રાજકોટ અગ્નિકાંડ / રાજકોટ ગેમ ઝોન અગ્નિકાંડમાં 33 લોકોના મોત, મૃતકોના DNA સેમ્પલ ટેસ્ટ માટે મોકલાયા, 48 કલાક બાદ આવશે રિપોર્ટ

TRP ગેમિંગ ઝોનમાં કરુણાંતિકા બાદ પરિવારજનોમાં આક્રંદ અને આક્રોશ જોવા મળ્યો. એક જ પરિવારના 7 બાળકો ગેમિંગ ઝોનમાં ગયા હતા, જેમાંથી 2 બાળકો ઘાયલ મળ્યા છે જ્યારે 5 બાળકો લાપતા હોવાનું વિવશતા સાથે પરિવારજનોએ જણાવ્યું હતું. કહ્યું કે 'મારા પરિવારના 7 લોકો ગયા હતા, 5નો અત્તોપત્તો નથી'

આ અગ્નિકાંડે એક NRI પરિવારને પણ વેરવિખેર કરી દીધો છે. ગેમઝોનમાં લાગેલી આગમાં પતિ-પત્ની અને સાળીનું મૃત્યુ થયું છે. અમેરિકાથી લગ્ન કરવા માટે પરિવાર રાજકોટ આવ્યો હતો. હજુ 4 દિવસ પહેલા જ યુગલના લગ્ન થયા હતા, ત્યારે નવ પરિણીત યુગલનું મોત થતા પરિવાર શોકમાં ગરક થઈ ગયો છે.

રાજકોટમાં TRP ગેમઝોનની આગમાં મૃતકોના DNAના સેમ્પલ મોકલાયા છે અને આ DNA સેમ્પલનો રિપોર્ટ 48 કલાક બાદ આવશે. એટલે કે બે દિવસ પછી ખબર પડશે કે મૃતકોના પરિવારજનો કોણ છે. 25 DNA સેમ્પલ ગાંધીનગર મોકલાયા છે અને AIIMSમાં 16 મૃતદેહ કોલ્ડ સ્ટોરેજમાં રાખવામાં આવ્યા છે. સાથે જ 11 મૃતદેહ સિવિલ હોસ્પિટલના કોલ્ડ સ્ટોરેજમાં રખાયા છે.

રાજકોટની મુલાકાતે આવેલા મુખ્યમંત્રી ભૂપેન્દ્રભાઈ પટેલ રાજકોટ એઈમ્સની મુલાકાતે પહોંચ્યા છે, જ્યાં તેઓ સારવાર કરી રહેલા ડૉક્ટર્સ અને અધિકારીઓ સાથે મુલાકાત કરશે. AIIMSમાં 16 મૃતદેહ રાખવામાં આવ્યા છે.

રાજકોટમાં બેદરકારીના આગકાંડ બાદ મુખ્યમંત્રી ભૂપેન્દ્ર પટેલ રાજકોટ પહોંચ્યા અને સીએમએ ગૃહમંત્રી હર્ષ સંઘવી સાથે ગિરિરાજ હોસ્પિટલમાં આગકાંડના ઘાયલોની મુલાકાત લીધી હતી.

રાજકોટ ગેમિંગ ઝોનની દુર્ઘટનામાં બેજવાબદારીપૂર્વક ચાલતા વેલ્ડિંગથી આગ ભભૂકી હોવાની પ્રાથમિક માહિતી સામે આવી છે. સાથે જ આ ગેમ ઝોનના ગ્રાઉન્ડમાં ગો કાર્ટ રેસિંગ માટે 800થી વધુ ટાયર રખાયા હતા. સાથે જ આ ગેમઝોનમાં 1500થી 2 હજાર લીટર ડીઝલ જનરેટર માટે રખાયું હતું. ગો કાર રેસિંગ કાર માટે 1000થી 1500 લીટર પેટ્રોલ સ્ટોરેજ કરવામાં આવ્યું હતું.

રાજકોટના ગેમઝોનમાં લાગેલી આગમાં અત્યાર સુધી 33 લોકોએ જીવ ગુમાવ્યા છે. હાલ રાજ્યના મુખ્યમંત્રી ભૂપેન્દ્ર પટેલ ઘટના સ્થળે પહોંચ્યા છે અને સ્થળનું નિરીક્ષણ કરી રહ્યા છે.

રાજકોટ અગ્નિકાંડમાં ગઇકાલે લાગેલી આગમાં 9 બાળકો સહિત 33 લોકો આગમાં હોમાયા છે અને ત્યારે મૃત્યુઆંક હજુ વધવાની સંભાવના છે. હાલ ઘટના સ્થળે પોલીસનો કાફલો તૈનાત કરાયો છે.અને મૃતદેહ મળ્યા તેમના DNA ટેસ્ટ કરી ઓળખ કરવામાં આવશે.

TRP ગેમ ઝોનમાં દુર્ઘટના બની છે જેમાં અનેક લોકો પોતાના જીવ ગુમાવ્યા છે. આગ લાગી તે સમયનો વીડિયો સામે આવ્યો છે. સૌ પ્રથમ ગેમ ઝોનમાં અંદરના ભાગે આગ લાગી હતી

રાજકોટ ગેમ ઝોન આગ દુર્ઘટના માં મૃત્યુ પામેલા વ્યક્તિઓના પરિવારના દુઃખમાં સહભાગી થવા અને ઇજાગ્રસતોના ખબર અંતર પૂછવા મુખ્યમંત્રી ભૂપેન્દ્ર પટેલની સૂચના અનુસાર ગૃહ રાજ્ય મંત્રીહર્ષ સંઘવી રાજકોટ પહોંચશે. તેઓ બચાવ રાહત કામગીરીની સમીક્ષા કરીને સ્થાનિક તંત્રનું માર્ગદર્શન પણ કરશે.

રાજકોટ ફાયર દુર્ઘટના રાજ્યના ગૃહમંત્રી હર્ષ સંઘવી જણાવ્યું કે, આ ઘટનામાં ઘણા પરિવારોએ પોતાના બાળકો ગુમાવ્યા છે. હું અત્યારે રાજકોટ જઈ રહ્યો છું. આજે રાત્રે SIT તેની તપાસ શરૂ કરશે. સંચાલક અને મેનેજરની ધરપકડ કરવામાં આવી છે. ફાયર સ્પોટની મુલાકાત લીધા પછી એક મીટિંગ થશે અને આજે રાત્રે કાર્યવાહી શરૂ થશે પીએમ મોદીએ સીએમ પાસેથી વિગતો પણ લીધી છે.

રાજકોટ દુર્ઘટના મામલે સરકારે તપાસ કમિટી બનાવી છે. અધિક પોલીસ મહાનિર્દેશક સુભાષ ત્રિવેદીના અધ્યક્ષસ્થાને કમિટી બનાવાઈ છે. કમિશનર ટેકનિકલ એજ્યુકેશન બંછાનિધિ પાનીનો કમિટીમાં સમાવેશ કરાયો છે. FSLના ડાયરેક્ટર એચ.પી.સંઘવીનો પણ કમિટીમાં સમાવેશ કરાયો છે તો અમદાવાદના ચીફ ફાયર ઓફિસર જે.એન.ખડિયા તેમજ માર્ગ મકાન વિભાગના સુપ્રિટેન્ડિંગ એન્જિનિયર એમ.બી.દેસાઈનો પણ કમિટીમાં સમાવેશ કરાયો છે.

રાહુલ ગાંધીએ ટ્વીટ કરી લખ્યું કે, ગુજરાતના રાજકોટના એક મોલના ગેમિંગ ઝોનમાં લાગેલી ભીષણ આગમાં માસુમ બાળકો સહિત અનેક લોકોના મોતના સમાચાર ખૂબ જ દર્દનાક છે. હું તમામ શોકગ્રસ્ત પરિવારો પ્રત્યે મારી ઊંડી સંવેદના વ્યક્ત કરું છું. હું આશા રાખું છું કે તમામ ઇજાગ્રસ્તો જલ્દી સ્વસ્થ થઈ જાય. કોંગ્રેસના કાર્યકર્તાઓને રાહત અને બચાવ કાર્યમાં વહીવટીતંત્રને શક્ય તમામ મદદ કરવા વિનંતી કરે અને ગુજરાત સરકાર અને વહીવટીતંત્ર આ ઘટનાની ઝીણવટભરી અને નિષ્પક્ષ તપાસ કરે અને તમામ શોકગ્રસ્ત પરિવારોને ઝડપી ન્યાય અપાવે તેવી અપેક્ષા છે.

પ્રધાનમંત્રી મોદીએ ટ્વીટ કરી જણાવ્યું કે, રાજકોટમાં આગની ઘટનાથી અત્યંત વ્યથિત છું. મારી સંવેદનાઓ તમામ લોકો સાથે છે જેમણે પોતાના પ્રિયજનોને ગુમાવ્યા છે. ઘાયલો માટે પ્રાર્થના કરૂ છું. સ્થાનિક વહીવટીતંત્ર અસરગ્રસ્તોને તમામ શક્ય સહાય પૂરી પાડવા માટે કામ કરી રહ્યું છે.