ખુલાસો / હેડલી છે 26/11 નો માસ્ટરમાઇન્ડ... NIA સામે તહવ્વુર રાણાનો ચોંકાવનારો ખુલાસો

મુંબઈ હુમલાના માસ્ટરમાઇન્ડ તહવ્વુર રાણાએ NIA કસ્ટડીમાં મોટો ખુલાસો કર્યો છે. સૂત્રો કહે છે કે, તહવ્વુર રાણા 26/11 ના હુમલામાં પોતાની ભૂમિકાનો ઇનકાર કરી રહ્યા છે. તેણે હેડલીને હુમલાનો માસ્ટરમાઇન્ડ ગણાવ્યો છે. તેણે તપાસ એજન્સીને કહ્યું છે કે, આ હુમલામાં તેની કોઈ ભૂમિકા નથી. હેડલી તમામ માટે જવાબદાર છે.

તહવ્વુર પરિવાર અંગે ચિંતિત છે

સૂત્રોએ એમ પણ જણાવ્યું હતું કે, તહવ્વુર રાણા તેના પરિવાર વિશે ચિંતિત છે. તે પરિવાર સાથે વાત કરવા માંગે છે. તે તપાસ એજન્સીને તેના ભાઈ સાથે વાત કરવાની પ્રક્રિયા વિશે પૂછતો રહે છે. NIA કસ્ટડીમાં રાણા પૂછપરછમાં સહકાર નથી આપી રહ્યો. તે નોનવેજ ખાવા માંગે છે પણ તેને નિયમ મુજબ ખોરાક અપાઇ રહ્યો છે.

26/11 હુમલાના પુરાવા દેખાડીને રાણાની પૂછપરછ ચાલી રહી છે

તહવ્વુર રાણાની તબિયત હાલમાં સારી છે. તેનું મેડિકલ સમયસર થઈ રહ્યું છે. તપાસ એજન્સી તહવ્વુર રાણાને 26/11 હુમલામાં મળેલા પુરાવા બતાવીને પૂછપરછ કરી રહી છે. સૂત્રો એમ પણ જણાવે છે કે, તહવ્વુર રાણા, જેને સેન્ટ્રલાઈઝ્ડ એસી બિલ્ડિંગમાં રાખવામાં આવ્યો છે, તે દિલ્હીમાં ગરમીથી પીડાઈ રહ્યો છે.

રાણા તેના ભાઈ સાથે વાત કરવા માંગે છે.

રાણા કહે છે કે, અહીં ખૂબ ગરમી છે. તે કેનેડામાં રહેતા તેના નાના ભાઈ સાથે વાત કરવા માંગે છે. પૂછપરછ દરમિયાન, રાણા અધિકારીઓ પાસેથી ભારતમાં ન્યાયિક પ્રક્રિયા વિશે માહિતી એકત્રિત કરવાનો પ્રયાસ કરી રહ્યો છે. તે પોતાની સામે દાખલ કરાયેલા કાયદાના કલમો વિશે માહિતી એકત્રિત કરી રહ્યો છે.

વિદેશ મંત્રાલયે પણ આપ્યું નિવેદન

ગુરુવારે, વિદેશ મંત્રાલયે તહવ્વુર રાણા અને મુંબઈ હુમલામાં પાકિસ્તાનના જોડાણ અંગે એક મોટું નિવેદન બહાર પાડ્યું છે. મંત્રાલયના પ્રવક્તા રણધીર જયસ્વાલે કહ્યું કે, પાકિસ્તાન ગમે તેટલો પ્રયાસ કરે, વૈશ્વિક આતંકવાદના કેન્દ્ર તરીકેની તેની ઓળખ અકબંધ રહેશે. તહવ્વુર રાણાનું પ્રત્યાર્પણ પાકિસ્તાન માટે એક ચેતવણી છે કે તેણે મુંબઈ હુમલાના અન્ય ગુનેગારોને ન્યાયના કઠેડામાં લાવવા જ પડશે.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ