ક્રિકેટ / ‘સેલ્યુટ સેલિબ્રેશન’ કરનારા કોટ્રેલનું IPL હરાજીમાં કરોડપતિ બનવું નક્કી!

• બેસ પ્રાઇસ રૂ. 50 લાખ છે, પરંતુ તાજેતરનું ફોર્મ જોતાં કોટ્રેલનું આઇપીએલમાં કરોડપતિ બનવું નક્કી
• કોટ્રેલે અત્યાર સુધીમાં વિરાટને વન ડે અને ટી-20માં ત્રણ વાર આઉટ કર્યો છે.
• શેલ્ડન કોટ્રેલ પોતાની સેલ્યુટ સ્ટાઇલ સેલિબ્રેશનને કારણે દુનિયાભરમાં જાણીતો 

દુનિયામાં જેની ટોચના બેટ્સમેનોમાં ગણતરી થાય છે તેવા વિરાટ કોહલીને હંમેશાં કોટ્રેલ પરેશાન કરતો રહે છે. કોટ્રેલની બોલિંગમાં ઝડપ છે અને પોતાના મજબૂત ખભાને કારણે તે પીચમાંથી બાઉન્સ પણ મેળવે છે. એમાંય કોટ્રેલની સ્વિંગ તેને વધુ ખતરનાક બોલર બનાવે છે અને એ જ કારણ છે કે વિરાટ જેવો બેટ્સમેન પણ થાપ ખાઈ ગયો. કોટ્રેલે અત્યાર સુધીમાં વિરાટને વન ડે અને ટી-20માં ત્રણ વાર આઉટ કર્યો છે. આઇપીએલની હરાજીમાં કોટ્રેલ પહેલી વાર સામેલ થઈ રહ્યો છે. તેની બેસ પ્રાઇસ રૂ. 50 લાખ છે, પરંતુ તાજેતરનું ફોર્મ જોતાં કોટ્રેલનું આઇપીએલમાં કરોડપતિ બનવું નક્કી છે. 19 ડિસેમ્બરે કોલકાતામાં યોજાનારી હરાજીમાં મોટી મોટી ટીમ તેના પર બોલી લગાવી શકે છે.

સ્લો બાઉન્સર અને ઓફ કટર બોલ બેટ્સમેનોને મુશ્કેલીમાં મૂકી રહ્યા છે

શેલ્ડન કોટ્રેલ પોતાની સેલ્યુટ સ્ટાઇલ સેલિબ્રેશનને કારણે દુનિયાભરમાં જાણીતો છે. વિન્ડીઝનો આ બોલર પહેલી વાર આઇપીએલમાં સામેલ થઈ રહ્યો છે. ભારત સામેની ત્રણ મેચની ટી-20 શ્રેણીમાં તેણે વિકેટ તો માત્ર ત્રણ જ ઝડપી છે, પરંતુ પહેલી અને બીજી મેચમાં તેની સરેરાશ સાત રન પ્રતિ ઓવરની રહી, જે ટી-૨૦ ફોર્મેટમાં સારી કહી શકાય. તે સફેદ બોલથી સારી સ્વિંગ બોલિંગ કરી શકે છે. તેના સ્લો બાઉન્સર અને ઓફ કટર બોલ બેટ્સમેનોને મુશ્કેલીમાં મૂકી રહ્યા છે. આ જ કારણે મોટી મોટી ફ્રેંચાઇઝી કોટ્રેલને પોતાની ટીમમાં સામેલ કરવા નાણાં કોથળી ખુલ્લી મૂકી દેશે એમાં કોઈ શંકા નથી.

 ભારત સામે ત્રણ મેચની ટી-20 શ્રેણીમાં ફક્ત ત્રણ જ વિકેટ ઝડપી 

કેસરિક વિલિયમ્સઃ આઇપીએલ હરાજીમાં વિન્ડીઝના આ બોલર પર બધાની નજર રહેશે. તેણે ભારત સામે ત્રણ મેચની ટી-20 શ્રેણીમાં ફક્ત ત્રણ જ વિકેટ ઝડપી છે, જેમાંની એક ભારતીય કેપ્ટન વિરાટ કોહલીની છે. તેણે પોતાની ઝડપ અને સચોટ લાઇન લેન્થથી બધાને પ્રભાવિત કર્યા છે. ટી-20માં તેનો સ્ટ્રાઇક રેટ પણ સારો છે. ટેસ્ટ મેચ રમતા દેશોના ઓછામાં ઓછા 20 વિકેટ ઝડપનારા બોલર્સમાં વિલિયમ્સ પાસે ચોથો સર્વશ્રેષ્ઠ સ્ટ્રાઇક (૧૨.૭) છે. આઇપીએલમાં પોતાના 'નોટબુક સેલિબ્રેશન'થી જાણીતા કેસરિક વિલિયમ્સ પર પણ નાણાંનો વરસાદ વરસી શકે છે. ૫૦ લાખની બ્રેસ પ્રાઇસવાળો વિલિયમ્સ આઇપીએલમાં કરોડપતિ બની શકે છે.