- દાયકાઓમાં ઇઝરાયેલ પર સૌથી ખરાબ હુમલો, 300થી વધુ લોકોના મોત
- ગાઝા પટ્ટી પર ખતરનાક બોમ્બ ધડાકા અંગે ચિંતા, મોટા પાયે જમીની હુમલાનો ભય
- વડાપ્રધાન બેન્જામિન નેતન્યાહુએ તેને નિર્જન ટાપુમાં ફેરવવાનું વચન આપ્યું
Israel Hamas War : ઇઝરાયેલમાં હમાસ દ્વારા હુમલો કરવામાં આવ્યો છે. દાયકાઓમાં ઇઝરાયેલ પર આ સૌથી ખરાબ હુમલો છે, જેમાં 300થી વધુ લોકોના મોત થયા છે. હુમલાના જવાબમાં હવે ગાઝા પટ્ટી પર ખતરનાક બોમ્બ ધડાકા અંગે ચિંતા વ્યક્ત કરવામાં આવી રહી છે. ગાઝા પટ્ટીમાં મોટા પાયે જમીની હુમલાનો ભય વધી રહ્યો છે. ઈઝરાયેલની સેના આકરા હુમલાની તૈયારી કરી રહી છે, જેના કારણે તેમણે ગાઝા પટ્ટીના ઘણા ભાગોમાં પેલેસ્ટિનિયનોને તેમના ઘર છોડવા માટે કહ્યું છે. વડાપ્રધાન બેન્જામિન નેતન્યાહુએ તેને નિર્જન ટાપુમાં ફેરવવાનું વચન આપ્યું છે. તેમણે જાહેરાત કરી છે કે હુમલા માટે જવાબદારોને ભારે કિંમત ચૂકવવી પડશે.
મ્યુઝિક ફેસ્ટિવલમાં ભાગ લેવા પહોંચેલ યુવતીની હત્યા
પેલેસ્ટાઈનથી ઈઝરાયેલમાં લગભગ 5000 રોકેટ છોડવામાં આવ્યા હતા. આ પછી હમાસના લડવૈયાઓ સરહદ પાર કરીને જીપ, કાર અને પેરાગ્લાઈડિંગ દ્વારા દેશમાં પ્રવેશ્યા હતા. તેઓએ મુંબઈમાં 26/11ના હુમલાની જેમ લોકોને નિશાન બનાવવાનું શરૂ કર્યું. આ હુમલામાં અત્યાર સુધીમાં 300 લોકોના મોત થયા છે. ઇઝરાયેલમાં એક છોકરીની હત્યા કર્યા પછી હમાસના આતંકવાદીઓએ તેના શરીરને નગ્ન કરીને કારમાં બાંધી અને તેને આજુબાજુ ફેરવી હતી. જોકે હવે આ યુવતીની ઓળખ થઈ ગઈ છે. જણાવવામાં આવી રહ્યું છે કે 30 વર્ષની મહિલાનું નામ શનિ લુક છે જે જર્મન નાગરિક છે. તે એક મ્યુઝિક ફેસ્ટિવલમાં ભાગ લેવા ગાઝા પટ્ટી નજીક ઈઝરાયેલ પહોંચી હતી.
ઇઝરાયેલનો ભીષણ હુમલો
આ તરફ ઈઝરાયેલી સેનાએ ગાઝા પર વિનાશક હુમલો કર્યો છે. ગાઝા પટ્ટીમાં થયેલા આ હુમલામાં 230થી વધુ પેલેસ્ટિનિયન માર્યા ગયા હતા. ઇઝરાયલી દળો હજુ પણ ગાઝા પર બોમ્બમારો કરી રહ્યા છે. સિવાય રવિવારે સવારે ઇઝરાયેલના દક્ષિણી વિસ્તારોમાં હમાસના આતંકવાદીઓ સાથે લડાઈ ચાલુ રહી હતી. સેનાના પ્રવક્તાએ કહ્યું કે, દેશમાં સ્થિતિ હજુ પણ નિયંત્રણમાં નથી. હમાસના વડા મોહમ્મદ ડેઇફે કહ્યું કે, તેનો હુમલો અલ અક્સા મસ્જિદની અપવિત્રતા તેમજ પેલેસ્ટિનિયનો પર દાયકાઓથી ચાલતા જુલમનો જવાબ હતો. દુશ્મને સમજવું જોઈએ કે તેની ક્રિયાઓના ઘાતક પરિણામો આવશે.
પેલેસ્ટિનિયનો તેમના ઘર છોડી દે: PM નેતન્યાહુ
ઈઝરાયેલના વડાપ્રધાન બેન્જામિન નેતન્યાહુએ યુદ્ધની સ્થિતિ જાહેર કરી છે. તેમણે અનામત સેનાને પણ બોલાવી છે. આ સિવાય તેણે હમાસ સાથે અંત સુધી લડવાનું વચન આપ્યું છે. તેમણે ગાઝાના ઘણા ભાગોમાં રહેતા પેલેસ્ટાઈનીઓને તાત્કાલિક વિસ્તાર છોડી દેવા કહ્યું છે. તેમણે એક સંબોધનમાં કહ્યું, આ કાળા દિવસનો અમે બદલો લઈશું. જે લોકોએ પોતાનો જીવ ગુમાવ્યો છે તેનો અમે બદલો લઈશું. અમે હમાસના તમામ લક્ષ્યોને નિશાન બનાવીશું અને ગાઝાને નિર્જન ટાપુમાં ફેરવીશું. હું ગાઝાના નાગરિકોને કહું છું, તમારે હવે જવું પડશે. અમે ગાઝા પટ્ટીના દરેક ખૂણાને નિશાન બનાવીશું.
આખી રાત બોમ્બ ધડાકા
ગાઝામાં રહેતા 2 મિલિયન લોકોએ તેમની રાત અંધારામાં વિતાવી. ઇઝરાયેલ દ્વારા આ વિસ્તારની લાઇટો કાપી નાખવામાં આવી હતી અને સતત બોમ્બમારો ચાલુ હતો. હમાસે ઈઝરાયેલ પર રોકેટ પણ છોડ્યા હતા, જેમાંથી ઘણાને હવામાં તોડી પાડવામાં આવ્યા હતા. ગાઝામાં મોટી સંખ્યામાં ઘાયલો છે, જેમની હોસ્પિટલોમાં ભીડ જોવા મળી રહી છે. ગાઝાના આરોગ્ય મંત્રાલયના જણાવ્યા અનુસાર 232 લોકો માર્યા ગયા છે અને ઓછામાં ઓછા 1,700 ઘાયલ થયા છે. હમાસે કહ્યું કે, તેણે એટલા બધા ઇઝરાયલીઓને બંધક બનાવ્યા છે કે પેલેસ્ટિનિયન નાગરિકોને ઇઝરાયેલની જેલમાંથી મુક્ત કરી શકાય છે.
