેક્ટર કચેરીએ ખાતે કરશે રજૂઆત
• 17 સપ્ટેમ્બરે તમામ શિક્ષકો માસ CL પર ઉતરશે 

ગુજરાતમાં જેમ જેમ ચૂંટણી નજીક આવી રહી છે તેમ તેમ રાજ્ય સરકારે એક બાદ એક આંદોલન અને હડતાળનો સામનો કરવો પડી રહ્યો છે. છેલ્લા થોડા દિવસમાં પોલીસ ગ્રેડ પે જેવા મોટા મુદ્દા પર સમાધાન લાવવા પ્રયાસ કરાયો ત્યાં આરોગ્ય કર્મીઓ પણ માંગ લઈને હડતાળ પર હતા, તલાટીઓમાં પણ નારાજગી હતી. એવામાં શિક્ષકોએ આંદોલનનું શસ્ત્ર ઉગામ્યું છે અને આગામી સમયે વિવિધ માંગ સાથે આંદોલન ઉગ્ર બનાવવાની ચીમકી આપી છે.

7 ઝોન કક્ષાએ રેલીનું પણ આયોજન

આજે શિક્ષકો પોતાની માંગ સાથે કલેક્ટર કચેરી ખાતે રજૂઆત કરશે. આ સાથે 7 ઝોન કક્ષાએ રેલીનું પણ આયોજન કરવામાં આવ્યું છે. જે બાદ 17 સપ્ટેમ્બરે તમામ શિક્ષકો એક સાથે રજા પર ઉતરશે. જે બાદ પણ સમાધાન ન આવે તો 22 સપ્ટેમ્બરે કાળી પટ્ટી ધારણ કરીને પેનડાઉન કાર્યક્રમ અને છેલ્લે 30 સપ્ટેમ્બરથી અચોક્કસ મુદ્દતની હડતાળ પર ઉતરશે. વિવિધ માગોને લઈને શિક્ષકો હવે લડી લેવાના મૂડમાં છે. રાષ્ટ્રીય સંયુક્ત મોરચાના બેનર હેઠળ શિક્ષકો વિરોધ કરી રહ્યા છે. આ સાથે જ શિક્ષકોએ ચીમકી ઉચ્ચારી છે કે સરકાર તેમની માગ નહીં સ્વીકારે ત્યાં સુધી તેઓ આંદોલન શરૂ રાખશે.

શું છે શિક્ષકોની મુખ્ય માંગણી 

આમ તો શિક્ષકોની 15 જેટલી માંગો છે જેના માટે આંદોલન થઈ રહ્યું છે પરંતુ સૌથી મુખ્ય જૂની પેન્શન યોજના ફરીથી લાગુ કરવાને લઈને છે. નોંધનીય છે કે જૂની અને નવી પેન્શન યોજનાને લઈને દેશના અનેક જિલ્લાઓમાં સરકારી કર્મચારીઓએ આંદોલન કર્યા છે અને બિનભાજપ શાસિત રાજ્યોમાં જૂની પેન્શન યોજના ફરીથી લાગુ પણ કરી દેવામાં આવી છે. નવી પેન્શન યોજનામાં ખૂબ ઓછું પેન્શન મળતું હોવાથી સરકારી કર્મીઓમાં રોષ છે.