અમદાવાદ / નશાની પાર્ટી પર બ્રેક મારવા અત્યારથી આયોજન, હાઈ પ્રોફાઇલ રેવ પાર્ટી રડારમાં, સ્ટંટ કરનારા તત્વોનું આવી બન્યું

• 31st માટે પોલીસ પણ ‘તૈયાર’ હાઈ પ્રોફાઇલ રેવ પાર્ટી રડારમાં
• ફાર્મ હાઉસ અને ખેતરો પર પોલીસની બાજ નજર
• 1stની રાતે સ્ટંટ કરનારા યુવાનોને પણ પાઠ ભણાવાશે

અમદાવાદ ‌જિલ્લા તેમજ 50 કિલોમીટરના અંતરે આવેલાં ફાર્મ હાઉસ તેમજ ખેતરોમાં યુવાઓએ પાર્ટી કરવાનું આયોજન કરી લીધું છે. 31 ડિસેમ્બર પહેલાં યુવાઓ દારૂ તેમજ હુક્કા સહિતની ચીજવસ્તુઓ ફાર્મ હાઉસ અને ખેતરોમાં પહોંચાડી દેશે. સાંજના સમયે યુવાઓ ફાર્મ હાઉસ અને ખેતરોમાં પહોંચી જશે અને પાર્ટીનું આયોજન કરશે. આ સાથે કેમ્પફાયર પણ કરવાનું આયોજન કરી દીધું છે. આવી પાર્ટી ઉપર નજર રાખવા માટે પણ પોલીસ એલર્ટ છે. 

બંદોબસ્તને લઇ બ્લૂ પ્રિન્ટ પણ તૈયાર
છેલ્લાં બે વર્ષથી કોરોનાએ આપેલી દસ્તકના કારણે ૩૧ ‌ડિસેમ્બરની ઉજવણી પર ગ્રહણ લાગી ગયું હતું, જોકે હવે આ ગ્રહણનો અંત આવતાં ધુમધડાકા સાથે નવા વર્ષને આવકારવા માટે યુવાઓ થનગનાટ કરી રહ્યાં છે. એમડી ડ્રગ્સ, હુક્કા પાર્ટી, દારૂની મહે‌ફિલની ‌કિક સાથે 31 ડિસેમ્બરની ઉજવણી થશે. યુવાઓની રેવ પાર્ટીમાં ભંગ પડાવવા માટે પોલીસ તેમજ ક્રાઇમ બ્રાંચ સહિતની એજન્સીઓ એલર્ટ મોડ પર આવી ગઈ છે. નશાની પાર્ટીને રોકવા માટે પોલીસ માઇક્રો લેવલે પ્લા‌નિંગ કરી રહી છે, જ્યાં બંદોબસ્તને લઇ બ્લૂ પ્રિન્ટ પણ તૈયાર કરી લીધી છે.

પોલીસ એલેર્ટ મોડમાં

શહેરમાં એમડી ડ્રગ્સની બોલબાલા વધી ગઈ છે, જેને રોકવા માટે પોલીસ રાત-દિવસ મહેનત કરી રહી છે. સાંજ પડે એટલે યુવાઓ ઠાઠમાઠથી તૈયાર થઈને સિંધુ ભવન રોડ અને એસજી હાઇવે પર નીકળી પડે છે. ત્યાર બાદ એમડી ડ્રગ્સનો નશો કરે છે. શહેરના સૌથી વધુ પોશ વિસ્તારમાં એમડી ડ્રગ્સ તેમજ નશો કરતા યુવાઓ વધુ છે, જે આગામી દિવસોમાં પેડલર્સ બની જશે. ૩૧ ‌ડિસેમ્બરને હવે ગણતરીના દિવસો બાકી રહ્યા છે ત્યારે યુવાઓએ પાર્ટી કરવાનું આયોજન કરી દીધું છે. ડ્રગ્સ માફિયાઓએ એમડીનો જથ્થો સુર‌િક્ષત જગ્યાએ મૂકી દીધો છે અને તેને ડબલ ભાવમાં નવા વર્ષે વેચવાની તૈયારી કરી દીધી છે ત્યારે બુટલેગર્સે પણ મોંઘી દારૂની બોટલોનો સ્ટોક કરી દીધો છે. 

નવા વર્ષને આવકારવા માટે નવી નવી પાર્ટીઓનું આયોજન
યુવાઓ નવા વર્ષને આવકારવા માટે નવી નવી પાર્ટીઓનું આયોજન કરી રહ્યાં છે, જેમાં કેટલીક જગ્યાએ ડીજે પાર્ટીનું પણ આયોજન થવાનું છે. ડીજે પાર્ટી, રેવ પાર્ટીમાં યુવાઓ એમડી ડ્રગ્સ તેમજ દારૂનો નશો કરીને આવે તેવી શક્યતા છે, જેથી પોલીસ એલર્ટ મોડ પર આવી ગઈ છે. આ સિવાય અમદાવાદ બહાર આવેલાં ફાર્મ હાઉસનું ‌લિસ્ટ પોલીસે તૈયાર કર્યું છે, જ્યાં હાઇ પ્રોફાઇલ પાર્ટીઓનું આયોજન થવાનું છે. 

પોલીસ તેમજ સુરક્ષા એજન્સીઓ તત્પર
શહેરમાં કેટલી પાર્ટીનું આયોજન થવાનું છે તેની આંકડાકીય મા‌હિતી હજુ સુધી સામે નથી આવી, પરંતુ સિંધુ ભવન રોડ પર સૌથી વધુ પાર્ટીઓનું આયોજન કરવામાં આવશે. યુવાઓના પ્લાન પર પાણી ફેરવી દેવા માટે પોલીસ તેમજ સુરક્ષા એજન્સીઓ તત્પર છે. તેઓ બુટલેગર તેમજ ડ્રગ્સ માફિયાઓને એક પછી એક ઝડપી રહ્યાં છે ત્યારે પાર્ટી થાય તેવી જગ્યા પર વોચ પણ રાખી રહ્યાં છે. નબીરાઓ પોલીસને પડકાર આપીને કોઇ પણ ગમેતે ભોગે પાર્ટી કરવા માટે તૈયાર છે, જ્યારે પોલીસ પણ તેમને પકડવા માટે સક્ષમ છે. 

પોલીસ કંટ્રોલરૂમથી સમગ્ર અમદાવાદ પર વોચ રખાશે
પોલીસ સુરક્ષા વ્યવસ્થાને લઈ આખરી ઓપ આપવામાં આવી રહ્યો છે, જેમાં 12 ડીસીપી, 2૦થી વધુ એસીપી, 6૦થી વધુ પીઆઇ તેમજ પીએસઆઇ સહિત હજારોની સંખ્યામાં પોલીસ કર્મચારીઓ નાઇટ ડ્યૂટી કરશે. પોલીસ કંટ્રોલરૂમથી અમદાવાદનું મો‌નિટરિંગ સીસીટીવી કેમેરા મારફતે કરવામાં આવશે અને ‘શી’ ટીમ પણ સતત પેટ્રો‌િલંગ કરશે. જ્યારે સ્ટંટ કરતા વાહનચાલકોને કાબૂમાં કરવા વાહનોની સ્પીડ પર નજર રાખી પાઠ ભણાવાશે.

નશેડીઓ આયુર્વે‌દિક હર્બલ ટો‌નિકનો ઉપયોગ કરશે
દારૂ‌ડિયાઓને પકડવા માટે ખાસ ડ્રાઇવનું આયોજન કરાશે, જે અંતર્ગત પોલીસને બ્રેથ એનેલાઇઝરથી સજ્જ કરી દેવામાં આવશે. પોલીસ દારૂ‌ડિયા તેમજ નશેડીઓ વિરુદ્ધ કાર્યવાહી કરશે ત્યારે હવે નશાખોરોએ આયુર્વે‌દિક હર્બલ ટો‌નિકનો ઉપયોગ કરવાનું નક્કી કર્યું છે. પાન પાર્લર પર આસાનીથી હર્બલ ટો‌નિક મળી રહે છે, જેમાં સેલ્ફ જનરેટ આલ્કોહોલ હોવાથી યુવાઓને તેમાં નશો ચઢે છે.