આગાહી / અમદાવાદીઓ ટાઢકમાંથી મળશે રાહત, આ તારીખ સુધીમાં તાપમાન 31 ડિગ્રીને આંબશે, જાણો હવામાન વિભાગની નવી આગાહી

• અમદાવાદમાં ૭ ફેબ્રુઆરી સુધીમાં ૩૧ ડિગ્રીએ  તાપમાન અટકશે
• શહેરમાં ઠંડા પવનના જોર વચ્ચે ૧૩.૪ ડિગ્રી સેલ્સિયસ લઘુતમ તાપમાન નોંધાયું
• તાપમાન ૭ ફેબ્રુઆરી સુધીમાં ૩૧ ડિગ્રીએ જઈ અટકશે

સામાન્ય રીતે મહાશિવરાત્રી પર્વથી કાતિલ ઠંડી વિદાય લેતી હોવાની ધારણા છે, જોકે આ શિયાળો અમદાવાદ સહિત ગુજરાત માટે લાંબો બનીને રહ્યો છે. એકાંતરે આવતી કોલ્ડવેવ કહો કે ઠંડીના નવા રાઉન્ડથી લોકો ધ્રૂજતા રહ્યા છે. દિવસ દરમિયાન પણ ઠંડીનું જોર અનુભવાતું હોઈ સ્વેટર સહિતનાં ગરમ વસ્ત્રો પહેરવાની લોકોને ફરજ પડી રહી છે, જોકે હવે સ્થાનિક હવામાન વિભાગની આગાહીને જોઈએ તો અમદાવાદમાં બપોરે ગરમીનો પારો ઊંચકાઈને તા. ૭ ફેબ્રુઆરી સુધીમાં ૩૧ ડિગ્રીએ જઈ અટકશે. બીજા અર્થમાં હવે દિવસે લાગતી હાડ થિજાવતી ઠંડીના પ્રમાણમાં ખાસ્સો એવો ઘટાડો થતો જશે.

શહેરમાં ઠંડા પવનના જોર વચ્ચે ૧૩.૪ ડિગ્રી સેલ્સિયસ લઘુતમ તાપમાન નોંધાયું

આજે અમદાવાદમાં ઠંડા પવનના જોર વચ્ચે ૧૩.૪ ડિગ્રી સેલ્સિયસ લઘુતમ તાપમાન નોંધાયું હતું કે જે સામાન્ય તાપમાન જેટલું જ હતું. દરમિયાન, સ્થાનિક હવામાન વિભાગની કચેરી દ્વારા શહેરમાં આગામી તા. ૭ ફેબ્રુઆરી સુધીમાં ૧૬ ડિગ્રી સેલ્સિયસ લઘુતમ તાપમાન અને ૩૧ ડિગ્રી મહત્તમ તાપમાન રહેવાની આગાહી કરાઈ છે, જ્યારે રાજ્યનાં અન્ય પ્રમુખ શહેરોની ઠંડી તપાસતાં વડોદરા ૧૪.૮, ભાવનગર ૧૭.૪, ભૂજ ૧૨, છોટાઉદેપુર ૧૫, દાદરા-નગર હવેલી ૧૮.૨, દાહોદ ૧૨, દમણ ૧૯, ડાંગ ૧૫, ડીસા ૧૨.૬, દીવ ૧૪.૨, દ્વારકા ૧૬.૪, ગાંધીનગર ૧૨.૮, જૂનાગઢ ૧૯.૮, જામનગર ૧૫.૯, કંડલા ૧૪.૪, નલિયા ૫.૩, નર્મદા ૧૧.૭, ઓખા ૧૮.૮, પાટણ ૧૧.૮, પોરબંદર ૧૬.૫, રાજકોટ ૧૨.૮, સાસણ-ગીર ૧૭.૩, સિલવાસા ૧૮.૨, સુરત ૧૮.૨, વલસાડ ૧૪.૪ અને સુરતમાં ૧૭.૩ ડિગ્રી સેલ્સિયસ લઘુતમ તાપમાન નોંધાયું હતું.

૪ ફેબ્રુઆરીથી રાજ્યમાં બેથી ત્રણ ડિગ્રી તાપમાન વધશે

હવામાન વિભાગની કચેરીની આગાહી મુજબ હજુ ત્રણ દિવસ રાજ્યમાં લઘુતમ તાપમાનનું હાલનું પ્રમાણ જળવાઈ રહેશે. તા. ૪ ફેબ્રુઆરીથી તેમાં બેથી ત્રણ ડિગ્રીનો વધારો થશે. આજે નલિયાનો અપવાદ છોડતાં રાજ્યનાં તમામ પ્રમુખ શહેરોમાં દસ ડિગ્રીથી વધુ ઠંડી નોંધાઈ હતી.-