એક્શન પ્લાન / અમદાવાદમાં અત્યારથી ચોમાસા પહેલાંની તૈયારીઃ મશીન હોલ, કેચપીટ, સેન્ટ્રલ વર્જ, ફૂટપાથની જાળવણી કરવા આદેશ

• અમદાવાદમાં ચોમાસા પહેલાની પૂર્વ તૈયારીઓ શરુ 
• મશીન હોલ, કેચપીટ, સેન્ટ્રલ વર્જ, ફૂટપાથની જાળવણી કરવા આદેશ
• ઈજનેર વિભાગના સ્ટાફને કમિશનરની સૂચના

અમદાવાદ શહેરમાં હવે ચોમાસા પહેલાંની પૂર્વ તૈયારીઓ થવા લાગી છે. આમ પણ મ્યુનિ. તંત્ર દ્વારા દર ચોમાસા અગાઉ પ્રી-મોન્સૂન એક્શન પ્લાન બનાવાય છે. આ પ્રી-મોન્સૂન એક્શન પ્લાન હેઠળ સત્તાવાળાઓ દ્વારા ચોમાસામાં ભરાતાં વરસાદી પાણીના ઝડપભેર નિકાલ માટેનું આયોજન કરાય છે, જે માટે તમામ મશીન હોલ, કેચપીટની સફાઈ સહિતની કામગીરી હાથ ધરવામાં આવે છે. લગભગ મે મહિનામાં પ્રી-મોન્સૂન એક્શન પ્લાન અંગેનો ધમધમાટ શરૂ થઈ  જાય છે. 

વિગતો એકઠી કરવાનો આદેશ

જોકે હાલ તો એના પહેલાંની તૈયારીઓ થઈ રહી હોઈ તે અંતર્ગત મશીન હોલ, કેચપીટ, સેન્ટ્રલ વર્જ, ફૂટપાથ વગેરેની માહિતી એકઠી કરવામાં આવશે, તેમાં પણ ખાસ કરીને તૂટી ગયા હોય તેવા મશીન હોલ,  કેચપીટ, સેન્ટ્રલ વર્જ અને ફૂટપાથની વિગતો એકઠી કરાઈ રહી છે, જેના આધારે ચોમાસા પહેલાં તેની મરામત કરી શકાય તે દિશામાં તંત્રે ચક્રો ગતિમાન કર્યાં છે.મ્યુનિસિપલ કમિશનર એમ. થેન્નારસનના આદેશના પગલે ઈજનેર વિભાગ હરકતમાં આવ્યો છે. કમિશનર થેન્નારસને ઈજનેર વિભાગના સ્ટાફને તેમના રોજેરોજના વોર્ડના રાઉન્ડ દરમિયાન તૂટેલા મશીન હોલ, કેચપીટ, સેન્ટ્રલ વર્જ અને ફૂટપાથની વિગતો એકઠી કરવાનો આદેશ અપાયો છે.

ચોમાસા આડે હવે ટૂંકો સમયગાળો રહ્યો
જે તે વોર્ડના ઈજનેર વિભાગના આસિસ્ટન્ટ સિટી ઈજનેર, આસિ. ઈજનેર અને ટેકનિકલ સુપરવાઇઝરે રાઉન્ડ દરમિયાન આ બધી બાબતોની ચકાસણી કરીને તેને લગતું ફોર્મેટ તૈયાર કરવું પડશે. જે તે ઝોનના એડિશનલ સિટી ઈજનેર અને ડેપ્યુટી સિટી ઈજનેર જેવા ઉચ્ચ અધિકારીઓએ પણ વોર્ડ કક્ષાના સ્ટાફ પાસેથી પોતપોતાના વોર્ડની વિગતો એકઠી કરીને તેની મરામત માટે સૂચના આપવી પડશે. આમ પણ ઈજનેર વિભાગ દ્વારા ચોમાસા બાદ આવી કામગીરી અમુક અંશે હાથ પર લેવાઈ હતી, પરંતુ હવે તેમાં વધુ ઊંડાણપૂર્વકની કામગીરી કરવી પડશે, કેમ કે ચોમાસા આડે હવે માંડ બે-અઢી મહિના જેટલો ટૂંકો સમયગાળો રહ્યો છે.