Monsoon 2026 / અલ-નીનોની ઘાતક અસર: કેરળમાં ચોમાસું નબળું પડતાં 33% ઓછો વરસાદ

ભારતમાં ચોમાસાના પ્રવેશદ્વાર ગણાતા કેરળ રાજ્યમાં આ વર્ષે ચોમાસાની રફતાર ચિંતાજનક રીતે ધીમી પડી ગઈ છે. ભારત હવામાન વિજ્ઞાન વિભાગ (IMD) ના તાજેતરના અહેવાલ મુજબ, રાજ્યમાં દક્ષિણ-પશ્ચિમ ચોમાસાના વરસાદમાં અત્યાર સુધીમાં 33% નો મોટો ઘટાડો નોંધાયો છે. હવામાન વિભાગના અધિકારીઓના જણાવ્યા અનુસાર, વરસાદની સૌથી વધુ અછત વાયનાડ જિલ્લામાં જોવા મળી છે, જ્યાં સામાન્ય કરતાં 64% ઓછો વરસાદ પડ્યો છે. વરસાદની આ ભારે ખેંચને કારણે કૃષિ ક્ષેત્ર પર સીધી અસર પડી રહી છે અને ખેડૂતો મુશ્કેલીમાં મુકાયા છે.

માત્ર 4 જિલ્લામાં જ સામાન્ય વરસાદ

હવામાન વિભાગના ડાયરેક્ટર વી. કે. મિનીએ માહિતી આપતા જણાવ્યું હતું કે, કેરળના કુલ જિલ્લાઓમાંથી માત્ર 4 જિલ્લા – તિરુવનંતપુરમ, કોલ્લમ, પથાનમથિટ્ટા અને ત્રિશૂરમાં જ અત્યાર સુધી સામાન્ય વરસાદ નોંધાયો છે. તેમણે ચેતવણી આપી છે કે જો આગામી થોડા દિવસોમાં આ વિસ્તારોમાં સારો વરસાદ નહીં થાય, તો આ 4 જિલ્લાઓ પણ ઓછી વરસાદવાળી કેટેગરીમાં આવી જશે. IMD ના નિયમો અને ધોરણો અનુસાર, જ્યારે કોઈ પણ જિલ્લામાં વરસાદની અછત 19% કરતાં વધુ થઈ જાય છે, ત્યારે તેને 'રેનફોલ ડેફિસિઅન્ટ'ની શ્રેણીમાં મૂકવામાં આવે છે. વર્તમાન પરિસ્થિતિમાં કેરળના મોટાભાગના જિલ્લાઓ આ રેડ ઝોનમાં આવી ચૂક્યા છે.

પરંપરાગત કૃષિ કેલેન્ડર 'તિરુવાથિરા નજીત્તુવેલા' ખોરવાયું

કેરળમાં 21 June થી 4-5 July સુધીનો સમયગાળો ખેતી માટે અત્યંત મહત્વપૂર્ણ માનવામાં આવે છે, જેને સ્થાનિક પરંપરાગત ભાષામાં 'તિરુવાથિરા નજીત્તુવેલા'કહેવામાં આવે છે. આ સમયગાળા દરમિયાન દક્ષિણ-પશ્ચિમ ચોમાસું સામાન્ય રીતે તેના ચરમસીમા પર હોય છે, જે ડાંગર (ખરીફ પાક) ની રોપણી અને વાવણી માટે સૌથી ઉત્તમ માનવામાં આવે છે. પરંતુ આ વર્ષે અલ-નીનોની સ્થિતિને કારણે આ આખું કૃષિ કેલેન્ડર અસ્તવ્યસ્ત થઈ ગયું છે. કૃષિ વિભાગે હવામાન વિભાગની 'બિલો નોર્મલ' વરસાદની આગાહીને ધ્યાનમાં રાખીને ખેડૂતોને ખાસ વૈકલ્પિક ઉપાયો અપનાવવાની સલાહ આપી છે. વરસાદ આધારિત કૃષિ ક્ષેત્રો (Rain-fed Areas) પર આની સૌથી વિનાશક અસર પડી રહી છે, કારણ કે જમીનમાં ભેજનું પ્રમાણ ઘટી રહ્યું છે અને ખરીફ પાકોના વાવેતરમાં મોડો વિલંબ થઈ રહ્યો છે.

હવામાન પર અલ-નીનોની નકારાત્મક અસર

સામાન્ય પરિસ્થિતિમાં જૂન મહિના દરમિયાન બંગાળની ખાડીની ઉપર 2 ડિપ્રેશન અને 5 સુધી લો-પ્રેશર સિસ્ટમ બને છે, જે ચોમાસાના પવનોને મજબૂત કરીને દેશના મોટા ભાગોમાં સારો વરસાદ લાવે છે. પરંતુ આ વર્ષે જૂન મહિનામાં વૈશ્વિક અલ-નીનો ઈફેક્ટના કારણે બંગાળની ખાડી પર એક પણ ડિપ્રેશન બન્યું નથી. સામાન્ય રીતે કેરળમાં જૂન, જુલાઈ અને ઓગસ્ટમાં બબ્બે તેમજ સપ્ટેમ્બરમાં 1 ડિપ્રેશન બનતું હોય છે, પરંતુ આ વર્ષે આ સિસ્ટમ સક્રિય ન થતાં ચોમાસું નબળું પડી ગયું છે.

આ પણ વાંચો : નવા સીમાંકન બાદ લોકસભાની બેઠકો વધીને 40, વિધાનસભાની બેઠકો 273 થઈ શકે છે, 10 મતવિસ્તારોનું વિભાજન થઈ શકે

ભૂજલ સ્તર ઘટવાની અને જળસંકટની મોટી આશંકા

હવામાન વિભાગે સ્પષ્ટ ચેતવણી આપી છે કે જો વરસાદની આ ખેંચ લાંબા સમય સુધી યથાવત રહેશે તો રાજ્યમાં ભૂગર્ભ જળ સ્તર ઝડપથી નીચે જઈ શકે છે, જેના કારણે આગામી સમયમાં પીવાના પાણીની તીવ્ર અછત સર્જાઈ શકે છે. કૃષિ નિષ્ણાતોનું માનવું છે કે જો આગામી થોડા અઠવાડિયામાં કેરળમાં સાર્વત્રિક અને સારો વરસાદ નહીં થાય, તો માત્ર ડાંગર જ નહીં પરંતુ અન્ય રોકડિયા પાકોને પણ મોટું નુકસાન વેઠવું પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ