ITનો સપાટો / સુરતમાં ITનું મેગા ઓપરેશન: ત્રણ જ્વેલર્સ ગ્રુપના 35 સ્થળો પર પડી રેડ, મોટા પાયે તપાસ શરૂ

• સુરતમાં આવકવેરા વિભાગની તપાસ
• કાંતિલાલ એન્ડ બ્રધર્સ જ્વેલર્સના બે શો-રૂમાં સર્ચ 
• પાર્થ એન્ડ બ્રધર્સની ઓફિસમાં પણ ITની તપાસ 

Surat News: રાજકોટ બાદ હવે સુરતમાં પણ આવકવેરા વિભાગે તપાસનો ધમધમાટ શરૂ કર્યો છે. સુરતમાં ઈન્કમટેક્સ વિભાગના 100 જેટલા અધિકારીઓની ટીમો દ્વારા જ્વેલર્સના ત્રણ ગ્રુપના 35થી વધુ સ્થળો પર દરોડા પાડવામાં આવ્યા છે. એક સાથે 35 સ્થળો પર તપાસ હાથ ધરવામાં આવતા શહેરના અન્ય જ્વેલર્સ, બિલ્ડરો અને ઉદ્યોગપતિઓમાં ફફડાટ ફેલાયો છે. 

35થી વધુ સ્થળોએ ITની તપાસ
પ્રાપ્ત વિગતો અનુસાર આવકવેરા વિભાગની ટીમ દ્વારા સુરતના જાણીતા કાંતિલાલ જ્વેલર્સ, પાર્થ ગ્રુપ અને અક્ષર ગ્રુપના 35થી વધુ ઠેકાણાઓ પર દરોડા પાડી તપાસ હાથ ધરવામાં આવી છે. સુરતમાં ત્રણ મોટા ગ્રુપ પર ઈન્કમટેક્સની ટીમ ત્રાટકતા ડાયમંડ નગરીમાં સન્નાટો જોવા મળી રહ્યો છે. અધિકારીઓ દ્વારા શરૂ કરવામાં આવેલા સર્ચ ઓપરેશનમાં તપાસના અંતે મોટા બેનામી વ્યવહારો મળી આવે તેવી શક્યતા છે. 

પાર્થ એન્ડ બ્રધર્સ ITની રડારમાં 
આવકવેરા વિભાગ ટીમે પાર્લે પોઈન્ટ અને અડાજણ વિસ્તારના કાંતિલાલ એન્ડ બ્રધર્સ જ્વેલર્સના બે શો-રૂમમાં તપાસ હાથ ધરી છે. આ સાથે જ ડુમસ વિસ્તારમાં આવેલા બંગલામાં પણ ITની તપાસ ચાલી કરી છે. પાર્થ એન્ડ બ્રધર્સની ઓફિસમાં પણ ITની તપાસ ચાલી રહી છે. સોનાના બિસ્કીટના વેચાણ મુદ્દે પાર્થ એન્ડ બ્રધર્સ ITની રડારમાં છે. આ દરોડાના સંદર્ભે રાજકોટમાં બે જગ્યાએ સર્વેની કામગીરી હાથ ધરવામાં આવી છે. 

100થી વધુ અધિકારીઓ સર્ચ ઓપરેશનમાં જોડાયા
એવું કહેવામાં આવી રહ્યું છે કે, આશરે 100થી વધુ અધિકારીઓ સર્ચ ઓપરેશનમાં જોડાયા છે. આ દરોડાના અંતે મોટી માત્રામાં કાળુનાણું બહાર આવે તેવી સંભાવના વ્યકત કરવામાં આવી રહી છે.