નેશનલ / પત્નીને માનસિક બીમાર ગણાવી પતિએ માંગ્યા છૂટાછેડા, હાઈકોર્ટે કહ્યું, લગ્ન એટલે મુશ્કેલ સમયમાં એકબીજાનો સાથ નિભાવવો!

ઝારખંડ હાઈકોર્ટે પત્ની પર માનસિક બીમારી અને ક્રૂરતાનો આરોપ લગાવીને છૂટાછેડા માંગતી પતિની અરજીને ફગાવી દીધી છે. અદાલતે મહત્વપૂર્ણ ટિપ્પણી કરતા જણાવ્યું છે કે લગ્નનો અર્થ માત્ર સારા દિવસોમાં સાથ નિભાવવાનો નથી, પરંતુ સુખ હોય કે દુઃખ, દરેક પરિસ્થિતિમાં એકબીજાનો હાથ પકડીને સાથે રહેવાનું છે. હાઈકોર્ટે સ્પષ્ટ કર્યું કે ભારતીય સમાજમાં લગ્નનું એક વિશિષ્ટ અને પવિત્ર સ્થાન છે, અને જીવનમાં આવતી મુશ્કેલીઓ કે સ્વાસ્થ્ય સંબંધિત સમસ્યાઓનો આશરો લઈને પોતાના જીવનસાથીનો સાથ છોડી દેવો કાયદો અને ન્યાયની દ્રષ્ટિએ યોગ્ય નથી.

આ સુનાવણી હાઈકોર્ટના જસ્ટિસ સુજીત નારાયણ પ્રસાદ અને જસ્ટિસ પ્રદીપ કુમાર શ્રીવાસ્તવની ડિવિઝન બેંચ સમક્ષ થઈ હતી. પતિએ ચતરા ફેમિલી કોર્ટના 7 સપ્ટેમ્બર 2024 ના આદેશને હાઈકોર્ટમાં પડકાર્યો હતો. પતિએ હિન્દુ વિવાહ અધિનિયમ, 1955 ની ધારા 13(1)(ia) અને 13(1)(iii) હેઠળ છૂટાછેડાની માંગણી કરી હતી, જેને હાઈકોર્ટે પૂરતા પુરાવાના અભાવે રદ્દ કરી દીધી છે. આ સાથે ઝારખંડ હાઈકોર્ટે નીચલી કોર્ટના જૂના ચુકાદાને સંપૂર્ણપણે યથાવત રાખ્યો છે.

ઘટનાની વિગતો મુજબ, ચતરાના આ દંપતીના લગ્ન 31 જાન્યુઆરી 2016 ના રોજ થયા હતા અને તેમને એક પુત્ર પણ છે. પતિ સેન્ટ્રલ ઇન્ડસ્ટ્રીઝ સિક્યોરિટી ફોર્સ (CISF) માં ફરજ બજાવતો હતો અને તેનું પોસ્ટિંગ રાજસ્થાનના કોટામાં હતું. પતિએ આરોપ મૂક્યો હતો કે લગ્નની શરૂઆતથી જ તેની પત્નીનું વર્તન અસામાન્ય અને આક્રમક રહેતું હતું. તેનો દાવો હતો કે પત્ની વગર કારણ હસતી હતી, પોતાની મેળે જ વાતો કરતી હતી અને સગા-સંબંધીઓની સામે પણ અસ્વાસ્થ્ય સ્થિતિ પેદા કરતી હતી. પતિનો એવો પણ આક્ષેપ હતો કે લગ્ન પહેલાં પત્નીની માનસિક સ્થિતિ સાથે જોડાયેલી વાતો તેનાથી છુપાવવામાં આવી હતી. બીજી બાજુ, પત્નીએ આ તમામ આરોપોને સદંતર ફગાવી દીધા હતા અને ઉલટાનું પતિ પર દહેજ તરીકે 5 લાખ રૂપિયાની માંગણી કરીને પ્રતાડિત કરવાનો આરોપ લગાવ્યો હતો. પ્રાપ્ત માહિતી અનુસાર, પત્ની વર્ષ 2021 થી પોતાના પિયરમાં જ રહે છે.

સુનાવણી દરમિયાન હાઈકોર્ટે નોંધ્યું હતું કે પતિ કે તેનો કોઈ પણ સાક્ષી એ વાત સાબિત કરી શક્યો નથી કે પત્નીએ ક્યારેય કોઈ શારીરિક હિંસા કરી હોય કે કોઈ પ્રકારની અપશબ્દો બોલ્યા હોય. કોર્ટે એ બાબતની પણ નોંધ લીધા કે પતિનો પરિવાર લગ્ન પહેલાંથી જ યુવતીને ઓળખતો હતો, તેથી એવો દાવો કરવો તદ્દન ખોટો છે કે કોઈ હકીકત છુપાવવામાં આવી હતી.

પતિએ એક મનોવૈજ્ઞાનિક અહેવાલનો હવાલો આપીને પત્નીને સ્કિઝોફ્રેનિયાથી પીડિત હોવાનું જણાવ્યું હતું. જો કે, હાઈકોર્ટે સ્પષ્ટ કર્યું કે તે અહેવાલમાં ન તો બીમારીની પુષ્ટિ હતી અને ન તો તેને અસાધ્ય કે લાલાજ દર્શાવવામાં આવી હતી. તેનાથી વિપરીત, રાંચી સ્થિત મેડિકલ સંસ્થાના મેડિકલ બોર્ડે બંને પક્ષોની ઉપસ્થિતિમાં પત્નીની તપાસ કરી હતી અને સ્પષ્ટ કર્યું હતું કે તેનામાં માનસિક બીમારીનું કોઈ પણ લક્ષણ હાજર નથી. અદાલતે એ પણ અવલોકન કર્યું કે સુનાવણી દરમિયાન પત્નીએ તમામ પ્રશ્નોના ખૂબ જ સામાન્ય અને સચોટ ઉત્તરો આપ્યા હતા. તે પોતાના પુત્રની ઉત્તમ દેખભાળ કરી રહી છે અને તેણે પોતાના પતિ સાથે ફરીથી સંસાર વસાવવાની ઈચ્છા પણ વ્યક્ત કરી છે. આનાથી વિપરીત, પતિએ એ વાત સ્વીકારી હતી કે તેણે પત્ની અને બાળકના ભરણપોષણ માટે કોઈ આર્થિક સહાય પૂરી પાડી ન હતી.

આ પણ વાંચોઃ સરકારની નવી ગાઈડલાઈન જારી, પેન્શનને લઇ કેન્દ્રીય કર્મચારીઓ માટે આવી મોટી અપડેટ!

કેસની સુનાવણી કરતી વખતે ડિવિઝન બેંચે સર્વોચ્ચ અદાલતના અનેક મહત્વપૂર્ણ ચુકાદાઓનો ઉલ્લેખ કર્યો હતો. અદાલતે જણાવ્યું કે દાંપત્ય જીવનમાં ચઢાવ-ઉતાર આવતા રહે છે. ઘણી વખત ગંભીર બિમારીઓ અને મુશ્કેલ પરિસ્થિતિઓ પણ સામે આવી જતી હોય છે, પરંતુ પતિ-પત્નીએ મળીને તે પડકારોનો સામનો કરવો જોઈએ. માત્ર કેટલાક અસામાન્ય વર્તન અથવા નક્કર પુરાવા વિના મૂકવામાં આવેલા આરોપોના આધારે લગ્નના પવિત્ર સંબંધને તોડી શકાય નહીં. આ કેસમાં પતિ તરફથી એડવોકેટ જ્યોતિ નયને પક્ષ રજૂ કર્યો હતો. તમામ દલીલો અને પુરાવાઓની ઝીણવટભરી તપાસ કર્યા બાદ હાઈકોર્ટે એવું તારણ કાઢ્યું કે પતિ પોતાની પત્ની વિરુદ્ધ ન તો ક્રૂરતાના આરોપો સાબિત કરી શક્યો અને ન તો કાયદાકીય રીતે માન્ય એવી કોઈ માનસિક બીમારીના પુરાવા આપી શક્યો જે છૂટાછેડાનો આધાર બની શકે. આ સાથે હાઈકોર્ટે નીચલી કોર્ટના આદેશને યોગ્ય ઠેરવતા પતિની અપીલ ફગાવી દીધી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ