- રાદડિયાના ગઢમાં PM મોદીની જાહેરસભા
- જામકંડોરણા કન્યા છાત્રાલયની નજીક જાહેરસભાનું આયોજન
- અંદાજે દોઢ લાખની જનમેદની એકઠી થવાની સંભાવના
ગુજરાત વિધાનસભાની ચૂંટણીને લઇને તમામ કેન્દ્રીય નેતાઓના ગુજરાતમાં ધામા વધી ગયા છે. રાજ્યમાં પીએમ નરેન્દ્ર મોદી, ગૃહમંત્રી અમિત શાહ, અરવિંદ કેજરીવાલ અને ભગવંત માન સહિત દિગ્ગજો ગુજરાતમાં અવરજવર કરી રહ્યાં છે. ત્યારે વધુ એક વખત PM નરેન્દ્ર મોદી ગુજરાતના પ્રવાસે આવી રહ્યાં છે. આગામી તારીખ 9, 10 અને 11 ઓક્ટોબરના રોજ વડાપ્રધાન મોદી ગુજરાત આવશે. મહત્વનું છે કે, તેઓ ચૂંટણી પૂર્વે ગુજરાતને અનેક વિકાસકાર્યોની ભેટ આપી રહ્યાં છે. ત્યારે ગુજરાતમાં એકવાર ફરી PM મોદી અનેક વિકાસ કાર્યોનું લોકાર્પણ અને ખાતમુહૂર્ત કરશે.
PMની સભા માટે તડામાર તૈયારીઓ
આગામી 11 ઓક્ટોબરના રોજ PM મોદી રાજકોટ જિલ્લાના જામકંડોરણા ખાતે જાહેરસભાને સંબોધન કરવાના છે. જામકંડોરણા કન્યા છાત્રાલયની નજીક જાહેરસભાનું આયોજન કરવામાં આવ્યું છે. પીએમ મોદીની સભાને લઈને તડામાર તૈયારીઓ કરવામાં આવી રહી છે. જાહેરસભામાં અંદાજે દોઢ લાખની જનમેદની એકઠી થવાની સંભાવના છે. જયેશ રાદડિયાએ કહ્યું કે,મારા માટે ગર્વની વાત છે કે મારા મત વિસ્તાર, એવા જામકંડોરણામાં દેશના યશસ્વી વડાપ્રધાન નરેન્દ્ર મોદી આવી રહ્યા છે.પીએમ મોદીના સ્વગતની તડામાર તૈયારીઓ કરવામાં આવી રહી છે. અહીં વિશાળ ડોમ તૈયાર કરવામાં આવશે.
આ વિસ્તારમાં રાદડિયા પરિવારનું ભારે વર્ચસ્વ
જેતપુર-જામકંડોરણા વિધાનસભા બેઠકને રાદડિયા પરિવારનો ગઢ માનવામાં આવે છે. દિવંગત નેતા વિઠ્ઠલભાઈ રાદડિયાના સમયથી જ આ વિસ્તારમાં રાદડિયા પરિવારનું ભારે વર્ચસ્વ છે. આ વિસ્તારમાં વિઠ્ઠલભાઈ જેવો જ જયેશ રાદડિયાનો દબદબો છે. આ બેઠક પર જાતિવાદી સમીકરણો વિશે વાત કરીએ તે જેતપુરમાં લઉવા-કડવા પટેલ, ક્ષત્રિય, આહીર, કોળી, બ્રાહ્મણ, માલધારી, ખાંટ, દલિત અને લઘુમતી સમાજનું પ્રભુત્વ છે.
2012થી સતત જયેશ રાદડિયાની જીત
વર્ષોથી જેતપુર-જામકંડોરણા વિધાનસભા બેઠકને ભાજપનો ગઢ માનવામાં આવે છે. વર્ષ 2012માં જયેશ રાદડિયા આ બેઠક પર કોંગ્રેસમાંથી વિધાનસભાની ચૂંટણી લડ્યા હતા. એ સમયે તેમણે ભાજપના જશુમતીબેન કોરાટને હરાવ્યા હતા. જોકે, તેના બે મહિના પછી જ સ્વ.વિઠ્ઠલભાઈ રાદડિયાના પુત્ર જયેશ રાદડિયાએ કોંગ્રેસને અલવિદા કહી દીધું હતું અને તેઓ ભારતીય જનતા પાર્ટીમાં જોડાયા. જે બાદ આ બેઠક પર ફરી પેટાચૂંટણી યોજાઈ હતી. આ ચૂંટણીમાં જયેશ રાદડિયા ભારતીય જનતા પાર્ટીમાંથી લડ્યા હતા અને તેમનો ભવ્ય વિજય થયો હતો. ત્યારથી આજ સુધી જયેશ રાદડિયાની જીત થતી આવી છે.
ફરી એક વખત રાદડિયાની ટિકિટ નિશ્ચિત હોવાના સંકેત
રાદડિયાના ગઢમાં વડાપ્રધાન નરેન્દ્ર મોદી જાહેરસભા સંબોધવા જઈ રહ્યા છે. ત્યારે જિલ્લાના રાજકારણમાં ગરમાવો આવી ગયો છે. આગામી વિધાનસભાની ચૂંટણીમાં ફરી એક વખત જયેશ રાદડિયાની ટિકિટ નિશ્ચિત હોવાના સંકેત સ્પષ્ટ જોવા મળી રહ્યો છે.
વિરપુરમાં રાદડિયાએ સ્ટેજ પરથી કર્યો હતો હુંકાર
મહત્વનું છે કે, તાજેતરમાં વીરપુર ખાતે યોજાયેલા એક કાર્યક્રમમાં જયેસ રાદડિયાએ આડકતરી રીતે તેઓ આગામી વિધાનસભાની ચૂંટણી લડશે તેવો સંકેત આપ્યો હતો. તેમણે હુંકાર કરતા જણાવ્યું હતું કે, 'તમારો ધારાસભ્ય અને તમારો નેતા મજબૂત હોવો જોઈએ, મારા કરતા મજબૂત ધારાસભ્ય મળે ત્યારે તેને વિજયી બનાવીને સ્ટેજ પર બસાડજો. એ સમયે હું પણ એ ધારાસભ્યને સ્વીકારીશ અને તમારા બધાની સાથે નીચે બેસીશ. '
