વડનગર / ઠાકોર સમાજની સરાહનીય પહેલ: કુરિવાજો પર પ્રતિબંધ મૂકવાનું એલાન, આ પ્રથાઓ બંધ કરવાનું સર્વાનુમતે એલાન

• વડનગર બારપરા ક્ષત્રિય ઠાકોર સમાજની પહેલ
• સમાજમાં ચાલતા કુરિવાજો ઉપર પ્રતિબંધ મુકાયો
• લગ્ન પ્રસંગમાં ડીજે વગાડવા ઉપર પ્રતિબંધ ફરમાવ્યો

રાજ્યમાં વિવિધ સમાજો દ્વારા સમાજમાં ચાલતા કુરિવાજો અને વિવિધ સામાજિક વ્યવહારો બંધ કરાવા માટે અભિયાન છેડાયું છે. ત્યારે મહેસાણા જિલ્લાના વડનગર વિસ્તારમાં વસવાટ કરતા વડનગર બારપરા ક્ષત્રિય ઠાકોર સમાજે કુરિવાજોને લઈ કેટલાક મહત્વના નિર્ણયો લીધા છે. 

ડીજે વગાડવાની પ્રથા પર પ્રતિબંધ
વડનગર બારપરા ક્ષત્રિય ઠાકોર સમાજમાં લગ્ન જેવા શુભ પ્રસંગોએ ડીજે વગાડવાની પ્રથા ચાલે છે. જેનાથી આર્થિક ભારણ વધે છે, જેને લઈ ડીજે વગાડવાના કુરિવાજ ઉપર પ્રતિબંધ મુકવામાં આવ્યો છે. સાથો સાથ બારપરા ક્ષત્રિય ઠાકોર સમાજમાં લગ્ન જેવા સામાજિક પ્રસંગોએ જુગાર જેવી બંદીને ડામવા પણ પ્રતિબંધ મુકવામાં આવ્યો છે. 

કુરિવાજોને તિલાજંલી
વડનગર બારપરા ક્ષત્રિય ઠાકોર સમાજે વિવિધ કુરિવાજોને તિલાજંલી આપી છે. જેમ કે, મરણ પ્રસંગોમાં ચાલતા વિવિધ વ્યવહારો અને કુરિવાજ પ્રથા ઉપર પણ સંપૂર્ણ પ્રતિબંધ મૂક્યો છે. સમાજમાં શિક્ષણનું સ્તર ઉંચુ લાવવા માટે પણ કેટલાક મહત્વપૂર્ણ નિર્ણયો લેવાયા છે. સમાજના વિદ્યાર્થીઓને શિક્ષણની સગવડો મળી રહે તે દિશામાં પ્રયત્નો કરવા પણ સમાજ આગેવાનોએ હાંકલ કરી છે. 

'દેખા દેખીમાં થતાં ખર્ચા અટકી જશે'
સમાજના યુવાનોએ જણાવ્યું હતું કે, વડનગર બારપરા ક્ષત્રિય ઠાકોર સમાજમાં 80 ગામોનું સમાવેશ થયેલું છે. સમાજમાં વધારે પડતા થતાં ખર્ચાઓને લઈ આ નિર્ણયો લેવાયા છે, આ નર્ણયથી સમાજના લોકોને ઘણા ફાયદાઓ થશે, તેમજ જે દેખા દેખીમાં થતાં ખર્ચા અટકી જશે. વધુમાં કહ્યું કે, દેખા દેખીના કારણે કેટલાક લોકોને જમીન પણ વેચવી પડતી હોય છે.