દિલ્હી / અરવિંદ કેજરીવાલ જેલમાં રહેશે કે રાહત મળશે? ધરપકડ સામેની અરજી પર દિલ્હી હાઈકોર્ટ આપશે ચુકાદો

Arvind Kejriwal News : દિલ્હીના મુખ્યમંત્રી અરવિંદ કેજરીવાલ જેલમાં જ રહેશે કે પછી તેમને રાહત મળશે? આ અંગે આજે નિર્ણય લેવામાં આવનાર છે. વાત જાણે એમ છે કે, દિલ્હી હાઈકોર્ટ આજે બપોરે 2.30 વાગ્યે દારૂ કૌભાંડ સંબંધિત મની લોન્ડરિંગ કેસમાં તેમની ધરપકડ વિરુદ્ધ કેજરીવાલની અરજી પર ચુકાદો આપશે. આ પહેલા હાઈકોર્ટે 3 એપ્રિલે પોતાનો નિર્ણય સુરક્ષિત રાખ્યો હતો. નોંધનીય છે કે, EDએ 21 માર્ચે કેજરીવાલની ધરપકડ કરી હતી.

અરવિંદ કેજરીવાલે 22 માર્ચે ટ્રાયલ કોર્ટ દ્વારા તેમની ધરપકડ અને રિમાન્ડ પસાર કરવાના આદેશને પડકાર્યો હતો. હાઈકોર્ટમાં દાખલ કરવામાં આવેલી અરજીમાં કેજરીવાલે તેમની ધરપકડ અને રિમાન્ડને ગેરકાયદેસર ગણાવ્યા હતા. આ કેસની સુનાવણી 3 એપ્રિલે થઈ હતી. બંને પક્ષો (ED અને કેજરીવાલ)ની દલીલો સાંભળ્યા બાદ જસ્ટિસ સ્વર્ણકાંત શર્માએ 3 એપ્રિલે પોતાનો નિર્ણય સુરક્ષિત રાખ્યો હતો.

આ તરફ છેલ્લી સુનાવણીમાં EDએ હાઇકોર્ટને જણાવ્યું હતું કે, કથિત એક્સાઇઝ પોલિસી કૌભાંડ સંબંધિત મની લોન્ડરિંગ કેસમાં ધરપકડ કરાયેલા મુખ્ય પ્રધાન અરવિંદ કેજરીવાલ આગામી ચૂંટણીઓના આધારે ધરપકડમાંથી 'મુક્તિ'નો દાવો કરી શકતા નથી કારણ કે કાયદો સમાન રીતે લાગુ થાય છે. દિલ્હી લિકર પોલિસી કૌભાંડ કેસમાં એન્ફોર્સમેન્ટ ડિરેક્ટોરેટે કેજરીવાલને સતત 9 વખત સમન્સ મોકલ્યા હતા પરંતુ તેઓ એક પણ વખત તપાસ એજન્સી સમક્ષ હાજર થયા ન હતા. આ પછી EDએ તેની ધરપકડ કરી હતી.

21 માર્ચે કેજરીવાલની કરાઇ હતી ધરપકડ
EDએ 21 માર્ચે કેજરીવાલની તેમના ઘરેથી ધરપકડ કરી હતી. તેને 22 માર્ચે કોર્ટમાં રજૂ કરવામાં આવ્યો હતો. આ પછી કોર્ટે તેમને 6 દિવસ માટે ED કસ્ટડીમાં મોકલી દીધા હતા. આ કેસની સુનાવણી 28 માર્ચે થઈ હતી. આ દિવસે EDએ કોર્ટને જણાવ્યું હતું કે, તેમની તપાસ હજુ પૂર્ણ થઈ નથી. આવી સ્થિતિમાં કેજરીવાલના રિમાન્ડ વધારવા જોઈએ. આ પછી કોર્ટે કેજરીવાલના રિમાન્ડ ચાર દિવસ માટે લંબાવ્યા હતા.

વધુ વાંચો: તરસેમ સિંહ હત્યાકાંડનો શાર્પશૂટર પોલીસ એન્કાઉન્ટરમાં ઠાર, બીજો આરોપી ફરાર

1 એપ્રિલથી તિહાર જેલમાં બંધ છે કેજરીવાલ
આ પછી 1 એપ્રિલના રોજ રાઉઝ એવન્યુ કોર્ટમાં કેસની સુનાવણી થઈ. EDએ કોર્ટ પાસેથી કેજરીવાલની ન્યાયિક કસ્ટડીની માંગ કરી હતી જેને કોર્ટે સ્વીકારી લીધી હતી અને દિલ્હીના મુખ્યમંત્રીને 15 દિવસની ન્યાયિક કસ્ટડીમાં મોકલી દીધા હતા. ત્યારથી કેજરીવાલ દિલ્હીની તિહાર જેલમાં બંધ છે. આ સાથે જ તેમની ધરપકડ સામેની અરજી પર આજે હાઈકોર્ટ પોતાનો ચુકાદો આપશે. આવી સ્થિતિમાં તમામની નજર કોર્ટના નિર્ણય પર છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો