ગુજરાત / મોટા પગારો છતાં સરકારી બાબુઓની કામચોરી! શામળાજી તાલુકા પંચાયત કચેરીમાં અધિકારીઓની ખુરશીઓ ખાલી

સરકારી કચેરીઓમાં જનતાના પ્રશ્નોનું નિરાકરણ લાવવાની અને સમયસર કામગીરી કરવાની જવાબદારી અધિકારીઓ તથા કર્મચારીઓની હોય છે. પરંતુ શામળાજી તાલુકા પંચાયત કચેરીમાં સામે આવેલા દૃશ્યો અનેક સવાલો ઊભા કરે છે. મોટા પગારો લેતા સરકારી બાબુઓને કામ કરવામાં રસ નથી કે શું, તેવો પ્રશ્ન હવે લોકોમાં ચર્ચાનો વિષય બન્યો છે.

અધિકારી અને કર્મચારીઓની ખુરશીઓ ખાલી જોવા મળી

શામળાજી તાલુકા પંચાયત કચેરીમાં અધિકારી અને કર્મચારીઓની ખુરશીઓ ખાલી જોવા મળી હતી. કચેરીમાં હાજર રહેવાનો સમય થઈ ગયો હોવા છતાં અનેક કર્મચારીઓ અને અધિકારીઓ પોતાની ફરજ પર હાજર ન હોવાનું સામે આવ્યું હતું. VTV NEWSના કેમેરામાં કચેરીના કર્મચારીઓ અને અધિકારીઓની કામચોરીના દૃશ્યો કેદ થયા હતા, જેના કારણે સમગ્ર મામલો ચર્ચામાં આવ્યો છે.

સવારે 10.50 વાગ્યે પણ આખી ઓફિસ ખાલી

ખાસ કરીને સવારે 10.50 વાગ્યે પણ આખી ઓફિસ ખાલી જોવા મળતાં અનેક સવાલો ઊભા થયા હતા. સામાન્ય રીતે આ સમય સુધી કચેરીની કામગીરી પૂરજોશમાં શરૂ થઈ જવી જોઈએ, પરંતુ કચેરીમાં જરૂરી સ્ટાફ અને અધિકારીઓ હાજર ન હોવાથી અરજદારોને રાહ જોવી પડી હતી. કચેરીમાં TDO સહિતના અધિકારીઓ ગેરહાજર જોવા મળ્યા હતા, જેના કારણે વિવિધ કામો અટવાઈ ગયા હતા.

દરરોજ મોટી સંખ્યામાં લોકો દાખલા

તાલુકા પંચાયત કચેરીમાં દરરોજ મોટી સંખ્યામાં લોકો દાખલા, પ્રમાણપત્રો તથા અન્ય જરૂરી કામકાજ માટે આવતા હોય છે. પરંતુ અધિકારીઓ અને કર્મચારીઓની ગેરહાજરીના કારણે લોકોને પોતાના કામ માટે કલાકો સુધી રાહ જોવી પડે છે. કેટલાક અરજદારોને વારંવાર કચેરીના ધક્કા ખાવાની ફરજ પણ પડે છે.

આ પણ વાંચો : અમદાવાદના સીજી રોડ પર નવી પેડિસ્ટ્રિયન પુશ બટન સિસ્ટમને માત્ર 9 દિવસમાં નુકસાન

સરકારી તંત્ર લોકોની સુવિધા માટે કાર્ય કરે છે, પરંતુ જ્યારે જવાબદાર અધિકારીઓ જ પોતાની ફરજ પ્રત્યે બેદરકાર રહે ત્યારે સામાન્ય નાગરિકોને મુશ્કેલીઓનો સામનો કરવો પડે છે. શામળાજી તાલુકા પંચાયત કચેરીમાં સામે આવેલા આ દૃશ્યો બાદ હવે સવાલ એ ઊભો થાય છે કે સરકારી કર્મચારીઓની સમયસર હાજરી અને જવાબદારી નક્કી કરવા માટે તંત્ર દ્વારા શું પગલાં લેવામાં આવશે. હાલ તો અધિકારીઓની આળસ અને કામચોરીના કારણે દાખલા તથા અન્ય જરૂરી કામકાજ માટે આવતા અરજદારો ભારે હાલાકી ભોગવી રહ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ