દર્દનાક / પાલતૂ Pitbull શ્વાને દોઢ કલાક સુધી બચકાં ભરી-ભરીને આખું માંસ અલગ કરી નાંખ્યું, પડોશીઓએ કર્યો મોટો ખુલાસો

• પિટબુલ પ્રજાતિના શ્વાને પોતાની માલકિન પર કર્યો હુમલો
• આશરે દોઢ કલાક સુધી બચકા ભરીને આખુ માંસ અલગ કર્યુ
• પાડોશીઓએ વર્ણવી દર્દનાક કહાની

શ્વાને પોતાની માલકિનને ભર્યા બચકા

બંગાળી કોલોનીમાં સેવાનિવૃત્ત શિક્ષિકા સુશીલા ત્રિપાઠીને તેના પાલતુ શ્વાને આશરે દોઢ કલાક સુધી બચકા ભરી-ભરીને આખુ માંસ અલગ કરી નાખ્યું. પિટબુલે માંસના લોચા લોચા નિકાળી લીધા. મુખ્ય ગેટનો દરવાજો અંદરથી બંધ હોવાના કારણે સુશીલાની મદદ કરવા માટે પાડોશી પણ જઇ શક્યા નહીં. જેનો બધાને અફસોસ છે. આ કહેવુ છે શેરીમાં રહેતી મુન્ની અને અન્ય લોકોનુ. 

શ્વાને બચકા ભરીભરીને માલકિનને મોતને ઘાટ ઉતારી

ઘટનાથી શેરીના બાળકો અને મોટા પણ દહેશતમાં છે. બુધવારના દિવસે આખી શેરીમાં સન્નાટો પ્રસર્યો. આજુબાજુમાં રહેતા લોકો બાળકો રમવા માટે પણ બહાર નિકળ્યાં નથી. મુન્ની અને તેના પાડોશીઓએ જણાવ્યું કે મંગળવારે સુશીલા ઘરની બહાર તડકામાં ઉભી હતી. આ દરમ્યાન લગભગ પોણા પાંચ વાગ્યે સુશીલાનો દીકરો અમિત જીમ જવા માટે નિકળ્યો. ત્યારબાદ સુશીલાના ઘરમાંથી મોટી બૂમો સંભળાવા લાગી. આજુબાજુના સ્થાનિકો દોડ્યા તો ખબર પડી કે મકાન અંદરથી બંધ છે. પિટબુલ સુશીલાને બચકા ભરી-ભરીને તેના પર હુમલો કરી રહ્યો હતો અને તે ચીસો પાડતી હતી. બધા અસહાય હતા. મુન્ની ભાગીને અમિતના મિત્રના ઘરે પહોંચી. તે ઊંઘી રહ્યો હતો. થોડા સમય સુધી તેનો દરવાજો ખખડાવ્યો. ત્યારબાદ તે નિકળ્યો અને તેને જાણકારી આપી. તેણે અમિતને ફોન કર્યો. 

પુત્ર આવીને માતાને હોસ્પિટલ લઇ ગયો

અમિતનો ફોન રિસીવ નહોતો થતો. ત્યારબાદ તે જિમ પહોંચ્યો. જિમમાંથી લગભગ પોણા સાત વાગ્યે અમિત આવ્યો. તેણે ગેટ ખોલ્યો. પિટબુલને ગમે તે રીતે શાંત કરાવ્યો. રૂમમાં સુશીલાના માંસના લોચે લોચા પડ્યા હતા. તેને ઉઠાવ્યાં પછી સુશીલાને ચાદરમાં લપેટીને હોસ્પિટલ લઇ ગયો. જેણે આ કરૂણ દ્રશ્યો જોયા તેના રૂંવાડા ઉભા થયા હતા.