અમદાવાદ / વર્લ્ડ ઓરલ હેલ્થ ડેની ઉજવણી પ્રસંગે ઋષિકેશ પટેલની જાહેરાત, ડેન્ટલ ડોકટરોની નવી ભરતી આવશે, પણ નવી કોલેજ નહીં ખૂલે

• આરોગ્ય મંત્રી ઋષિકેશ પટેલનું મહત્વનું નિવેદન
• હું છું ત્યાં સુધી હવે ડેન્ટલની નવી કોલેજ નહીં ખૂલે
• ડેન્ટલ વિભાગમાં નવી ભરતી કરવામાં આવશે: ઋષિકેશ પટેલ

આરોગ્ય અને પરિવાર કલ્યાણ વિભાગ દ્વારા આજે  “વર્લ્ડ ઓરલ હેલ્થ ડે” ની ઉજવણી સિવિલ કેમ્પસ અસ્મિતા ભવન અમદાવાદ ખાતે કરવામાં આવી હતી, જેમાં મુખ્ય મહેમાન તરીકે આરોગ્ય કેબિનેટ મંત્રી ઋષિકેશ પટેલ, રાજ્યમંત્રી નિમિષાબેન સુથાર તેમજ ખાસ ઉપસ્થિતિમાં આરોગ્ય ખાતાના મુખ્ય અધિક સચિવ મનોજ અગ્રવાલ પણ જોડાયા હતા. કાર્યક્રમ દરમિયાન સંબોધનમાં  ઋષિકેશ પટેલે મહત્વનું નિવેદન આપતા કહ્યું હતું કે હવે ગુજરાતમાં ડેન્ટલની વધુ કોલેજો નહી ખુલે.. 

'ડેન્ટલ વિભાગમાં નવી ભરતી આવશે'
તેમણે ઉપરોક્ત નિવેદન આપતાએ પણ ખુલાસો કર્યો હતો કે PTC જેવી હાલત ડેન્ટલની નથી કરવાની જેથી ડેન્ટલની વધુ કોલેજ ગુજરાતમાં નહી ખૂલે, મારું માનવું છે આટલા ડોકટર બહુ છે. ડેન્ટલ વિભાગમાં નવી ભરતી કરવામાં આવશે અને ઉમેદવારોને મેરીટના આધારે તક આપવામાં આવશે તેવી પણ જાહેરાત કરી હતી. 

કેમ આ નિર્ણય લેવામાં આવ્યો?
આ પ્રસંગે આરોગ્ય મંત્રી ઋષિકેશ પટેલે મીડિયા સાથે પણ વાત કરી હતી અને ડેન્ટલની નવી કોલેજ નહીં ખૂલે તેના પ્રશ્નના જવાબમાં તેમણે ઉમેર્યું હતું કે મારી દ્રષ્ટીએ ગુજરાતમાં જેટલી ડેન્ટલ કોલેજો છે અને તેમાંથી જે ડોકટરો બહાર પડતાં હોય તેમના માટેની પૂરતી વ્યવસ્થાઓ થઈ શકે તે પ્રમાણેનું હાલ વાતાવરણ છે. જેથી કરીને મારા મત મુજબ હવે વધારે ડેન્ટલ કોલેજની જરૂર નથી પંરતુ જેમ જેમ ડૉક્ટર અને પેસન્ટમાં ડિમાન્ડ અને સપ્લાયનો વિષય છે જેમ જેમ માંગ વધશે તો આ નિર્ણય પર વિચારણા કરવામાં આવશે. અત્યારને મને લાગે છે ત્યાં સુધી જે પણ ડેન્ટલ ડોકટરો ગુજરાતની ડેન્ટલ કોલેજોમાંથી નીકળી રહ્યા છે તે ગુજરાતની જનતાની સેવા કરવા હાલ પૂરતા યોગ્ય છે.