અકસ્માત / સુરતમાં BRTSએ વધુ એક રાહદારીનો ભોગ લીધો, નાગરિકનું મોત થતા રોષે ભરાયેલા લોકોએ કર્યો પથ્થરમારો

• સુરતમાં BRTS બસ બેફામ બની હોવાની વધુ એક ઘટના
• પુણા વિસ્તારમાં BRTSની અડફેટે રાહદારીનું મૃત્યુ
• અકસ્માત બાદ રોષે ભરાયેલા લોકોએ કર્યો પથ્થરમારો

સુરતમાં BRTS બસે વધુ એક નાગરિકનો ભોગ લીધો છે. શહેરના પુણા વિસ્તારમાં BRTS બસની અડફેટે એક રાહદારી આવી જતા તેનું મોત નિપજ્યું છે. જો કે આ ઘટનામાં અકસ્માત બાદ રોષે ભરાયેલા લોકોએ પથ્થરમારો કર્યો હતો. રોષે ભરાયેલા લોકોએ બસના કાચ તોડીને તોડફોડ કરી હતી. જો કે, પુણા પોલીસે ઘટનાસ્થળે પહોંચીને આ સમગ્ર મામલે વધુ કાર્યવાહી હાથ ધરી છે.

રોષે ભરાયેલા લોકોએ બસ પર પથ્થરમારો કર્યો

આપણે અનેક વાર જોયું હશે કે BRTS બસના અવારનવાર અકસ્માત થયાની ઘટના સામે આવતી હોય છે, જેના શિકાર રાહદારી અથવા તો કોઇ વાહનચાલક ભોગ બનતા હોય છે. ત્યારે આવી જ વધુ એક ઘટના સુરતથી સામે આવી છે. જેમાં BRTS એક રાહદારીને અડફેટે લેતા તેનું મોત થયું છે. જો કે, આ ઘટના બાદ રોષે ભરાયેલા લોકોએ બસ પર પથ્થરમારો કર્યો હતો. પરંતુ પોલીસને જાણ થતા જ તે તુરંત ઘટનાસ્થળે પહોંચી ગઇ હતી અને આ સમગ્ર મામલાને પોલીસે થાળે પાડ્યો હતો. હાલમાં પોલીસ દ્વારા આખરે કઇ રીતે અકસ્માત થયો અને કેટલાં વાગે થયો જેવી અનેક બાબતે વધુ તપાસ હાથ ધરી રહી છે.

તાજેતરમાં જ ઉધનામાં પણ એક બેકાબુ કાર દુકાનમાં ધૂસી ગઇ હતી

ઉલ્લેખનીય છે કે, તાજેતરમાં જ સુરતના ઉધના વિસ્તારમાં એક બેકાબુ બનેલી કાર એક ખાનગી કંપનીના મોલમાં ઘૂસી જતા અકસ્માત સર્જાયો હતો. જો કે એ સમયે મોલમાં કોઈ ન હોવાને લઇને મોટી દુર્ઘટના ટળી હતી. પરંતુ સોશિયલ મીડિયામાં પણ તેનો વીડિયો ખૂબ વાઇરલ થયો હતો. જો કે આ ઘટનાને લઇને આસપાસના લોકોમાં ડરનો માહોલ જોવા મળ્યો હતો.

જણાવી દઇએ કે, થોડા દિવસ પહેલાં કતારગામ વિસ્તારમાં લાલ કલરની એક બેફામ ગતિએ દોડતી ગાડીએ અકસ્માત સર્જ્યો હતો. આ અકસ્માતમાં સદનસીબે કોઈ જાનહાની ન હોતી થઇ.
પરંતુ જોતજોતામાં રસ્તો ક્રોસ કરીને ધરતી નમકીન નામની ફરસાણની એક દુકાનના બોર્ડમાં ધડાકાભેર પૂરપાટ ઝડપે આવેલી કાર અથડાઈ હતી. પરંતુ બપોરનો સમય હોવાના કારણે દુકાનમાં કોઈ ગ્રાહક નહીં હોવાને લીધે મોટી અકસ્માતની ઘટના ટળી હતી.