હાલ રાજ્યસભામાં ચૂંટણીની એવી સિઝન આવી છે કે જાણે કોરોના વાયરસ ચારેકોર ફેલાયો હોય તેવું વાતાવરણ આ નેતાઓએ કરી નાંખ્યું છે. ગઈકાલે રાજ્યસભાની ચૂંટણીના ઉમેદવારો ફોર્મ ભરવાનો અંતિમ દિવસ હતો. ત્યારે વિધાનસભાની લોબીમાં અપક્ષ ધારાસભ્ય જીજ્ઞેશ મેવાણી ધીમે ધીમે ચાલતાં જતાં હતા તે જોઈને નાયબ મુખ્યમંત્રી નીતિન પટેલે તેમને રોકાયાં. જેવા નીતિનભાઈ જીજ્ઞેશને રોક્યાં ત્યાં જ મેવાણી તેમને કવિતા સંભળાવા લાગ્યા હતા. આ કવિતા પુરેપુરી સાંભળી નીતિન પટેલે જવાબ આપતા બોલ્યા મારે પણ કવિ બનવું પડશે. જાણીએ સમગ્ર ઘટના વિગતવાર...
નીતિનભાઈએ મેવાણીને લોબીમાં રોક્યા ને કવિતાઓ ગવાઈ
નીતિનભાઈ શું હવે કવિ બની જશે?
કોંગ્રેસની કઈ ‘આશા નઠારી નીવડી’
મેવાણીએ કવિ અંદાજમાં કવિતા કહી કે,‘એવી ઘણી છે રચના ભાવ જેમાં કઈ નથી હોતા, એવા ઘણાં છે ભાવ જેની રચના થઈ નથી શકતી. આપના હૃદયમાં એ ભાવની રચના થઈ નથી શકતી એ ભાવ અમારા સુધી પહોંચી ચુક્યા છે. આ સાંભળીને નીતિન પટેલે સામેથી કહ્યું કે,"હવે તો મારે ય કવિ બનવું પડશે.' ત્યારે મેવાણીએ પણ હસતાં હસતાં કહ્યું કે, 'તમારે એ જ કરવાનું છે.'
રાજ્યસભાની ચૂંટણીમાં ભાજપ-કોંગ્રેસના ઉમેદવારો ફોર્મ ભરે તે પહેલાં સમર્થકોની એટલી ભીડ ઉમટી કે, વિધાનસભામાં લોબીમાં ખુદ મંત્રી-ધારાસભ્યોને ય ગૃહમાં જતાં ધક્કે ચડવું પડ્યું હતું. ભીડને લીધે વિરોધપક્ષના નેતાની ઓફિસમાં પણ શક્તિસિંહ ગોહિલ અને ભરતસિંહ સોલંકીને ફોર્મ ભરવા જતાં ધક્કા ખાવા પડ્યા હતાં.
ભાજપના આશા પટેલને ટોણા સાંભળવા મલ્યા કે,'અમારી આશા ઠગારી નીવડી’. કોંગ્રેસ છોડીને ભાજપમાં ગયેલા ઉંઝાના ધારાસભ્ય આશાબહેન પટેલે સરકારના શિક્ષણ વિભાગના બજેટની ભારોભાર પ્રશંસા કરી હતી. સાથે જ તેમણે ટોણો મારતા કોંગ્રેસના સભ્યોને કહ્યું હતું કે,'તમારામાં આંતરિક વિવાદને દૂર કરો પછી શિક્ષણની વાત કરજો.'
આ સાંભળીને કોંગ્રેસના વાવના ધારાસભ્ય ગેનીબહેન ઠાકોરે વળતો જવાબ આપતા કહ્યું કે,'અમને પણ ઘણી આશાઓ હતી પરંતુ અમારી જ આશા ઠગારી નિવડી.' જો કે ગેની બહેન આ વાક્ય બોલતાં જ વિપક્ષ તો ઠીક શાશક પક્ષના ધારાસભ્યો પણ પેટ પકડીને હસ્યા હતા. આવા ઘણાંય ટાણાઓ સાથે ગૃહમાં ચર્ચાઓ પૂરાજોશમાં ચાલી હતી.