રાજકારણ / CJPના સમર્થકો પર પોલીસ કાર્યવાહી મુદ્દે સંસદમાં હોબાળો, સાંસદે કહ્યું ''શિક્ષણ મંત્રી રાજીનામું આપે''

આ મુદ્દે વિપક્ષી પક્ષોએ કેન્દ્ર સરકાર સામે આક્રમક વલણ અપનાવ્યું અને કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માગ ફરી એકવાર દોહરાવી. સતત વિરોધના કારણે બંને ગૃહોની કાર્યવાહી અનેક વખત સ્થગિત કરવી પડી હતી.

વિદ્યાર્થીઓના મુદ્દે અખિલેશ યાદવનો સવાલ

સમાજવાદી પાર્ટીના પ્રમુખ અખિલેશ યાદવે લોકસભામાં જણાવ્યું કે આ કોઈ રાજકીય પક્ષનો નહીં પરંતુ દેશના વિદ્યાર્થીઓ અને યુવાનોનો મુદ્દો છે. તેમણે આરોપ લગાવ્યો કે પ્રદર્શન કરી રહેલા વિદ્યાર્થીઓ સાથે અયોગ્ય વર્તન કરવામાં આવ્યું હતું. તેમણે સવાલ કર્યો કે વિદ્યાર્થીઓ સામે બળપ્રયોગ કરવાનો અધિકાર કોને આપવામાં આવ્યો છે.

કોંગ્રેસે શિક્ષણ મંત્રીના રાજીનામાની માગ કરી

કોંગ્રેસના સાંસદ કે.સી. વેણુગોપાલે લોકસભામાં સ્પષ્ટ શબ્દોમાં કહ્યું કે વિપક્ષની મુખ્ય માગ કેન્દ્રીય શિક્ષણ મંત્રી ધર્મેન્દ્ર પ્રધાનનું રાજીનામું છે. તેમણે જણાવ્યું કે NEET પેપર લીક અને વિદ્યાર્થીઓના પ્રશ્નોને લઈને સરકાર સંતોષકારક જવાબ આપી શકી નથી.

સરકાર ચર્ચા માટે તૈયાર : કિરણ રિજિજૂ

વિપક્ષના આક્ષેપોનો જવાબ આપતા સંસદીય બાબતોના મંત્રી કિરણ રિજિજૂએ કહ્યું કે સરકાર છેલ્લા ઘણા દિવસોથી NEET પેપર લીક મુદ્દે ચર્ચા કરવા તૈયાર છે. તેમણે જણાવ્યું કે નિયમો મુજબ ચર્ચા થાય તો શિક્ષણ વ્યવસ્થા અને યુવાનોને અસર કરતા તમામ મુદ્દાઓ પર વિગતવાર ચર્ચા થઈ શકે છે.

કાળા કપડાંમાં સંસદ પહોંચ્યો વિપક્ષ

રાહુલ ગાંધી સહિત અનેક વિપક્ષી સાંસદો કાળા કપડાં પહેરીને સંસદ પહોંચ્યા હતા. વિદ્યાર્થીઓ પર થયેલી પોલીસ કાર્યવાહી, પેપર લીક અને શિક્ષણ મંત્રીના રાજીનામાની માગને લઈને વિપક્ષ સતત વિરોધ નોંધાવી રહ્યો છે. સંસદ પરિસરમાં પણ વિરોધના સૂરો સાંભળવા મળ્યા હતા.

નિશિકાંત દુબેએ કોંગ્રેસ પર કર્યા પ્રહાર

ભાજપના સાંસદ નિશિકાંત દુબેએ કોંગ્રેસ અને રાહુલ ગાંધી પર નિશાન સાધતા કહ્યું કે વિદ્યાર્થીઓના મુદ્દાને રાજકીય રંગ આપવામાં આવી રહ્યો છે. તેમણે જણાવ્યું કે પરીક્ષાઓ સંબંધિત મુશ્કેલીઓ દરેક વિદ્યાર્થીને થઈ શકે છે અને તેના આધારે રાજકીય પ્રદર્શન કરવું યોગ્ય નથી. તેમણે કોંગ્રેસના વલણ પર પણ સવાલો ઉઠાવ્યા હતા.

આ પણ વાંચોઃ હવે કાળા કપડાં પહેરીને સાંસદો પહોંચ્યા પાર્લામેન્ટ, કમાન રાહુલ-પ્રિયંકા-અખિલેશના હાથમાં

હોબાળાના કારણે કાર્યવાહી વારંવાર સ્થગિત

સવારે લોકસભાની કાર્યવાહી શરૂ થયાના થોડા જ સમયમાં હોબાળો શરૂ થઈ ગયો હતો. જેના કારણે ગૃહની કાર્યવાહી પ્રથમ સ્થગિત કરવામાં આવી હતી. બાદમાં ફરી બેઠક શરૂ થઈ પરંતુ વિરોધ યથાવત રહેતા તેને ફરી બપોરે 2 વાગ્યા સુધી મુલતવી રાખવી પડી હતી. રાજ્યસભાની કામગીરી પણ હોબાળાના કારણે નિર્ધારિત સમય સુધી સ્થગિત કરવામાં આવી હતી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ