સુરત / 14 વર્ષનો લખન સુરતના દરિયામાં તણાયો: 36 કલાક સુધી ઊંડા પાણીમાં મોત સામે ઝઝૂમતો રહ્યો, નવસારીના માછીમારોએ આ રીતે બચાવી લીધો જીવ

• શુક્રવારે દરિયામાં ડૂબ્યો હતો લખન
• 36 કલાક બાદ નવસારી નજીકથી જીવંત મળ્યો
• લખનને માછીમારોએ જોતાં બચાવી લેવાયો 

કહેવાય છે કે કુદરત સામે માણસ હંમેશા લાચાર હોય છે. જોકે કેટલાક લોકો એવા પણ હોય છે કે જીવવાની જીજીવિશામાં કુદરત સાથે પણ લડે છે અને જીતી જાય છે. આવો જ કિસ્સો સુરતમાંથી સામે આવ્યો છે. જ્યાં શુક્વારે દરિયામાં ગરક થઇ જનાર 14 વર્ષના કિશોરે 36 કલાક સુધી અફાટ દરિયા સામે ઝઝૂમી પોતાનો જીવ બચાવ્યો છે. સુરતના દરિયામાં ડૂબેલો કિશોર નવસારીથી સુરક્ષિત મળી આવ્યો છે. 

36 કલાક સુધી પાણીમાં તરતો રહ્યો
નવસારી એસ.પી સુશીલ અગ્રવાલે આ ઘટના વિશે જણાવ્યું કે, શુક્રવારે દાદી સાથે ડુમસ બીચ પર ગયેલો 14 વર્ષનો લખન દરિયાના ઉંડા પાણીમાં ગરક થયો હતો. જોકે, લખન ડરવાને બદલે દરિયા સામે બાથ ભીડી પાણીમાં તરતો રહ્યો. જેના થોડા સમય બાદ દરિયામાં લાકડાની પાટ મળતાં તે પાટ પર બેસી ગયો હતો. સુરતમાં ડૂબેલો લખન સતત 36 કલાક સુધી દરિયામાં પાણી અને ભોજન વિના તરતો રહ્યો હતો. જે બાદ ડૂમસથી 60 કિમી દૂર નવસારીના ધોલાઇ બંદર પાસે જોવા મળ્યો હતો.

દરિયાના પાણીમાં લાકડાના સહારે 36 કલાક સુધી મોત સામે લડતો રહ્યો 14 વર્ષનો સુરતનો લખન, તણાઇને 60 કિમી દૂર પહોંચ્યો તો માછીમારોએ જીવ બચાવી લીધો#Surat #VTVGujarati #VTVCard pic.twitter.com/bmvUlz03oj

— VTV Gujarati News and Beyond (@VtvGujarati) October 1, 2023

માછીમારોની પડી નજર
તેઓએ જણાવ્યું કે, 36 કલાકમાં દરિયામાં લખન 22 નોટિકલ માઇલ દૂર નવસારી પહોચ્યો હતો. આ દરમિયાન માછીમારોની નજર પાણીમાં તેના પર પડતા તેઓ તાત્કાલિક બોટ તેની પાસે લઈને પહોંચ્યા અને તેને બચાવી લીધો હતો. માછીમારોએ લખનને તેમની બોટમાં બેસાડી પોલીસ પ્રશાસનનો સંપર્ક કર્યો હતો અને સવારે 5 વાગ્યે બોટમાં લખનને સલામત લઈને ધોલાઈ પહોંચ્યા હતા.

માતા-પિતા પણ ચોંકી ઉઠ્યા
ધોલાઈ પહોંચતા જ લખનને તાત્કાલિક પ્રાથમિક સારવાર આપવામાં આવી હતી. જે બાદ લખનને ધોલાઈથી નવસારીની ખાનગી હોસ્પિટલમાં સારવાર માટે લઈ જવાયો હતો. બીજી બાજુ લખનના માતા-પિતાએ પોતાના બાળકના ગુમ થવાની ફરિયાદ નોંધાવી હતી. લખનના દરિયામાં ડૂબી જવાની અને બચી જવાની કહાની સાંભળી તેઓ પણ ચોંકી ઉઠ્યા હતા. લખન 36 કલાક દરિયા સામે ઝઝુમી જીવતો મળતાં માતાપિતા ખુશખુશાલ થઈ ગયા હતા.