ઇલેક્શન-2022 / રાજકોટમાં મળી કોળી સમાજના આગેવાનોની બેઠક, વિધાનસભાની ચૂંટણીને લઇને જુઓ શું લેવાયો નિર્ણય

• રાજકોટમાં કોળી આગેવાનોની બેઠક યોજાઇ
• અખિલ ભારતીય કોળી સમાજના આગેવાનોની બેઠક યોજાઇ
• કુંવરજી બાવળિયા,ભાજપના કોર્પોરેટર બાબુ ઉધરેજીયા બેઠકમાં હાજર રહ્યા

ગુજરાતની રાજનીતિ હવે નાત-જાત પર થવા લાગી છે. દરેક સમાજને પ્રભુત્વ જોઈએ છે.. અને આ પ્રભુત્વની ચાહમાં હવે એક જ સમાજના લોકો વચ્ચે પણ ફાંટા પડતા જોવા મળી રહ્યા છે.. આવું જ કાંઈક સૌથી મોટી વોટબેંક ધરાવતા કોળી સમાજમાં પણ જોવા મળી રહ્યું છે.. ખાસ કરીને સૌરાષ્ટ્રની કોળી સમાજની લોબીમાં બે ફાટા પડ્યા છે.. જેમાં કુંવરજી બાવળિયા અને દેવજી ફતેપરા સામ-સામે આવી ગયા છે. કુંવરજી બાવળિયા અને દેવજી ફતેપરાના વિવાદ વચ્ચે રાજકોટમાં કોળી આગેવાનોની બેઠક મળી હતી.

'કોળી સમાજનું પ્રભૂત્વ છે ત્યાં ટિકિટની માંગ' 

રાજકોટમાં કોળી આગેવાનોની બેઠક યોજાઇ. કુંવરજી બાવળિયા અને દેવજી ફતેપરાના વિવાદ વચ્ચે અખિલ ભારતીય કોળી સમાજના આગેવાનોની બેઠક યોજાઇ હતી.  કુંવરજી બાવળિયા,ભાજપના કોર્પોરેટર બાબુ ઉધરેજીયા બેઠકમાં હાજર રહ્યા હતા.  રાજકોટ જિલ્લા-શહેર અખિલ કોળી સમાજના પ્રમુખની વરણી કરવામાં આવી હતી.  બેઠકમાં અલગ-અલગ સમાજના નેતૃત્વ પર ચર્ચા થઇ હતી.  આ બેઠકમાં આગામી વિધાનસભાની ચૂંટણીને ધ્યાને રાખીને  જ્યાં કોળી સમાજ પ્રભુત્વ ધરાવે છે ત્યાં ટિકિટની માંગણી કરવાનો નિર્ણય લેવાયો હતો. 

શીલજ ખાતે ઠાકોર અને કોળી સમુદાયની મળી હતી બેઠક 

મહત્વનું છે કે  થોડા દિવસ રાજકોટમાં કોળી અને ઠાકોર સમાજનું એકતા મિશન - 2022  અંતર્ગત - હું નહીં આપણે - મીટીંગનું આયોજન કરવામાં આવ્યું હતું. જે અંતર્ગત અમદાવાદના શીલજ ખાતે ઠાકોર અને કોળી સમુદાયના અગ્રણીઓની બેઠક યોજાઈ હતી. જેમાં બહોળી સંખ્યામાં બંને સમાજના આગેવાનો અને યુવાનોએ ભાગ લીધો હતો.જેમાં  ઠાકોર અને કોળી સમુદાયના અગ્રણીઓએ લાંબા સમય સુધી બંને સમાજની માંગણી અને અગાઉના કાર્યક્રમ વિષે ગહન ચર્ચાઓ કરી હતી. અને ચર્ચાના મંથનમાંથી ગુજરાતમાં સમાજની વસ્તી ધોરણે અથવા અલગ અનામતની માંગ કરવામાં આવી હતી.ઠાકોર અને કોળી સમુદાયના વિકાસ માટે 1500 કરોડની ગ્રાન્ટની ફાળવણી કરવા માગ તેજ કરાઇ હતી. સમાજ માટે આદર્શ નિવાસી પ્રત્યેક જિલ્લામાં હોસ્ટલ સાથે શાળાની માંગ, જ્ઞાતિ આધારિત વસ્તી ગણતરી કરવા અંગે રણનીતિ, કોર કમિટી દ્વારા સમાજની જાગૃતિ માટે કાર્યક્રમોનું આયોજન અંગે આજની બેઠકમાં રૂપરેખા ઘડવામાં આવી હતી. 

ગુજરાતમાં કોળીનું રાજકીય મહત્વ

કોળી સમાજ ગુજરાતમાં સૌથી વધારે વસ્તીવાળો સમાજ 
રાજ્યમાં કુલ 18 ટકા જેટલી વસ્તી કોળી સમાજની 
કોળી સમાજ રાજ્યની 35-40 બેઠક પર સીધી અસર કરે છે 
સૌરાષ્ટ્રમાં 57 બેઠકમાંથી 25 બેઠક પર કોળી સમાજની વસ્તી વધારે 
દક્ષિણ ગુજરાતમાં 10 બેઠક પર કોળી સમાજની વસ્તી વિશેષ