આફતરૂપી વાવાઝોડું / બિપોરજોય: હવે રાત્રે 9 વાગ્યા પછી લેન્ડફોલની આગાહી, લોકોને જીવનજરૂરી વસ્તુઓનો સંગ્રહ-મોબાઈલની બેટરી ચાર્જ રાખવા અપીલ

 

• ગુજરાત પર બિપોરજોય વાવાઝોડાનું સંકટ
• વિધાનસભા અધ્યક્ષ શંકર ચૌધરીની લોકોને અપીલ
• વાવાઝોડા સમયે લોકો ઘરોની અંદર રહોઃ શંકર ચૌધરી
• લોકોએ અફવાઓમાં ધ્યાન ન આપવુંઃ ગેનીબેન ઠાકોર

ગુજરાતની માથે વાવાઝોડાનો ખતરો મંડરાઈ રહ્યો છે. વાવાઝોડું સતત ગુજરાતની તરફ આગળ વધી રહ્યું છે. IMD દ્વારા જણાવ્યા અનુસાર, બિપોરજોય ગુજરાતની નજીક પહોંચી ગયું છે. વાવાઝોડું કચ્છથી વધુ નજીક પહોંચ્યું છે. બિપોરજોય વાવાઝોડું જખૌથી માત્ર 170 કિમી દૂર છે. જ્યારે દ્વારકાથી 210 કિમી, નલિયાથી 210 કિમી, પોરબંદરથી 290 કિમી, કરાંચીથી 270 કિમી દૂર છે. 

Cyclone Warning for Saurashtra and Kutch Coasts: RED MESSAGE. VSCS BIPARJOY at 0830IST today near lat 22.6N & long 67.1E, about 170km WSW of Jakhau Port (Gujarat) and 210km West of Devbhumi Dwarka. To cross near Jakhau Port (Gujarat) by evening of today as VSCS. pic.twitter.com/iESz82jRRW

— India Meteorological Department (@Indiametdept) June 15, 2023

શંકર ચૌધરીએ જનતાને અપીલ
સતત આગળ વધી રહેલા બિપોરજોય વાવાઝોડાના સંકટ વચ્ચે ગુજરાત વિધાનસભાના અધ્યક્ષ શંકર ચૌધરીએ જનતાને અપીલ કરી છે. શંકર ચૌધરીએ જણાવ્યું છે કે, આપણે સાવધાની રાખવાની છે. વાવાઝોડાના સમયે લોકોએ ઘરોની અંદર જ રહેવું. વાવાઝોડું પસાર થઈ જાય ત્યાં સુધી ઘરની બહાર ન નીકળવું.

ખોટી અફવાઓથી દૂર રહેવુંઃ શંકર ચૌધરી
તેઓએ જનતાને અપીલ કરતા જણાવ્યું છે કે, દરેકે જીવન જરૂરી ચિજવસ્તુનો સંગ્રહ કરી લેવો અને મોબાઈલની બેટરી ફુલ રાખવી. સાથે જ ઘરમાં ટોર્ચની વ્યવસ્થા પણ કરી લેવી. તેઓ જણાવ્યું કે, પશુપાલકોએ પશુઓની ખાસ કાળજી રાખવી. અંતે તેઓએ જણાવ્યું કે, ગુજરાતના લોકોએ અફવાઓમાં ન દોરાવું નહીં અને ખોટી અફવા ફેલાવવી નહીં.  

ગેનીબેન ઠાકોરે પણ લોકોને સાવચેત રહેવાની કરી અપીલ
શંકર ચૌધરી ઉપરાંત વાવના કોંગ્રેસના ધારાસભ્ય ગેનીબેન ઠાકોરે પણ વાવાઝોડાને લઈને લોકોને અપીલ કરી છે. તેઓએ લોકોને પૂરતી તકેદારી રાખવા અને કોઈ અફવામાં ન આવવાની અપીલ કરી છે. ગેનીબેન ઠાકોરે જણાવ્યું છે કે, લોકોએ પ્રશાસન દ્વારા આપવામાં આવતી સૂચનાનું પાલન કરવું. દસ્તાવેજો અને કિંમતી વસ્તુઓને લોકો સુરક્ષિત જગ્યાએ રાખવા. પશુઓને સલામત અને યોગ્ય જગ્યાએ ખસેડી દેવા. આપતિ સમયે લોકો ગભરાયા વગર તંત્ર અથવા મારો સંપર્ક કરે. ગેનીબેન ઠાકોરે વીડિયો વાયરલ કરી પોતાનો નંબર આપી લોકોને સાવચેત રહેવાની અપીલ કરી છે. 

આજે રાત્રે વાવાઝોડું લેન્ડફોલ થશેઃ આલોક પાંડે
બિપોરજોય વાવાઝોડાના સંકટ અંગે રાહત કમિશનર આલોક પાંડેએ જણાવ્યું છે કે, આજે રાત્રે વાવાઝોડું લેન્ડફોલ થશે, વાવાઝોડું ટકરાશે ત્યારે પવન 115થી 125 કિમીની ઝડપે ફૂંકાશે. વાવાઝોડાના કારણે રાજ્યમાં ભારે વરસાદ થશે. વાવાઝોડાને લઈ પાટણ અને બનાસકાંઠાને સતર્ક રહેવા કહેવાયું છે. અત્યાર સુધી 95 હજાર લોકોનું સ્થળાંતર કરાયું છે. મુખ્યમંત્રી ભૂપેન્દ્ર પટેલ વાવાઝોડાની સમીક્ષા કરી રહ્યા છે. આજે પણ CMએ સમીક્ષા બેઠક યોજી છે.

કેન્દ્ર સરકાર સતત કરી રહી છે મોનીટરીંગ 
બિપોરજોય વાવાઝોડાને લઈને આ સમયે રાજ્યથી લઈને કેન્દ્ર સરકાર એલર્ટ મોડ પર છે. દેશના ગૃહમંત્રી, રક્ષા મંત્રી, ત્રણેય સેના પ્રમુખ, NDRF, SDRF, ગુજરાતના મુખ્યમંત્રી અને ડિઝાસ્ટર મેનેજમેન્ટ અને હવામાન વિભાગ સાથે સંકળાયેલા દરેક કર્મચારી, આ સમયે બધાની નજર માત્ર બિપોરજોય વાવાઝોડા પર છે.  

ગુજરાતમાંથી કુલ કેટલાં લોકોનું સ્થળાંતર કરાયું?
વાવાઝોડાના સંભવિત ખતરાને ધ્યાનમાં રાખી ગુજરાતમાં 95 હજારથી વધુ લોકોનું સ્થળાંતર કરાયું. જૂનાગઢમાંથી 4 હજાર 462 અને કચ્છમાંમાંથી 17 હજાર 739 લોકોનું સ્થળાંતર, જામનગરમાંથી 8 હજાર 542 અને પોરબંદરમાંથી 3 હજાર 469 લોકો, દેવભૂમિ દ્વારકામાંથી 4 હજાર 863 અને ગીર સોમનાથમંથી 1 હજાર 605 લોકોનું સ્થળાંતર, મોરબીમાંથી 1 હજાર 936 અને રાજકોટમાંથી 4 હજાર 497 લોકોનું સ્થળાંતર કરાયું છે. તમામ લોકોને સુરક્ષિત સ્થળે ખસેડવામાં આવ્યા છે.