સુરત / 'રોડને રેસિંગ ટ્રેક ન બનાવો', રક્ષાબંધન પર ગૃહ રાજ્યમંત્રી હર્ષ સંઘવીની બેફામ વાહન ચાલકોને મીઠી ટકોર

• રક્ષાબંધન પર્વ પર ગૃહ રાજ્યમંત્રી હર્ષ સંઘવીએ બેફામ વાહન ચાલકોને ટકોર
• સુરત ખાતે કાર્યક્રમમાં હર્ષ સંઘવીએ આપ્યું નિવેદન
• રાજ્યના રસ્તાઓને રેસિંગ ટ્રેક ન બનાવશો : હર્ષ સંઘવી

રાજ્યમાં બેફામ બનેલા વાહનચાલકોના પાપે છાશવારે અકસ્માતની ઘટનાઓ સામે આવતી હોય છે. જેમાં અમદાવાદ તથ્યકાંડની ઘટના હજુ તાજી જ છે. વધતા અકસ્માતને અટકાવવા સરકાર પણ ચિંતિત છે. આવી સ્થિતિ વચ્ચે રાજે રક્ષાબંધનના પાવન પર્વ નિમિત્તે ગૃહ રાજ્યમંત્રી હર્ષ સંઘવીએ બેફામ બનેલા વાહનચાલકોને ટકોર કરી હતી.

તમારી બહેન પણ ઘરે તમારી રાહ જોઈ રહી છે: હર્ષ સંઘવી

સુરત ખાતે રક્ષાબંધન નિમિતે એક કાર્યક્રમમાં હર્ષ સંઘવીએ હાજરી આપી હતી. આ વેળાએ તેમણે નિવેદન આપતા કહ્યું હતું કે રાજ્યના રસ્તાઓને રેસિંગ ટ્રેક ન બનાવશો. તમને બાઇક મળી છે તો જવાબદારી પૂર્વક ચલાવો. હર્ષ સંઘવીએ અપીલ કરતા રાજ્યના નાગરિકોને કહ્યું હતું કે તમારી બહેનો, તમારી માતા ઘરે તમારી રાહ જોતી હોય છે અને તે સમજીને જવાબદારીપૂર્વક ગાડી ચલાવવી જોઈએ. તેઓએ કહ્યું કે માત્ર તમારી જ નહીં પરંતુ રાહદારીઓની પણ સલામતી સાથે વાહન ચલાવવાનો આજે આપણે સૌ લોકો સંકલ્પ કરીએ. આથી સમાજમાં પણ એક સારો સંદેશ પ્રસરશે. તેમ અંતમાં કહ્યું હતું.