ખળભળાટ / શરમજનક: શિક્ષિકાને વિશ્વાસમાં લઈ બાઇક પર બેસાડી અવાવરું જગ્યાએ શિક્ષકે આચર્યું મરજી વિરૂદ્ધ દુષ્કર્મ, આરોપી જેલહવાલે

• ભિલોડા તાલુકામાં શિક્ષિકા સાથે દુષ્કર્મ મામલો 
• એકલવ્ય મોડેલ રેસિડેન્શિયલ શાળાની શિક્ષિકા સાથે દુષ્કર્મ 
• આરોપી શિક્ષક અર્જનસિંહ સિસોદિયાને કરાયો સસ્પેન્ડ 
• શાળાની જ શિક્ષિકા સાથે આરોપીએ આચર્યુ હતું દુષ્કર્મ 

અરવલ્લી જિલ્લાના ભિલોડા તાલુકામાં આવેલી એકલવ્ય મોડેલ રેસિડેન્શિયલ શાળાના એક શિક્ષકે શાળાની જ શિક્ષિકા પર દુષ્કર્મ આચર્યું હોવાની શિક્ષણ જગતને લાંછન લગાડતી ઘટના સામે આવતા શિક્ષણ જગતમાં ચકચાર મચી ગઈ છે. હાલ લંપટ શિક્ષકને સ્કૂલમાંથી સસ્પેન્ડ કરીને જેલના સળિયાની પાછળ ધકેલી દેવામાં આવ્યો છે. 

શિક્ષિકા પર આચર્યું હતું દુષ્કર્મ
પ્રાપ્ત વિગતો અનુસાર, શામળાજી-ભિલોડા રોડ ઉપર શામલપુર ગામની સીમમાં આવેલી એકલવ્ય મોડેલ રેસિડેન્શિયલ સરકારી શાળામાં ફરજ બજાવતા વિજયનગરના ડગલા ગામના શિક્ષક અર્જનસિંહ ધનજીભાઈ સિસોદિયા નામના શિક્ષકે આ જ શાળામાં ફરજ બજાવતી શિક્ષિકાને વિશ્વાસમાં લઈને બે દિવસ અગાઉ સાંજે પોતાની બાઇક પર બેસાડી ખોડંબાથી કુસકી તરફના રોડ ઉપર લઈ જઈ તેમની મરજી વિરુદ્ધ દુષ્કર્મ આચર્યું હતું. ત્યારબાદ શિક્ષિકાને જાનથી મારી નાખવાની ધમકી આપી હતી

ટીંટોઈ પોલીસ મથકમાં નોંધાવી હતી ફરિયાદ 
જે બાદ શિક્ષિકાએ શિક્ષક અર્જનસિંહ ધનજીભાઈ સિસોદિયા વિરુદ્ધ મોડાસાના ટીંટોઈ પોલીસ મથકમાં ફરિયાદ નોંધાવી હતી. જેના આધારે પોલીસે વિજયનગરના ડગલા ગામના લંપટ શિક્ષક શિક્ષક અર્જનસિંહ ધનજીભાઈ સિસોદિયા વિરુદ્ધ દુષ્કર્મનો ગુનો નોંધ્યો હતો.

લંપટ શિક્ષકને કરાયો સસ્પેન્ડ
શિક્ષિકાની ફરિયાદ બાદ ઇન્ચાર્જ પોલીસ ઇન્સ્પેક્ટર કે.કે રાઠોડ દ્વારા આ મામલે તપાસ હાથ ધરવામાં આવી હતી. આ સમગ્ર મામલે શાળાના આચાર્ય દ્વારા લંપટ શિક્ષકને સસ્પેન્ડ કરવામાં આવ્યો છે અને તેને ટીંટોઈ પોલીસની ટીમે ઝડપી સબજેલના હવાલે કર્યો છે. શિક્ષણ જગતને કલંક લગાડતી આ ઘટના બાદ શિક્ષણ વિભાગ શું પગલાં ભરે છે તે જોવું રહ્યું.