લૉકડાઉન / 6 મહિનાનો ગર્ભ છતા રાજકોટની આ મહિલા ASI કોરોનાના જોખમ વચ્ચે નિભાવી રહી છે પોતાની ફરજ

• રાજકોટના એક મહિલા ASIની સરાહનીય કામગીરી
• 6 મહિનાનો ગર્ભ છતા પણ નિભાવી રહી છે પોતાની ફરજ
• પરિવારે કહ્યું કે ભલે પગાર ન મળે પણ તુ રજા પર ઉતરી જા

રાજકોટના મહિલા પોલીસ સ્ટેશનમાં ASI તરીકે ફરજ બજાવતા નસરીન જુનૈદ બેલીમની અડગતા હિમાલય જેવી છે. આ મહિલા પોલીસ અધિકારીને 6 માસનો ગર્ભ છે છતા પણ તે લૉકડાઉનની પરિસ્થિતિમાં પોતાની ફરજ નિભાવી રહી છે. તેમને પરિવાર સતત ચિંતા કરતો રહે છે, તેને હમણા રજા લઇ લેવા માટે કહે છે પરંતુ તે પોતાની જવાબદારીને લઇને અડગ છે. નસરીન કહે છે કે, રજા નહીં લઉ મારી ફરજ પહેલા નિભાવીશ. આવી રીતે સાચા રાષ્ટ્રરક્ષકની જેમ ગર્ભવતી હોવા છતા પણ તે પોતાની ફરજ નિભાવી રહી છે.

નસરીન જુનૈદ બેલીમ કહે છે કે, હું મહિલા પોલીસ સ્ટેશનમાં ASI તરીકે ફરજ બજાવું છું. હાલ મારે 6 મહિનાનો ગર્ભ છે. જ્યારથી આ લૉકડાઉનની પરિસ્થિતિ શરૂ થઇ છે અને રાજકોટમાં કોરોનાનો પોઝિટિવ કેસ સામે આવ્યો છે ત્યારથી મારા પરિવારજનો ખુબ જ ચિંતા કરી રહ્યા છે. હાલ તેઓ મને કંઇ ના થઇ જાય એવો ડર સતાવી રહ્યો છે, તેને લાગી રહ્યું છે કે જો મને કોરોના સંક્રમણ થઇ ગયું તો પછી મારૂ અને બાળકનું શું થશે? મારી પ્રેગ્નેન્સીના કારણે મારી રોગપ્રતિકારક શક્તિ પણ ઓછી રહેતી હોવાથી મારા પરિવારજનો ચિંતામાં રહ્યા કરે છે. પરંતુ મારી નોકરી અને ફરજ પહેલા છે. 

પગાર ન મળે તો તું આમનામ રજા પર ઉતરી જા...

નસરીને કહ્યું કે જ્યારે રાજકોટમાં કોરોનાનો પહેલો કેસ આવ્યો ત્યારે મને ઘરેથી કહ્યું હતું કે ગમે તે થાય તું રજા મુકી દે. જો પગાર ન મળે તો તું પગાર વિના રજા પર ઉતરી જા. મારા પતિ પણ થોડા ડરેલા હતા અને તેમણે પણ મને નોકરી પર જવાની ના પાડી હતી. તેમણે કહ્યું હતું કે તુ હાલ થોડા દિવસ રજા લઇલે તો વધારે સારુ.

મારા પતિને સમજાવ્યા કે ચિંતા ન કરો...

બાદમાં મે મારા પતિને સમજાવ્યા અને કહ્યું કે અમારા પોલીસ સ્ટાફમાં કીટનું વિતરણ કરાયું છે. તમામ રીતે સાવચેતી રાખવામાં આવે છે. અમારા પર ઉપરી અધિકારી ધ્યાન રાખે છે. કંઇ ચિંતા જેવું નથી અને તમે પણ ચિંતા ન કરો. ફરજ દરમિયાન મને કંઇ નહીં થાય. હાલ મારા પતિ અને હું બન્ને જ રાજકોટ રહીએ છીએ. મારા પતિ મને કામકાજમાં મદદ કરે છે.