ચોમાસુ સત્ર / 'જ્યારે પાકિસ્તાને ભારત દ્વારા ખેંચાયેલી લાલ રેખા...', સંસદમાં ઓપરેશન સિંદૂર પર ચર્ચા પૂર્વે રિજિજૂએ જુઓ શું કહ્યું

Parliament Monsoon Session: સંસદના ચોમાસુ સત્રમાં આજથી પહેલગામ આતંકવાદી હુમલો અને ઓપરેશન સિંદૂર પર ચર્ચા શરૂ થવા જઈ રહી છે. માહિતી અનુસાર, ગૃહમંત્રી અમિત શાહ, રક્ષામંત્રી રાજનાથ સિંહ અને વિદેશમંત્રી એસ જયશંકર લોકસભામાં સરકાર વતી આ ચર્ચાનું નેતૃત્વ કરશે. રક્ષા મંત્રી રાજનાથ સિંહ આજે બપોરે લોકસભામાં ઓપરેશન સિંદૂર પર ચર્ચા શરૂ કરશે. આ મામલો રાષ્ટ્રીય સુરક્ષા સાથે સંબંધિત છે અને સરકાર દ્વારા આ અંગે સત્તાવાર પ્રતિક્રિયા આપવામાં આવશે.

આતંકવાદ પર સરકારના 'મજબૂત' વલણને સ્પષ્ટ કરવા માટે વડાપ્રધાન નરેન્દ્ર મોદી પણ હસ્તક્ષેપ કરી શકે છે. સંસદ સત્રના પહેલા અઠવાડિયાની ગતિરોધક કાર્યવાહી પછી આ ચર્ચા એક મહત્ત્વપૂર્ણ વળાંક છે, જ્યાં રાષ્ટ્રીય સુરક્ષાના મુદ્દા પર NDA અને વિપક્ષ બંને સામસામે છે. ગરમાગરમ ચર્ચાની અપેક્ષા વ્યક્ત કરાઈ રહી છે.

સંસદમાં ચર્ચા શરૂ થાય તે પહેલાં કિરેન રિજિજુએ કરી પોસ્ટ

લોકસભામાં ઓપરેશન સિંદૂર પર ચર્ચા શરૂ થાય તે પહેલાં, કેન્દ્રીય મંત્રી કિરેન રિજિજુએ એક્સ પર એક પોસ્ટમાં કહ્યું,

"જ્યારે રાવણે લક્ષ્મણ રેખા પાર કરી, ત્યારે લંકા સળગી ગઈ. જ્યારે પાકિસ્તાને ભારત દ્વારા દોરવામાં આવેલી લાલ રેખા પાર કરી, ત્યારે પાકિસ્તાનને આગનો સામનો કરવો પડ્યો."

સાંસદ પ્રિયંકા ચતુર્વેદીએ પાંચ પ્રશ્નો પૂછ્યા છે

સાંસદ પ્રતિનિધિ મંડળનો ભાગ રહેલી પ્રિયંકા ચતુર્વેદીએ પાંચ પ્રશ્નો પૂછ્યા છે, અને સંસદમાં સરકાર પાસેથી જવાબોની આશા વ્યક્ત કરી છે.

1. જે આતંકવાદીઓએ ધર્મ પૂછીને લોકોની હત્યા કરી હતી, તેઓ ક્યાં છે? શું તેઓ પકડાઈ ગયા?
2. શું આ ઈન્ટેલીજન્સ ફેલ્યર હતું? જો હા, તો આ માટે કોણ જવાબદાર છે?
3. જનરલ અસીમ મુનીર ભારત વિરુદ્ધ ઝેર ઓકતા રહ્યા, આપણને તેમની પ્રવૃત્તિઓ વિશે માહિતી અગાઉ કેમ ન મળી?
4. ઓપરેશન સિંદૂર હજુ પૂરું થયું નથી. તે ફક્ત 'વિરામ' છે. આવી સ્થિતિમાં, NCERT પુસ્તકોમાં તેને કેવી રીતે સામેલ કરી શકાય?
5. જ્યારે પાકિસ્તાન સતત આપણી વિરુદ્ધ આતંકવાદી પ્રવૃત્તિઓને પ્રોત્સાહન આપી રહ્યું છે, ત્યારે ભારત-પાક એશિયા કપને મંજૂરી આપવી સમજની બહાર છે. આ દેશની લાગણીઓ સાથે રમત છે.

આ પણ વાંચો: આજે લોકસભામાં 'ઓપરેશન સિંદૂર' પર ચાલશે 16 કલાકની ચર્ચા, તો આવતીકાલે રાજ્યસભામાં

લોકસભામાં આજે ચર્ચામાં ભાગ નહીં લે શશિ થરૂર

કોંગ્રેસ સાંસદ શશિ થરૂર આજે લોકસભામાં ઓપરેશન સિંદૂર પર ચર્ચામાં ભાગ લેશે નહીં. માહિતી અનુસાર, આવી મહત્ત્વપૂર્ણ ચર્ચામાં બોલવા માંગતા સાંસદોએ કોંગ્રેસ સંસદીય પક્ષ (CPP) કાર્યાલય દ્વારા ઔપચારિક વિનંતી કરવી પડશે, પરંતુ અત્યાર સુધી શશિ થરૂરે આવી કોઈ વિનંતી કરી નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ