Teachers Day 2025 / અમેરિકા કે રશિયા નહીં, એવાં 5 દેશો જેમની પાસે છે સૌથી બેસ્ટ એજ્યુકેશન સિસ્ટમ!

આજે શિક્ષક દિવસ છે, એવામાં આપણે જાણીશું કે, વિશ્વના કયા પાંચ દેશોમાં બેસ્ટ એજ્યુકેશન સિસ્ટમ છે. આપણે એ પણ જાણીશું કે તે દેશો શિક્ષણની બાબતે બીજા દેશો કરતા કેમ બેસ્ટ છે.

'પ્રોગ્રામ ફોર ઇન્ટરનેશનલ સ્ટુડન્ટ એસેસમેન્ટ' દર ત્રણ વર્ષે હાથ ધરવામાં આવતું ઇન્ટરનેશનલ મૂલ્યાંકન છે, જેમાં 15 વર્ષના વિદ્યાર્થીઓના અભ્યાસ (ગણિત, વિજ્ઞાન અને વાંચન ક્ષમતા)નું મૂલ્યાંકન કરવામાં આવે છે. આ રિપોર્ટમાં ફિનલેન્ડ, સિંગાપોર, જાપાન અને દક્ષિણ કોરિયા લગાતાર ટોપના દેશોમાં સ્થાન ધરાવતા રહ્યા છે. તો વર્લ્ડ ઇકોનોમિક ફોરમ (WEF)ના ગ્લોબલ કોમ્પિટિટિવનેસ રિપોર્ટ મુજબ શિક્ષણ અને સ્કીલ ડેવલોપમેન્ટને પ્રતિસ્પર્ધા સૂચકાંકનો એક મહત્વપૂર્ણ હિસ્સો માનવામાં આવે છે. તેમાં સિંગાપોર અને ફિનલેન્ડ શિક્ષણની ગુણવત્તા અને સ્કીલ ટ્રેનિંગમાં બેહતર સ્થાને છે.

યુનેસ્કો અને યુનિસેફ એજ્યુકેશન રિપોર્ટ મુજબ, વૈશ્વિક શિક્ષણ સૂચકાંકોમાં કેનેડાની ક્વોલિટી અને ઈન્ક્લુસિવિટી માટે ઘણીવાર પ્રશંસા કરવામાં આવી છે. તો જાપાન, કેનેડા અને સિંગાપોર QS વર્લ્ડ યુનિવર્સિટી રેન્કિંગ્સ/ટાઇમ્સ હાયર એજ્યુકેશન રેન્કિંગ્સમાં ઉચ્ચ શિક્ષણ અને યુનિવર્સિટી ક્વોલિટી માટે સતત હાઈ રેટિંગ મેળવી રહ્યા છે. National indicators and Literacy Rates મુજબ જાપાન અને દક્ષિણ કોરિયા લગભગ 100% સાક્ષરતા ધરાવતા દેશોમાં સામેલ છે.

વિશ્વના ટોપના 5 દેશોની એજ્યુકેશન સિસ્ટમ

• ફિનલેન્ડ
  ફિનલેન્ડને ઘણા દાયકાઓથી શિક્ષણ ક્ષેત્રે એક મોડેલ કન્ટ્રી માનવામાં આવે છે. અહીંયા બાળકોની માનસિક ક્ષમતા અને સર્જનાત્મકતાને ધ્યાનમાં રાખીને સિલેબસ  તૈયાર કરવામાં આવ્યો છે. અહીંયા ગોખણપટ્ટી શીખવાને બદલે વિચારવા, પ્રશ્નો પૂછવા અને સમસ્યાઓના ઉકેલ શોધવા પર ભાર મૂકવામાં આવે છે. આ દેશમાં શિક્ષક બનવા માટે માસ્ટર ડિગ્રી ફરજિયાત છે. તેમની તાલીમ માટે એક અલગ યુનિવર્સિટી છે. અહીંયા શિક્ષકોને સમાજમાં ખૂબ માન-સન્માન મળે છે, જેના કારણે શિક્ષણની ગુણવત્તા આપમેળે સારી રહે છે. વાર્ષિક પરીક્ષાઓનો બોજ ઓછો થાય છે અને બાળકો માર્ક્સ માટે સ્પર્ધા કરતાં સહયોગથી શીખવા માટે ટેવાયેલા હોય છે. અહીં શાળાનો સમય ઓછો અને રજાઓ વધુ હોય છે. જેથી બાળકોને પૂરતો આરામનો સમય મળે છે, આથી તેમના વ્યક્તિત્વ વિકાસમાં મદદ થાય છે. અહીંની શિક્ષણ પ્રણાલીનો મૂળ મંત્ર છે - શિક્ષણ આનંદદાયક હોવું જોઈએ, ન કે તણાવપૂર્ણ.
  
• દક્ષિણ કોરિયા
  

દક્ષિણ કોરિયાની શિક્ષણ પ્રણાલી શિસ્ત અને સખત મહેનતની ખૂબ તારીફ થાય છે. અહીં શિક્ષણ કરિયર અને રાષ્ટ્રીય વિકાસ સાથે જોડાયેલું છે. આ દેશમાં વિદ્યાર્થીઓ લાંબા અભ્યાસના કલાકો અને સખત પરીક્ષા સિસ્ટમમાંથી પસાર થાય છે. અહીં શિક્ષણમાં આધુનિક ટેકનોલોજીનો ખૂબ ઉપયોગ થાય છે. દક્ષિણ કોરિયા ઈ-લર્નિંગ, સ્માર્ટ ક્લાસરૂમ અને ઓનલાઈન શિક્ષણમાં અગ્ર સ્થાને છે. આ દેશમાં શિક્ષણમાં માતાપિતાની ભૂમિકા ખૂબ મહત્વની છે. જ્યાં પરિવાર બાળકોના અભ્યાસમાં સહકાર આપે છે. અંગ્રેજી જેવી ભાષાઓમાં ટ્રેનિંગ વિદ્યાર્થીઓને વૈશ્વિક સ્પર્ધા માટે તૈયાર કરે છે. આ શિક્ષણ મોડેલથી દક્ષિણ કોરિયાને ટેકનોલોજી અને અર્થતંત્રમાં ટોપ પર પહોંચવામાં મદદ મળી છે.

• સિંગાપોર
  

દક્ષિણ પૂર્વ એશિયાનો સિંગાપોર દેશ શિક્ષણમાં સતત ઉચ્ચ સ્થાન ધરાવતો રહ્યો છે. અહીંની એજ્યુકેશન સિસ્ટમ વિદ્યાર્થીઓની પર્સનલ શક્તિઓ અને રુચિઓ મુજબ અવસર પૂરા પાડે છે. ગણિત, વિજ્ઞાન અને ટેક્નોલોજી વિષયોમાં તાલીમ આપવામાં આવે છે. અહીંનું અંગ્રેજી અને માતૃભાષા (ચીની, મલય અથવા તમિલ) બંનેમાં શિક્ષણ બાળકોમાં સાંસ્કૃતિક બેલેન્સ અને વૈશ્વિક દ્રષ્ટિકોણ વિકસાવે છે. અહી વિદ્યાર્થીઓનું મૂલ્યાંકન વાર્ષિક પરીક્ષાઓ દ્વારા જ નહીં પરંતુ સમગ્ર વર્ષ દરમિયાન કરવામાં આવે છે. આમ કડક શિસ્ત, ટેકનોલોજી આધારિત શિક્ષણ અને ભવિષ્યની જરૂરિયાતો મુજબ તૈયાર કરાયેલ સિલેબસ તેની વિશેષતાઓ છે.

• જાપાન
  

જાપાનની એજ્યુકેશન સિસ્ટમ મહેનત, નૈતિકતા અને ટીમવર્ક પર આધારિત છે. અહીંયા શરૂઆતથી જ બાળકોમાં શિસ્ત અને નૈતિક શિક્ષણના બીજ રોપવાની સિસ્ટમ બનાવવામાં આવી છે. જ્યાં નાનપણથી જ સમયનું પાલન, સ્વચ્છતા, ટીમ ભાવના અને જવાબદારી શીખવવામાં આવે છે. ક્લાસ રૂમમાં સમૂહ પ્રવૃત્તિઓ અને સામૂહિક ચર્ચાઓ પર ભાર મૂકવામાં આવે છે. જાપાનનો સાક્ષરતા દર લગભગ 100% છે, જે તેની એજ્યુકેશન સિસ્ટમની સફળતા દર્શાવે છે. ટેકનોલોજી અને સંશોધન-લક્ષી સિસ્ટમે જાપાનને વૈજ્ઞાનિક અને ઔદ્યોગિક વિકાસમાં અગ્રેસર બનાવ્યું છે. તેમના શિક્ષણમાં નૈતિક મૂલ્યોની સાથે આધુનિક વિજ્ઞાન પર સમાન ધ્યાન આપવાથી જાપાની એજ્યુકેશન સિસ્ટમને એક અલગ ઓળખ મળી છે.

• કેનેડા
  અહીંયા પ્રવાસી અને વિવિધ સાંસ્કૃતિક પૃષ્ઠભૂમિ ધરાવતા વિદ્યાર્થીઓને સમાન અવસર આપવામાં આવે છે. શિક્ષણ પર સરકારના વધારે રોકાણને કારણે ક્વોલિટી શાળાઓ અને યુનિવર્સિટીઓ ઉપલબ્ધ છે. સંશોધન અને રચનાત્મકતાને શાળા લેવલેથી જ પ્રોત્સાહન આપવામાં આવે છે. બાળકોના રસ અને ક્ષમતા મુજબ સિલેબસ ઓપ્શન આપવામાં આવે છે. અહીંયા બાળકોને ડિજિટલ યુગ માટે તૈયાર કરવામાં આવે છે. તેની એજ્યુકેશન સિસ્ટમ વિશ્વમાં યુનિક માનવામાં આવે છે કારણ કે તે સ્વતંત્રતા, સમાન અવસર અને વ્યવહારુ શિક્ષણ પર આધારિત છે.
  

વધુ વાંચો : હવે સીધેસીધા USના વિઝા નહીં મળે, જાણી લેજો નવો નિયમ, ભારતીયોને થશે અસર

ઉલ્લેખનીય છે કે, આ પાંચ દેશોની એજ્યુકેશન સિસ્ટમમાં કેટલીક સામાન્ય લાક્ષણિકતાઓ પણ છે. જેમાં શિક્ષકોનો ઉચ્ચ દરજ્જો અને તેમની પ્રશિક્ષિતતા. બાળકોની સર્જનાત્મકતા અને વ્યવહારુ શિક્ષણ પર ભાર. ટેકનોલોજી અને આધુનિક સંસાધનોનો ઉપયોગ. સમાન અવસર અને સહકાર. જેમાં ફિનલેન્ડ માનવીય દ્રષ્ટિકોણ અને સંતુલિત જીવનને પ્રાથમિકતા આપે છે. દક્ષિણ કોરિયા સખત મહેનત અને સ્પર્ધા પર આધારિત છે. સિંગાપોર અને જાપાન ટેકનોલોજી અને શિસ્ત પર ભાર મૂકે છે. તો કેનેડા સમાનતા અને સમાવેશિતાને આદર કરે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ