માંગણી / કાલથી આરોગ્ય વિભાગના કર્મચારીઓ ઉતરશે હડતાળ પર, જાણો શું છે સમગ્ર મામલો

• આવતીકાલે આરોગ્ય સેવા ખોરવાવાની સંભાવના
• આરોગ્ય કર્મચારી હડતાળ પર ઉતરશે
• ચોથી વખત હડતાળ પર ઉતરશે

ગુજરાતમાં જેમ જેમ ચૂંટણી નજીક આવી રહી છે તેમ તેમ પડતર માંગણીઓના વણઉકેલાયેલા પ્રશ્નો સામે આવી રહ્યા છે. હાલ પંચાયત વિભાગમાં હડતાળનો દોર ચાલી રહ્યો છે. પહેલા તલાટીની હડતાળ બાદ હવે આરોગ્ય વિભાગના કર્મીઓ પોત-પોતાની માંગને લઈ રસ્તા પર ઉતરશે.

આરોગ્યકર્મીની માગ કેમ નથી સંતોષાતી?
પંચાયત વિભાગના તમામ આરોગ્ય કર્મચારીઓ આવતી કાલે હડતાળ પર ઉતરશે. આરોગ્ય કર્મચારીઓ પડતર માંગણીને લઇ ચોથી વખત હડતાલ પર ઉતરશે. જેથી આરોગ્યની સેવાઓ ખોરવાવાની સંભાવના સેવાઈ રહી છે. આ હડતાળ ગુજરાત રાજ્ય આરોગ્ય કર્મચારી મહાસંઘના નેજા હેઠળ કરવામાં આવશે. અગાઉ આરોગ્યકર્મીઓ 2017, 2019 અને 2021માં હડતાળ પર ઉતર્યા હતા. આ સમયે સરકારે માંગણીઓનું સમાધાન માટે આશ્વાસન આપ્યું હતું. આમ છતાં માંગણી નહીં સંતોષાતા આરોગ્ય કર્મચારીઓ આવતીકાલે હતડાળ પર ઉતરશે. ઉલ્લેખનીય છે કે, આરોગ્ય કર્મચારીઓએ ગ્રેડ-પે રૂપિયા 1 હજાર 900થી વધારી રૂપિયા 2 હજાર 800 કરવા માગ કરી છે. સાથે કોવિડ સમયમાં કામ કર્યું તે માટે ફેરણી ભથ્થુ આપવા માગ કરી છે.

શું છે માંગણી?

• ગ્રેડ પે સહિતના મુદ્દાઓને લઇ ચોથી વખત હડતાળ પર ઉતરશે
• 2017, 2019 અને 2021માં કર્મચારીઓ માંગણીઓને લઇ હડતાળ કરી હતી
• અગાઉ સરકારે માંગણીઓનું સમાધાન માટે આપ્યું હતું આશ્વાસન
• આરોગ્ય કર્મચારીઓને ગ્રેડ પે રૂ.1900 થી વધારી રૂ.2800 કરવા માગ
• કોવિડ સમયમાં કામ કર્યું તે માટે ભથ્થુ આપવાની માગ 
• ફેરણી ભથ્થુ (PTA) આપવાની કર્મચારીઓની માગ

કોણ કોણ હડતાળમાં જોડાશે?
ગુજરાતના 33 જિલ્લાના આરોગ્યના મલ્ટીપર્પઝ હેલ્થ વર્કર, ફિમેલ હેલ્થ વર્કર, મલ્ટીપર્પઝ હેલ્થ સુપરવાઇઝર, ફિમેલ હેલ્થ સુપરવાઇઝર, THS, THV અને જિલ્લા કક્ષાના સુપરવાઇઝર જેવા પંચાયતના આરોગ્યલક્ષી તમામ કર્મી તેમજ ફિલ્ડ કર્મચારીઓ પણ હડતાલમાં જોડાશે.