સુવિધા / દેશનો પ્રથમ મ્યૂઝીકલ કોસ્ટલ રોડ, જ્યાં વાહનચાલકોને સંભળાશે 'સ્લમડોગ મિલિયોનેર'નું સોંગ

Nariman Point to Worli Musical Road: ભારતના પહેલા મ્યુઝિકલ રોડનું ઉદ્ઘાટન બુધવારે મુખ્યમંત્રી દેવેન્દ્ર ફડણવીસ કરશે. મુંબઈ કોસ્ટલ રોડ પર નરીમન પોઇન્ટથી વર્લી તરફ જતાં વાહન ચાલકોને રસ્તા પર ખાસ કરીને લગાવવામાં આવેલી મ્યુઝિકલ સ્ટ્રીપ્સને કારણે એક અનોખો ડ્રાઇવિંગ અનુભવ મળશે. આવા રસ્તાઓ હાલમાં જાપાન અને દુબઈ જેવા દેશોમાં છે. ભારતમાં મુંબઈ એવું પહેલું શહેર છે કે જ્યાં મ્યુઝિકલ રોડ બનાવવામાં આવ્યો છે.

મ્યુઝિકલ રોડવાળો વિશ્વનો પાંચમો દેશ

ટ્રાફિક-મુક્ત, ઝડપી અને આરામદાયક મુસાફરીનો પર્યાય બની ચૂકેલા મુંબઈ કોસ્ટલ રોડ પર એક ખાસ ટેકનોલોજીકલ મ્યુઝિક લેન બનાવવામાં આવી છે. જ્યારે વાહન આ મ્યુઝિકલ લેન પરથી પસાર થશે, તો તેમને ફિલ્મ સ્લમડોગ મિલિયોનેરનું ગીત સાંભળશે. આ વિશ્વનો પાંચમો અને ભારતમાં આવો પહેલો પ્રયોગ છે. આ એન્જિનિયરિંગ નવીનતા 2007માં જાપાનમાં શરૂ થઈ હતી, જ્યારે એન્જિનિયર શિઝુઓ શિનોડાએ બુલડોઝરથી રસ્તા પર કામ કરતાં સમયે આ ધ્વનિ અસર શોધી કાઢી હતી.

મુંબઈ કોસ્ટલ રોડ પર કેવી રીતે ચાલશે મ્યુઝિક

એક વરિષ્ઠ નગર અધિકારીએ જણાવ્યું કે રસ્તા પર ચોક્કસ અંતરાલે ખાંચા અથવા પટ્ટાઓ બનાવવામાં આવે છે, અને જ્યારે વાહનો ચોક્કસ સ્પીડથી તેમના પરથી પસાર થાય છે, ત્યારે ટાયરના ઘર્ષણથી એક ખાસ ધૂન જેવા ધ્વનિ તરંગો ઉત્પન્ન થાય છે. પાછળથી આ ખ્યાલ મેલોડી રોડ તરીકે જાણીતો બન્યો, અને આ પ્રકારના પ્રયોગો હંગેરી, જાપાન, દક્ષિણ કોરિયા અને સંયુક્ત આરબ અમીરાતમાં પણ કરવામાં આવ્યા.

ભારતમાં આ પ્રકારનું આ પ્રથમ ઇન્સ્ટોલેશન હશે, જેમાં ઓસ્કાર વિજેતા ફિલ્મ સ્લમડોગ મિલિયોનેરના ટ્યુનનો ઉપયોગ કરવામાં આવ્યો છે. વરિષ્ઠ અધિકારીએ જણાવ્યું કે જય હો ધૂન રાષ્ટ્રને સમર્પિત કરવા માટે પસંદ કરવામાં આવી છે અને સાથે જ લોકોમાં દેશભક્તિની ભાવના પણ જગાડે છે. BMCએ જીએસટી સહિત 6.21 કરોડ રૂપિયાના ખર્ચે આ રોડ બનાવ્યો છે.

બંધ કારની અંદર પણ સંભળાશે મ્યુઝિક

આ પ્રોજેક્ટ પૂર્ણ કરવા માટે એક હંગેરિયન કંપનીની નિમણૂક કરવામાં આવી. કંપનીએ નરીમન પોઇન્ટથી વર્લી તરફ જનાર ઉત્તર તરફના માર્ગ પર ડિવાઈડરની બાજુમાં પહેલી લેનથી લગભગ 500 મીટર આગળ મ્યુઝિકના પટ્ટાઓ લગાવ્યા છે. જ્યારે વાહનચાલકો 70 થી 80 કિમી પ્રતિ કલાકની ઝડપે વર્લી તરફ જતી ભૂગર્ભ ટનલમાંથી બહાર નીકળશે, ત્યારે તેઓને તેમના વાહનોમાં જ મ્યુઝિક સ્પષ્ટ સંભળાશે.

આ પણ વાંચો: "ભારત પાકિસ્તાનની બરાબર નહીં, આપણે ટ્રમ્પ સાથે ડિલ કરત તો..." રાહુલ ગાંધીના લોકસભામાં સરકાર પર આકરા પ્રહાર

મેલોડી રોડ પણ કહેવાય છે

મ્યુનિસિપલ કોર્પોરેશને ટનલની અંદર વાહન ચલાવતી વખતે ચાલકોને 'મ્યુઝિકલ રોડ' વિશે સૂચિત કરવા માટે આ વિભાગથી 500, 100 અને 60 મીટર આગળ સાઇનબોર્ડ લગાવ્યા છે. મ્યુનિસિપલ કોર્પોરેશનના અધિકારીએ જણાવ્યું કે આ પહેલ આધુનિક એન્જિનિયરિંગ અને સાંસ્કૃતિક અભિવ્યક્તિનું મિશ્રણ રજૂ કરે છે. આવા રસ્તાને મેલોડી રોડ પણ કહેવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ