- આજે ચેન્નાઈ સુપર કિંગ્સ અને લખનૌ સુપર જાયન્ટ્સ વચ્ચે ચેપોકમાં મેચ
- IPLના પસંદગીના બેટ્સમેનોની ખાસ ક્લબમાં સામેલ થશે ધોની
- અત્યાર સુધી ધોનીએ 207 ઇનિંગ્સ રમીને 4992 રન બનાવ્યા છે
ઈન્ડિયન પ્રીમિયર લીગ 2023 ની છઠ્ઠી મેચ આજે એટલે કે 3 એપ્રિલના રોજ રમાશે. જણાવી દઈએ કે આ મેચ ચેન્નાઈ સુપર કિંગ્સ અને લખનૌ સુપર જાયન્ટ્સ વચ્ચે ચેપોકમાં રમાશે. લખનૌ સુપર જાયન્ટ્સ સામેની આ મેચ ચેન્નાઈ સુપર કિંગ્સ માટે તો મહત્વની છે જ પણ એમએસ ધોની માટે પણ ખાસ છે. વાત એમ છે કે આ મેચમાં તે વ્યક્તિગત સિદ્ધિ હાંસલ કરી શકે છે. જો ધોની લખનૌ સામેની મેચમાં ફક્ત 8 રન બનાવી દેશે તો તે IPLના પસંદગીના બેટ્સમેનોની ખાસ ક્લબમાં સામેલ થઈ જશે. આ માટે ધોનીને બસ 8 રનની જરૂર છે.
નોંધનીય છે કે ગુજરાત સામેની ઓપનર મેચમાં ધોની સારા ટચમાં જોવા મળ્યો હતો. એ મેચમાં આઠમા નંબરે બેટિંગ કરવા આવેલા ધોનીએ 7 બોલમાં 14 રન બનાવ્યા હતા અને એ સમયે તેને એક ફોર અને એક સિક્સ પણ ફટકારી હતી.
ધોની ફક્ત 8 રન દૂર
મહત્વનું છે કે એમએસ ધોનીએ IPLની 235 મેચોમાં 207 ઇનિંગ્સ રમી છે જેમાં તેને 4992 રન બનાવ્યા છે. એટલે કે હવે ઇન્ડિયન પ્રીમિયર લીગમાં 5000 રન પૂરા કરવા માટે ધોનીને માત્ર 8 રન બનાવવાની જરૂર છે. જો ધોની લખનૌ સામેની મેચમાં 8 રન બનાવશે તો તે IPLના ઈતિહાસમાં 5000 રન બનાવનાર સાતમો બેટ્સમેન બની જશે સાથે જ CSK તરફથી IPLમાં 5 હજારથી વધુ રન બનાવનાર બીજો ખેલાડી પણ બનશે.
નોંધનીય છે કે આઈપીએલમાં એમએસ ધોની પહેલા વિરાટ કોહલીએ 6706, શિખર ધવન 6284, ડેવિડ વોર્નરે 5937, રોહિત શર્મા 5880, સુરેશ રૈના 5228 અને એબી ડી વિલિયર્સ 5162 રન બનાવી ચૂક્યા છે.
બીજા સૌથી સફળ કેપ્ટન બન્યો ધોની
આ સાથે જ તમને જણાવી દઈએ કે મહેન્દ્ર સિંહ ધોની IPLના બીજા સૌથી સફળ કેપ્ટન છે. ધોનીએ પોતાની કેપ્ટનશીપમાં CSKને ચાર વખત ચેમ્પિયન બનાવ્યું છે. જો 2016 અને 2017ની સીઝનને છોડી દેવામાં આવે તો તે 2008થી ધોની સતત CSK માટે રમી રહ્યો છે. ગત સિઝનમાં CSKએ રવિન્દ્ર જાડેજાને કેપ્ટન બનાવ્યો હતો. પરંતુ અડધી સિઝન પછ તેને રાજીનામું આપી દીધું હતું. ભલે IPL 2022માં ચેન્નાઈ સુપર કિંગ્સનું પ્રદર્શન શરમજનક હતું પણ આ વખતે ધોની ફરી ટ્રોફી જીતવા માંગશે.
