જંગ / રાહતના સમાચાર : કીવમાંથી તમામ ભારતીયોને સલામત બહાર કાઢી લેવાયા-કેન્દ્રની મોટી જાહેરાત

• વિદેશ સચિવ હર્ષવર્ધન શ્રંગલાનું મોટું નિવેદન
• કહ્યું કે કીવમાંથી તમામ ભારતીયોને બહાર કઢાયા
• કીવમાં હવે કોઈ ભારતીય નહીં, કોઈને ત્યાંથી સંપર્ક કર્યો  નથી

યુક્રેનમાં ભારતીયોને લઈને એક મોટી ખબર આવી છે. પ્રધાનમંત્રી મોદીની હાઈ લેવલ બેઠક બાદ વિદેશ સચિવ  હર્ષવર્ધન શ્રંગલાએ મીડિયાને જાણકારી આપતા કહ્યું કે જ્યારે અમે પહેલી એડવાઈઝરી જારી કરી હતી, તે સમયે યુક્રેનમાં લગભગ 20,000 ભારતીય વિદ્યાર્થીઓ હતા ત્યારથી લગભગ 12,000 વિદ્યાર્થીઓ યુક્રેન છોડી ચૂક્યા છે. બાકી બચેલા 40 ટકા વિદ્યાર્થીઓમાંથી લગભગ અડધા યુદ્ધગ્રસ્ત વિસ્તારોમાં છે અને અડધા યુક્રેનની પશ્ચિમી બોર્ડર પર પહોંચી ગયા છે અથવા તે બાજુએ જઈ રહ્યાં છે. તેમણે કહ્યું કે આપણા તમામ નાગરિકોએ કીવ છોડી દીધું છે. અમારી પાસે જે માહિતી છે તે પ્રમાણે, કીવમાં આપણા કોઈ નાગરિક નથી, ત્યાંથી કોઈએ સરકારનો સંપર્ક કર્યો નથી. 

ભારતે યુક્રેનને મોકલી મદદ 

ભારતે યુદ્ધનો સામનો કરી રહેલા યુક્રેનને માનવીય મદદ મોકલી છે. લગભગ બે ટનજેટલી માનવતાવાદી સહાયમાં તંબુઓ, ધાબળા, સર્જિકલ ગ્લોવ્ઝ, પ્રોટેક્ટિવ આઇ ગિયર્સ, વોટર સ્ટોરેજ ટેન્ક્સ, સ્લીપિંગ મેટ્સ, તાડપત્રી અને દવાઓનો સમાવેશ થાય છે.

Of the remaining 40%, roughly half remain in conflict zone in Kharkiv, Sumy area & the other half have either reached the western borders of Ukraine or are heading towards the western part of Ukraine - they are generally out of conflict areas: Foreign Secretary HV Shringla (2/2) pic.twitter.com/qUExPpm7YR

— ANI (@ANI) March 1, 2022

રશિયા અને યુક્રેન ભારતીયોની સલામતી સુનિશ્ચિત કરે
ભારતે રશિયા અને યુક્રેનને ભારતીયોની સલામતી સુનિશ્ચિત કરવા જણાવ્યું છે. મંગળવારે રશિયન હુમલામાં એક ભારતીય વિદ્યાર્થીનું મોત થયું હતું. યુક્રેનની સ્થિતિ દિવસેને દિવસે કથળી રહી છે.

ભારતીયોને તત્કાળ સુરક્ષા આપો-ભારતીય વિદેશ મંત્રાલયે રશિયા-યુક્રેનને કહ્યું 

ભારતીય વિદેશ મંત્રાલયના પ્રવક્તા અરવિંદ બાગચીએ ટ્વિટ કરીને જણાવ્યું કે વિદેશ સચિવે રશિયા અને યુક્રેનના રાજદૂત સાથે વાત કરી છે અને ખારકીવ તથા બીજા અશાંત વિસ્તારોમાં ફસાયેલા ભારતીય નાગરિકોને પૂરતી સુરક્ષા આપીને તેમને તત્કાળ બહાર કાઢવાની માગ ઉઠાવી હતી. તેમણે કહ્યું કે રશિયા અને યુક્રેનમાં ભારતના રાજદૂતો દ્વારા પણ આવા પગલાં ભરાઈ રહ્યાં છે. 

ખારકીવમાં રશિયન હુમલામાં ભારતીય વિદ્યાર્થીનું મોત 
યુક્રેન અને રશિયા વચ્ચે ચાલી રહેલા યુદ્ધની વચ્ચે એક મોટી માઠી ખબર આવી છે. યુક્રેનના ખરકીવમાં રશિયાના તોપમારામાં ભારતીય વિદ્યાર્થીનું મોત થયું છે.