એલર્ટ / દેશમાં પાછો આવ્યો કોરોના, કેરળમાં નવો JN.1 વાયરસ મળતાં હડકંપ, જાણો લક્ષણો

• કેરળમાં JN.1નો કેસ નોંધાતા આરોગ્ય વિભાગ એલર્ટ
• 79 વર્ષીય મહિલા કોરોના-19 JN.1 સંક્રમિત 
• 'હાલમાં દેશમાં કોવિડ-19ના 90 ટકાથી વધુ કેસ ગંભીર નથી'

કેરળમાં કોવિડ-19નો JN.1નો કેસ નોંધાયા પછી કેન્દ્ર સરકારે કહ્યું કે તે પરિસ્થિતિ પર નજર રાખી રહી છે. તેમણે કહ્યું, ભારતીય SARS CoV-2 જીનોમિક્સ ઓર્ગેનાઈઝેશન દ્વારા નિયમિત દેખરેખના ભાગરૂપે કેરળમાં JN.1નો કેસ એટલે કે, કોરોના વાયરસનો સબવેરિયન્ટ મળી આવ્યો હતો. જાહેર આરોગ્ય અને હોસ્પિટલ સજ્જતાના પગલાંનું મૂલ્યાંકન કરવા માટે કેન્દ્રીય આરોગ્ય મંત્રાલયએ રાજ્યોમાં તમામ આરોગ્ય સુવિધાઓમાં મોક ડ્રીલ હાથ ધરવા કહ્યું છે. કહેવામાં આવ્યું છે કે કેન્દ્રીય આરોગ્ય મંત્રાલય રાજ્યના આરોગ્ય અધિકારીઓના સંપર્કમાં છે અને પરિસ્થિતિ પર નજર રાખી રહ્યું છે.

મહિલામાં ઈન્ફલ્યુએન્ઝા જેવી બીમારીના હળવા લક્ષણો હતા
સત્તાવાર સૂત્રોએ શનિવારે માહિતી આપી હતી કે કેરળમાં 8 ડિસેમ્બરે કોવિડ-19ના JN.1નો કેસ નોંધાયો છે. તેમણે કહ્યું કે, 18 નવેમ્બરે RT-PCR દ્વારા 79 વર્ષીય મહિલાના નમૂનાનું પરીક્ષણ કરવામાં આવ્યું હતું, જે સંક્રમિત જોવા મળી હતી. મહિલામાં ઈન્ફલ્યુએન્ઝા જેવી બીમારીના હળવા લક્ષણો હતા અને તે કોવિડ-19 માંથી સ્વસ્થ થઈ ગઈ છે. સૂત્રોએ જણાવ્યું કે, હાલમાં દેશમાં કોવિડ-19ના 90 ટકાથી વધુ કેસ ગંભીર નથી અને સંક્રમિત લોકો તેમના ઘરોમાં એકલતામાં જીવી રહ્યા છે. અગાઉ સિંગાપોરમાં એક ભારતીય પ્રવાસીમાં JN.1 ચેપ જોવા મળ્યો હતો. આ વ્યક્તિ તમિલનાડુના તિરુચિરાપલ્લી જિલ્લાનો વતની છે અને 25 ઓક્ટોબરે સિંગાપોર ગયો હતો.

JN.1 વેરિઅન્ટ
તિરુચિરાપલ્લી જિલ્લા અથવા તમિલનાડુના અન્ય સ્થળોએ JN.1ના ચેપના કેસ નોંધાયા હોવા છતાં કેસોમાં કોઈ વધારો થયો નથી. પાપ્ત માહિતી મુજબ ભારતમાં JN.1 વેરિઅન્ટનો અન્ય કોઈ કેસ નોંધાયો નથી. કોવિડ-19નું પેટા સ્વરૂપ, JN.1, સૌપ્રથમ લક્ઝમબર્ગમાં ઓળખવામાં આવ્યું હતું. ઘણા દેશોમાં ફેલાયેલ આ ચેપ પિરોલો ફોર્મથી સંબંધિત છે.