નિવેદન / 'વૃક્ષોને કાપવા અને પર્વતો તોડવા પ્રકૃતિ વિરુદ્ધ'- જગતગુરુ શંકરાચાર્ય સ્વામી શ્રી સદાનંદ સરસ્વતી

સ્વામી શ્રી સદાનંદ સરસ્વતીએ કહ્યું કે પ્રકૃતિ માત્ર આસપાસનું પર્યાવરણ નથી, પરંતુ તે આપણા પ્રાણ સમાન છે. પ્રકૃતિનું અસ્તિત્વ જ માનવજીવનનું આધારસ્તંભ છે. જો મનુષ્ય પોતાના સ્વાર્થ માટે પ્રકૃતિ સાથે છેડછાડ કરશે, તો તે ઈશ્વરના નિયમોનો ભંગ ગણાશે અને આવું કરનારને ઈશ્વરના પ્રકોપનો સામનો કરવો પડશે.

તેમણે ભારપૂર્વક જણાવ્યું કે અરવલ્લી જેવી પર્વતમાળાઓ માત્ર પથ્થરોનો ઢગલો નથી, પરંતુ તે વરસાદ, પાણીના સ્ત્રોતો, હવા અને જૈવ વૈવિધ્યને સંતુલિત રાખવામાં મહત્વપૂર્ણ ભૂમિકા ભજવે છે. પર્વતો તોડવાથી માત્ર ભૂગોળ બદલાતો નથી, પરંતુ સમગ્ર પર્યાવરણ ચક્ર બગડે છે, જેની અસર ભવિષ્યની પેઢીઓ પર પડે છે.

સદાનંદ સરસ્વતીએ જણાવ્યું કે પ્રકૃતિથી જ આપણને જીવન માટે જરૂરી તત્વો મળે છે. પાણી, વાયુ અને અનાજ આ બધુ પ્રકૃતિની દેન છે. જો પ્રકૃતિને નુકસાન થશે, તો આ બધાં સાધનો પર સીધી અસર પડશે. આજે જે પાણીની તંગી, હવામાનમાં અચાનક ફેરફાર અને કુદરતી આપત્તિઓ જોવા મળી રહી છે, તે બધું પ્રકૃતિ સાથે થયેલી અતિશય છેડછાડનું પરિણામ છે.

તેમણે સમાજને અપીલ કરી કે વિકાસના નામે અંધાધૂંધ પ્રકૃતિ વિનાશ બંધ કરવો જોઈએ. વિકાસ અને પ્રકૃતિ વચ્ચે સંતુલન જરૂરી છે. જો વિકાસ માટે વૃક્ષો કાપવામાં આવે અને પર્વતો તોડવામાં આવે, તો તે વિકાસ લાંબા સમય સુધી ટકાવી શકાય તેમ નથી.

જગતગુરુએ સરકાર, ઉદ્યોગપતિઓ અને સામાન્ય નાગરિકોને પ્રકૃતિ સંરક્ષણ માટે એકસાથે આગળ આવવાની અપીલ કરી. તેમણે કહ્યું કે પ્રકૃતિની રક્ષા કરવી એ માત્ર સરકારની જવાબદારી નથી, પરંતુ દરેક માનવીની નૈતિક ફરજ છે. એક વૃક્ષ બચાવવું કે એક પર્વત બચાવવો એ ભવિષ્યની પેઢીને સુરક્ષિત કરવાનું કાર્ય છે.

વધુ વાંચો: 'સરકારે મનરેગા પર બુલડોઝર ચલાવી દીધું, અમે લડીશું', કેન્દ્ર પર સોનિયા ગાંધીનો તીખો હુમલો

અંતમાં સ્વામી શ્રી સદાનંદ સરસ્વતીએ ચેતવણી આપતા કહ્યું કે જો આજથી જ પ્રકૃતિની રક્ષા માટે કડક પગલાં લેવામાં નહીં આવે, તો આવનારો સમય માનવજાત માટે વધુ મુશ્કેલીઓ લઈને આવશે. પ્રકૃતિ સાથે સહઅસ્તિત્વ જ સુખી અને સલામત ભવિષ્યનો એકમાત્ર માર્ગ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ