India-China Standoff / લદ્દાખ મુદ્દે ભારત અને ચીન વચ્ચે ફરી થશે ચર્ચા: 15 ઓગસ્ટ પહેલા થશે કમાન્ડર લેવલ અધિકારીઓની મીટિંગ

• ભારત અને ચીન વચ્ચે મે 2020થી ચાલી રહી છે મડાગાંઠ
• 14મી ઓગસ્ટે 19મા રાઉન્ડની કમાન્ડર સ્તરની વાતચીત થશે
• આ મુદ્દાઓ પર બંને દેશના પ્રતિનિધિઓ કરશે ચર્ચા

ભારત-ચીન સ્ટેન્ડઓફ: ભારત અને ચીનની વચ્ચે 14 ઓગસ્ટ (સોમવાર)ના રોજ 19મા રાઉન્ડની કમાન્ડર સ્તરની વાતચીત થશે. આ દરમિયાન બંને દેશોના સૈન્ય અધિકારીઓ લદ્દાખને અડીને આવેલી પૂર્વ સરહદ પર ચાલી રહેલી મડાગાંઠને ખતમ કરવાની દિશામાં ચર્ચા કરશે. મહત્વનું છે કે, આ પહેલા બંને દેશો વચ્ચે કમાન્ડર સ્તરની વાતચીતના 18 રાઉન્ડ યોજાઈ ચૂક્યા છે

સીમા વિવાદને લઈને ભારત અને ચીનની બેઠક
સૂત્રોના જણાવ્યા અનુસાર, પૂર્વી લદ્દાખમાં 3 વર્ષ કરતા વધારે સમયથી ચાલી રહેલા મડાગાંઠને લઈને ભારત અને ચીન વચ્ચે અત્યાર સુધીમાં વાટાઘાટોના ઘણા રાઉન્ડ થયા છે, પરંતુ હજુ સુધી કેટલાક મુદ્દાઓ પર કોઈ અર્થપૂર્ણ ઉકેલ મળ્યો નથી. ત્યારે આવતીકાલે એટલે કે 14મી ઓગસ્ટે 19મો રાઉન્ડ યોજાવા જઈ રહ્યો છે. ભારત અને ચીન વચ્ચેની આ બેઠક પૂર્વી લદ્દાખના ચુશુલ-મોલ્ડોમાં યોજાય તેવી સંભાવના છે.

ભારત તરફથી કોણ કરશે નેતૃત્વ?
બંને દેશોની વચ્ચે વાતચીત એવા સમયે થઈ રહી છે, જ્યારે વાસ્તવિક નિયંત્રણ રેખા (LAC) પર ચીનની સૈન્ય ગતિવિધિઓ વધી ગઈ છે. સૂત્રોએ જણાવ્યું છે કે, 14 ઓગસ્ટે ચીની સેનાના પ્રતિનિઓધિઓ સાથે વાતચીત કરવા માટે ભારતીય પક્ષનું નેતૃત્વ ફાયર એન્ડ ફ્યુરી કોર્પ્સ કમાન્ડર લેફ્ટનન્ટ જનરલ રશિમ બાલી કરશે. વિદેશ મંત્રાલય અને ITBPના અધિકારીઓ પણ આ બેઠકમાં ભાગ લે તેવી અપેક્ષા છે. બંને પક્ષો DBO અને CNN જંકશનને લગતા મુદ્દાઓની સાથે જ અન્ય બાબતો પર પણ ચર્ચા કરે તેવી અપેક્ષા છે. ભારત પૂર્વી લદ્દાખના મોરચેથી સૈનિકો પાછા ખેંચવા માટે પણ દબાણ કરશે.

4 મહિના બાદ યોજાઈ રહી છે બેઠક
ચાર મહિના પછી બંને દેશો વચ્ચે કોર્પ્સ કમાન્ડર સ્તરની વાતચીત થઈ રહી છે. આ પહેલા આ વર્ષે એપ્રિલમાં બંને પક્ષો વચ્ચે કોર્પ્સ કમાન્ડર સ્તરની બેઠક યોજાઈ હતી. મે 2020માં ચીને વાસ્તવિક નિયંત્રણ રેખા પર યથાસ્થિતિને બદલવાનો આક્રમક પ્રયાસ કર્યો ત્યારથી બંને દેશો વચ્ચે તણાવ વધી રહ્યો છે.