કામની વાત / 15 જુલાઈએ લૉન્ચ નહીં થાય IRCTCની વેબસાઇટ? કેમ, જાણો શું કહ્યું હતું રેલવે મંત્રીએ

Railway News: આઇઆરસીટીસીની નવી વેબસાઇટ 15 જુલાઈના લોન્ચ નહી થાય. ગયા મહિને અશ્વિની વૈષ્ણવનો એક વીડિયો વાયરલ થયો હતો જેમાં તેમણે એક અધિકારીને નવી વેબસાઇટ વિકસાવવા માટે એક મહિનાની સમયમર્યાદા આપી હતી. તે એક મહિનાની સમયમર્યાદા આવતીકાલે 15 જુલાઈના સમાપ્ત થઈ રહી છે.

ગયા મહિને રેલ્વે મંત્રી અશ્વિની વૈષ્ણવે વિદ્યાર્થીઓ સાથે વાત કરતા કહ્યું હતું કે નવી IRCTC વેબસાઇટ 15 જુલાઈના લોન્ચ કરવામાં આવશે. પરંતુ હવે એવું લાગે છે કે આવું થશે નહીં. અહેવાલો અનુસાર નવી વેબસાઇટની લોન્ચ તારીખ લંબાવવામાં આવી છે. તકનીકી તૈયારીઓને અંતિમ સ્વરૂપ આપવામાં અપેક્ષા કરતાં વધુ સમય લાગ્યો. સૂત્રો અનુસાર નવી વેબસાઇટ માટે હવે ત્રણથી ચાર અઠવાડિયા રાહ જોવી પડશે. જો બધી તૈયારીઓ સમયસર પૂર્ણ થાય તો અપડેટેડ IRCTC વેબસાઇટ ઓગસ્ટના પહેલા કે બીજા અઠવાડિયામાં લોન્ચ થઈ શકે છે.

લોકોની ફરિયાદો શું છે?

IRCTC વેબસાઇટ વિશે લોકોની અસંખ્ય ફરિયાદો છે. ઉદાહરણ તરીકે સાઇટ ખૂબ ધીમે ચાલે છે, વેઇટિંગ લિસ્ટ ખૂબ ધીમેથી ક્લિયર થાય છે, ટિકિટ સ્ટેટસ ઝડપથી અપડેટ થતા નથી. આ સિવાય પેમેંટ ફેલિયર, પૈસા કપાઇ જવા પણ ટિકિટ બુક ન થવી, જેવી સમસ્યાઓ ઘણા લોકોએ સોશિયલ મીડિયા દ્વારા ઉજાગર કરી છે. ઘણા વપરાશકર્તાઓ એમ પણ કહે છે કે ટિકિટ બુક કરતી વખતે અથવા ચુકવણી કરતી વખતે OTP ખૂબ મોડા આવે છે.

આ પણ વાંચોઃ આદેશ / સાવકી બહેનોનો પણ પિતાની મિલકતમાં...! હાઇકોર્ટનો સૌથી મોટો ચુકાદો

શું રેલવેએ સુધારવા માટે કંઈ કર્યું છે?

રેલવે સમયાંતરે વેબસાઇટ સુધારવાનો દાવો કરે છે. તાજેતરમાં IRCTC એ સર્વર ક્ષમતા વધારવા, એઆઇ આધારિત કેપ્ચા લાગુ કરવા, યુપીઆઇ ઓટો-રિફંડ સિસ્ટમ શરૂ કરવા, તત્કાલ બુકિંગ સમયને સમાયોજિત કરવા અને કેન્દ્રિયકૃત ફરિયાદ પોર્ટલ બનાવવા જેવા પગલાં લીધા છે. આનાથી ચુકવણી નિષ્ફળતાઓ, OTP સમસ્યાઓ અને ફરિયાદોને હેન્ડલ કરવામાં થોડો સુધારો થયો છે. વધુમાં રેલવેએ બધી ટ્રેન સંબંધિત સેવાઓ માટે એક નવી એપ રેલ વન લોન્ચ કરી છે. જોકે તત્કાલ અને પીક અવર્સ દરમિયાન હજુ પણ સ્લોડાઉન અને વેઇટલિસ્ટ ટિકિટ ક્લિયરન્સની સમસ્યા જોવા મળે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ