કામની વાત / આ રીતે ઘરે બેઠાં બનાવો તમારું આયુષ્માન કાર્ડ, જાણો ઓનલાઇન પ્રોસેસ

આરોગ્ય દરેક વ્યક્તિના જીવનનો ખુબ જ અગત્યનો ભાગ હોય છે. સ્વાસ્થ્ય સારું રહે તે માટે લોકો કેટકેટલા ઉપાયો કરે છે. ઘણા લોકો પોતાના મનગમતો ખોરાક પણ ખાવાનું બંધ કરે છે કે જેથી તંદુરસ્તી જળવાય રહે. છતાંય ઘણીવાર કેટલીક બીમારીઓ અચાનક આવી જાય છે અને એના ઈલાજ પાછળ ઘણો ખર્ચ થઇ જાય છે.

એવી સ્થિતિથી બચવા માટે ઘણાં લોકો પહેલાથી જ હેલ્થ ઈન્શ્યોરન્સ લઇ લે છે. પણ દરેક પાસે એટલા પૈસા હોતા નથી કે પોતે ઈન્શ્યોરન્સ લઇ શકે. આવાં જરૂરિયાતમંદ લોકો માટે સરકાર તરફથી હેલ્થ ઈન્શ્યોરન્સ આપવામાં આવે છે. સરકાર દ્વારા આવી સ્થિતિમાં “પ્રધાનમંત્રિ આયુષ્માન ભારત યોજના” ચલાવવામાં આવે છે. આમ તમે પણ ઘરે બેઠાં પોતાનું આયુષ્માન કાર્ડ બનાવી શકો છો.

સૌપ્રથમ પાત્રતા તપાસો

આયુષ્માન કાર્ડ પર સરકાર દ્વારા રૂ. 5 લાખ સુધીના મફત ઇલાજની સુવિધા આપવામાં આવે છે. કાર્ડ બનાવવા માટે ભારત સરકાર દ્વારા કેટલાક પાત્રતા માપદંડ નક્કી કરાયેલા છે. જે લોકો આ પાત્રતા પર ખરા ઉતરે છે તેમનું જ આયુષ્માન કાર્ડ બનાવવામાં આવે છે. તમે પાત્ર છો કે નહીં, એ જાણવા માટે 14555 પર કોલ કરી શકો છો. અથવા તો આયુષ્માન એપ ડાઉનલોડ કરીને તમારી પાત્રતા ચેક કરી શકો છો.

આ રીતે ઑનલાઇન અરજી કરો

• આયુષ્માન કાર્ડ માટે ઑનલાઇન અરજી કરવા માટે, પહેલાં તેની ઓફિશિયલ વેબસાઇટ beneficiary.nha.gov.in પર જવું પડશે. ત્યારબાદ ત્યાં લોગિન કરવું પડશે. તમારો મોબાઇલ નંબર દાખલ કરો અને વેરીફાય પર ક્લિક કરો. તમારા મોબાઇલ પર જે ઓટીપી (OTP) આવ્યો હોય, તે દાખલ કરો અને સાથે કેપ્ચા કોડ દાખલ કરીને લોગિન પર ક્લિક કરો.
• લોગિન થયા પછી એક “બેનિફિશિયરી પોર્ટલ” ખૂલે છે જેમાં તમારે સ્કીમનું નામ, રાજ્ય, સ્કીમનો પ્રકાર, જિલ્લા વગેરે પસંદ કર્યા પછી “સર્ચ બાય”માં “આધાર” સિલેક્ટ કરીને તમારો આધાર નંબર દાખલ કરવો પડે છે અને પછી “સર્ચ” પર ક્લિક કરવું પડે છે.
• આ પછી તમારી સ્ક્રીન પર આયુષ્માન કાર્ડની યાદી ખુલશે, જેમાં તમે તમારું તથા તમારા પરિવારના કોઈ પણ સભ્યનું નામ જોઈ શકો છો. હવે નામના સામે “એક્શન” વિકલ્પ પર ક્લિક કરો. જો તમારું આયુષ્માન કાર્ડ બનાવવું હોય તો તમારું નામ પસંદ કરો. ત્યારબાદ આધાર ઓટીપીની મદદથી ઈ-કેવાયસી (e-KYC) કરો.

• આ પછી તમારી સામે એક “મેચિંગ સ્કોર” ખુલશે. જો આ સ્કોર 80%થી વધુ હોય તો તમારું આયુષ્માન કાર્ડ આપમેળે મંજૂર થઇ ગયું છે. હવે “કૅપ્ચર ફોટો”ના વિકલ્પ પર ક્લિક કરીને તમારો ફોટો અપલોડ કરો. ત્યારબાદ તમારું નવું ફોર્મ ખુલશે જેમાં તમારે તમારી સંપૂર્ણ માહિતી દાખલ કરવી પડશે. પછી “સબમિટ” પર ક્લિક કરો.

વધુ વાંચો: જાણો નિયત તારીખ સુધીમાં IT રિટર્ન ફાઇલ ન કરવાના ગેરફાયદા, સમજી લેશો તો ફાયદામાં રહેશો

આ રીતે તમારી આયુષ્માન કાર્ડની ઑનલાઇન અરજી પ્રક્રિયા પૂર્ણ થશે. ત્યારબાદ તમે પોર્ટલ પર ફરી લોગિન કરીને તમારું આયુષ્માન કાર્ડ ડાઉનલોડ પણ કરી શકો છો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ