વિશ્વ / 'યુદ્ધનો અંત લાવવાનો સમય આવી ગયો છે': ટ્રમ્પે નેતન્યાહૂને લગાવ્યો ફોન, ઈરાન સાથે ડીલ પર કરી વાત

અમેરિકા અને ઈરાન વચ્ચે લાંબા સમયથી ચાલી રહેલી વાતચીત હવે એક મહત્વપૂર્ણ તબક્કે પહોંચી ગઈ છે. એક્સિઓસના એક રિપોર્ટમાં દાવો કરવામાં આવ્યો છે કે, યુએસ રાષ્ટ્રપતિ ડોનાલ્ડ ટ્રમ્પે વાતચીત દરમિયાન ઇઝરાયલી વડા પ્રધાન બેન્જામિન નેતન્યાહૂને કહ્યું હતું કે, આગામી દિવસોમાં ઈરાન સાથે શાંતિ કરાર પર હસ્તાક્ષર થઈ શકે છે. રિપોર્ટ અનુસાર, ટ્રમ્પે ફોન પર વાતચીત દરમિયાન કહ્યું કે, આ એક મોટી ડીલ છે અને આ સંઘર્ષનો અંત લાવવાનો સમય આવી ગયો છે. અમેરિકા અને ઈરાન બંનેના અધિકારીઓ માને છે કે કરાર ખૂબ નજીક છે, જોકે અંતિમ સહમતિ બાકી છે.

નેતન્યાહૂએ વાતચીત દરમિયાન ટ્રમ્પને કહ્યું કે, તેમને વિશ્વાસ છે કે કોઈપણ અંતિમ કરાર ઈરાનના પરમાણુ કાર્યક્રમ અંગે ઇઝરાયલની સુરક્ષા ચિંતાઓને સંપૂર્ણપણે દૂર કરશે. રિપોર્ટમાં એમ પણ કહેવામાં આવ્યું છે કે, નેતન્યાહૂ હવે સમજી ગયા છે કે, ટ્રમ્પ વહીવટીતંત્રને કરાર સાથે આગળ વધતા અટકાવવાનું મુશ્કેલ બનશે.

નેતન્યાહૂને બદલ્યો પ્લાન

યુદ્ધની શરૂઆતમાં નેતન્યાહૂ માનતા હતા કે આ સંઘર્ષ ઈરાનમાં શાસન પરિવર્તનનો માર્ગ મોકળો કરી શકે છે, પરંતુ હવે ચૂંટણીની સંભાવના અને આંતરરાષ્ટ્રીય દબાણ વચ્ચે તેમની વ્યૂહરચના બદલાતી દેખાય છે. તેમના વિરોધીઓ ઇઝરાયલ પર ટ્રમ્પની શાંતિ પહેલ સ્વીકારીને પોતાનું વલણ નરમ પાડવાનો આરોપ લગાવે છે.રિપોર્ટમાં એવો પણ દાવો કરવામાં આવ્યો છે કે નેતન્યાહૂએ આ અઠવાડિયે ઈરાનના ઉર્જા અને માળખાગત સુવિધાઓના લક્ષ્યો પર મોટા હુમલાઓની યોજના બનાવી હતી, પરંતુ ટ્રમ્પે છેલ્લી ઘડીએ આ પગલાને અટકાવી દીધા. જોકે, આ દાવાની સ્વતંત્ર રીતે ચકાસણી કરવામાં આવી નથી.

ઇઝરાયલના રક્ષા મંત્રીનું નિવેદન

ઇઝરાયલની પ્રાથમિક ચિંતા એ છે કે કરાર બાદ ઇરાન આર્થિક રાહત મેળવી શકે છે અને તેલ નિકાસ દ્વારા તેની અર્થવ્યવસ્થાને મજબૂત બનાવી શકે છે. ઇઝરાયલી અધિકારીઓને ડર છે કે તેહરાન તેના પરમાણુ કાર્યક્રમ અંગે જરૂરી છૂટછાટો આપવામાં વિલંબ કરી શકે છે. ઇઝરાયલી સંરક્ષણ પ્રધાન ઇઝરાયલ કાત્ઝે જણાવ્યું છે કે યુએસ તેના રાષ્ટ્રીય હિતોને ધ્યાનમાં રાખીને વાતચીત કરી રહ્યું છે, પરંતુ ઇઝરાયલ આગ્રહ રાખે છે કે ઇરાનના પરમાણુ કાર્યક્રમ, બેલિસ્ટિક મિસાઇલો અને પ્રાદેશિક પ્રોક્સી જૂથોને લગતા મુદ્દાઓ પર કોઈ સમાધાન ન થવું જોઈએ.તેમણે એ પણ ફરી કહ્યું કે જો જરૂર પડે તો ઇઝરાયલ પોતાની જાતે પગલાં લેવા સક્ષમ છે. એક વરિષ્ઠ અમેરિકન વહીવટી અધિકારીના જણાવ્યા અનુસાર, અમેરિકા આગામી દિવસોમાં ઇરાન સાથે પ્રારંભિક કરાર પર હસ્તાક્ષર કરવાની આશા રાખે છે. અધિકારી જણાવે છે કે સફળ કરારની શક્યતા હવે 80 થી 85 ટકા સુધી પહોંચી ગઈ છે.

આ પણ વાંચોઃ શું ખરેખર ઓમાનની ખાડીમાં જહાજ પર કરાયો હુમલો? જાણો 4 ભારતીયો માર્યા ગયાનું અસલી સત્ય

સ્ટ્રેટ ઓફ હોર્મુઝમાં તણાવ ઓછો કરવા પર ભાર

પ્રસ્તાવિત કરાર હેઠળ, 60 દિવસનો યુદ્ધવિરામ લાગુ કરી શકાય છે. આ પછી સંભવિત પ્રતિબંધોમાં રાહત આપવામાં આવશે અને ઈરાનના પરમાણુ કાર્યક્રમ અંગે વધુ વાતચીત શરૂ કરવામાં આવશે. રિપોર્ટ અનુસાર, આ કરાર હોર્મુઝ સ્ટ્રેટમાં તણાવ ઓછો કરી શકે છે અને દરિયાઈ વેપારને સામાન્ય બનાવવાની આશા છે. અમેરિકાનું માનવું છે કે, કોઈપણ આર્થિક રાહત આપતા પહેલા ઈરાને તેની પ્રતિબદ્ધતાઓ પૂર્ણ કરવી પડશે. આમાં અત્યંત સમૃદ્ધ યુરેનિયમના ભંડાર સોંપવા અને તેની પરમાણુ સુવિધાઓ સંબંધિત પગલાં લેવાનો સમાવેશ થઈ શકે છે. અમેરિકન અધિકારીઓ માને છે કે આ કરાર ઇઝરાયલ, લેબનોન, ઈરાન અને ગલ્ફ રાજ્યોને સંડોવતા વ્યાપક પ્રાદેશિક શાંતિ માળખાનો પાયો બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ