રાજનીતિ / રાજ્યસભા ચૂંટણી: ત્રીજી બેઠક જીતવા કોંગ્રેસના ધારાસભ્યો સાથે ભાજપ કરી શકે છે આવું...

• ગુજરાતમાં રાજ્યસભાની ચાર બેઠક પર 26 માર્ચે ચૂંટણી યોજાવાની છે
• ચાર પૈકી કોંગ્રેસને બે બેઠક ન મળે એ દિશામાં ભાજપે કવાયત આરંભી છે
• રાજ્યસભા ચૂંટણીમાં એક બેઠક જીતવા 37 મતો જોઈએ

ચાર પૈકી કોંગ્રેસને બે બેઠક ન મળે એ દિશામાં ભાજપે કવાયત આરંભી છે. જો કે, આ વેળા કોંગ્રેસના ધારાસભ્યો પાસે ક્રોસ વોટિંગને બદલે તેમને મતદાનમાં ગેરહાજર રાખીને અથવા વોટિંગમાં ભૂલ કરાવીને ત્રીજી બેઠક જીતવા ભાજપે રણનીતિ અપનાવ્યાનું ચર્ચાઈ રહ્યું છે.

રાજ્યસભાની ચાર બેઠકો માટે ચૂંટણી યોજાવા જઇ રહી છે ત્યારે હાલ ભાજપની ત્રણ બેઠકો હોવાથી ભાજપ હવે એક પણ બેઠક ગુમાવવા તૈયાર નથી. વર્ષ 2017 અને છેલ્લે 2019ની ચૂંટણીમાં કોંગ્રેસના ધારાસભ્યો પાસે ક્રોસ વોટિંગ કરાવ્યા બાદ આ વખતે ક્રોસ વોટિંગને બદલે કોંગ્રેસના ત્રણ-ચાર ધારાસભ્યો ગેરહાજર રાખી અથવા પ્રેફરન્સ વોટિંગ એકડો ઘૂંટવામાં ભૂલ કરાવી સેકેન્ડ પ્રેફરન્સ અર્થાત બગડાના બળે ત્રીજી બેઠક જીતવાની રણનીતિ માટે ભાજપ પ્રયત્ન કરી રહ્યુ હોવાનું ચર્ચાઈ રહ્યું છે.

26મી માર્ચના વોટિંગ પૂર્વે કોંગ્રેસ 73 ધારાસભ્યોને અકબંધ રાખવા ગુજરાત બહાર રાજસ્થાન અથવા મધ્યપ્રદેશ લઈ જશે. વિધાનસભામાં 180 પૈકી ભાજપના 103, કોંગ્રેસના 73, એક અપક્ષ, એક એનસીપી અને બે બીટીપીના ધારાસભ્યો છે. રાજ્યસભા ચૂંટણીમાં એક બેઠક જીતવા 37 મતો જોઈએ. માટે કોંગ્રેસ 73 અને એક અપક્ષ જિજ્ઞેશ મેવાણી એમ 74 સભ્યોથી બેઉ બેઠકો જીતી શકે. 

પરંતુ, 74 પૈકી ચારથી વધુ ધારાસભ્યો ગેરહાજર રહે અથવા એકડો, બગડો ધૂંટવામાં ભૂલ કરે તો કુલ મતદાન 176નું થાય અને એક બેઠક જીતવા 36 ધારાસભ્યોના વોટની જરૂર પડે. આ સંજોગોમાં કુલ 34 ફસ્ટ પ્રેફરન્સના મતો મેળવી તેમાં બગડા (સેન્કન્ડ પ્રેફન્સ)થી ત્રીજી બેઠક કબ્જે કરે તેવું ગણિત ભાજપ ગણી શકે તેવી જોરદાર ચર્ચા છે.