કાર્યવાહી / સુરત: જુગાર રમી રહેલા શખ્સો પાસેથી 9300નો તોડ કરવો બે હોમગાર્ડને પડ્યો ભારે, ગુનો દાખલ

• સુરતનાં કડોદરા તોડકાંડમાં બંને હોમગાર્ડ વિરૂદ્ધ નોંધાઈ ફરિયાદ
• ખોટા કેસમાં ફસાવી દેવાની ધમકી આપી કર્યો હતો તોડ
• પોલીસે બંને હોમગાર્ડ વિરૂદ્ધ ખંડણીની ધારા હેઠળ નોંધ્યો ગુનો

 સુરતનાં કડોદરામાં રહેતા અને પલસાણા પોલીસ મથકમાં ફરજ બજાવતા બે હોમગાર્ડ નારાયણ પ્રકાશ કલાલ રહે. મહાલક્ષ્મી સોસાયટી તેમજ શનિ નામનાં વ્યક્તિ દ્વારા જુગારીયાઓને ખોટા કેસમાં ફસાવવાની ધમકી આપી તેઓની પાસેથી કુલ રૂ. 9300 નો તોડ કર્યો હતો. જે બાદ ભોગ બનનાર સોનુંસીંગે કડોદરા પોલીસ મથકમાં અરજી કરી હતી. ત્યારે કડોદરા પોલીસે અરજીનાં આધારે બંને હોમગાર્ડ વિરૂદ્ધ ખંડણી અંગે ગુનો નોંધ્યો હતો. 

ખોટા કેસમાં ફસાવી દેવાની ધમકી આપી કર્યો હતો તોડ
સુરતનાં કડોદરા ખાતે રહેતા અને પલસાણ પોલીસ મથકમાં ફરજ બજાવતા હોમગાર્ડ જવાનો દ્વારા થોડા દિવસ અગાઉ કડોદરાનાં કૃષ્ણનગરમાં મેવાડા ભવનમાં કેટલાક લોકો જુગાર રમી રહ્યા હતા. તે દરમ્યાન અચાનક ત્યાં પહોંચી જઈ બંને હોમગાર્ડ જવાન દ્વારા પોતાની પોલીસ તરીકેની ઓળખાણ આપી જુગાર રમી રહેલા લોકોનાં ફોટા પાડી તેઓ પર કેસ કરવાની ધમકી આપી તેઓનો તોડ કર્યો હતો.

બન્ને હોમગાર્ડ વિરુદ્ધ ખંડણીની ધારા હેઠળ પોલીસે નોંધ્યો ગુનો
સુરતનાં પલસાણા પોલીસ મથકનાં હોમગાર્ડ જવાનો દ્વારા કરાયેલ તોડકાંડ મામલે બંને હોમગાર્ડ જવાનો દ્વારા જુગારીયાઓ પાસે રૂપિયાની માંગણી કરી હતી. જે બાદ યુવાનોએ જણાવેલ કે તેઓની પાસે થોડાક જ પૈસા છે. જે બાદ હોમગાર્ડ જવાનો દ્વારા યુવાનોનાં મોબાઈલ ફોન ખેંચી તેઓની પાસે રાખ્યા હતા અને બીજા દિવસે પૈસા ચૂકવી લઈ જવા કહ્યું હતું. બીજા દિવસે આ યુવાનો પૈકી એક યુવાને બે હજાર ફોન પે માધ્યમથી ટ્રાન્સફર કર્યા હતા. તેમજ અન્ય યુવકો પાસેથી 7 થી 8 હજાર રોકડા આપી હોમગાર્ડ જવાનો પાસેથી મોબાઈલ પરત મેળવ્યા હતા. જે બાદ ભોગ બનનાર સોનુંસીંગે કડોદરા પોલીસ મથકમાં અરજી કરી હતી. ત્યારે કડોદરા પોલીસે અરજીનાં આધારે બંને હોમગાર્ડ વિરૂદ્ધ ખંડણી અંગે ગુનો નોંધતા પોલીસ બેડામાં ખળભળાટ મચી ગયો હતો.