પૂર્વ તૈયારી / ઈઝરાયલ-હમાસ જંગ વચ્ચે ભારતે પણ સુરક્ષા વધારી, હવે બોર્ડર પર ચાંપતી નજર રાખવા અપનાવાશે આ જોરદાર ટેક્નિક

• ઇઝરાયલ અને હમાસ વચ્ચે યુદ્ધ શરૂ થયાને 20 દિવસથી વધુ થયા 
• ઈઝરાયલ-હમાસ જંગ વચ્ચે ભારતે પણ સુરક્ષા વધારી
• ભારત બોર્ડર પર ચાંપતી નજર રાખવા અપનાવાશે આ જોરદાર ટેક્નિક

ઇઝરાયલ અને હમાસ વચ્ચે યુદ્ધ શરૂ થયાને 20 દિવસથી વધુ સમય થઈ ગયો છે અને અ ચાલી રહેલા યુદ્ધનો કોઈ અંત જણાતો નથી. ઈઝરાયલ સતત કહી રહ્યું છે કે તે ગાઝામાં પ્રવેશ કરશે અને તેના લોકોને લાવશે. જ્યારે તેની એરફોર્સ ગાઝા પર બોમ્બમારો કરી રહી છે, ત્યારે સેના ગાઝા બોર્ડર પર ટેન્ક સાથે તૈયાર છે. 

ઈઝરાયલ-હમાસ જંગ વચ્ચે ભારતે પણ સુરક્ષા વધારી
આ બધા વચ્ચે એક વાત નોંધનીય છે કે ઇઝરાયલ પર હુમલામાં હમાસે સરહદ પાર કરવા માટે પેરા ગ્લાઈડરનો ઉપયોગ કર્યો હતો અને આ હુમલાથી સરહદ પર ભારતની ચિંતા પણ વધી ગઈ છે. હવે વાત એમ છે કે કેન્દ્રીય સંરક્ષણ એજન્સીઓ ભવિષ્યમાં આવી કોઈપણ પરિસ્થિતિને પહોંચી વળવા માટે ઘણા તકનીકી પાસાઓ પર કામ કરી રહી છે, જેમાં શું ડ્રોન તેમને આવા હુમલાઓથી બચાવી શકશે કે નહીં? એ વિશે જાણવામાં આવી રહ્યું છે. 

બોર્ડર પર ચાંપતી નજર રાખવા અપનાવાશે આ જોરદાર ટેક્નિક
ઇઝરાયેલ અને હમાસ જેવી પરિસ્થિતિ ભારતમાં ઉભી ન થાય એ માટે ભારતીય સુરક્ષા અધિકારીઓ ડ્રોન ટેક્નોલોજીની મદદથી સરહદના સંવેદનશીલ વિસ્તારો પર નજર રાખવા માંગે છે. એ વાત તો નોંધનીય જ છે કે ભારત તેની સરહદ ઘણા દેશો સાથે વહેંચે છે, સરહદના વિવિધ ક્ષેત્રોમાં અલગ-અલગ ભૌગોલિક પરિસ્થિતિઓ છે જેને ધ્યાનમાં લેવી પડશે. આવી સ્થિતિમાં ડ્રોન ટેક્નોલોજીની મદદથી દુર્ગમ વિસ્તારો પર તકેદારી રાખવાની વાત ચાલી રહી છે. 

આ સ્થળો પર ડ્રોન સર્વેલન્સ તૈનાત કરવા માંગે છે ભારત 
ખાસ કરીને હિમાલયના વિસ્તારોમાં ચીન અને પાકિસ્તાનની સરહદ પર આ ડ્રોન ટેક્નોલોજીની મદદથી સંવેદનશીલ વિસ્તારો પર નજર રાખવા માંગે છે. છેલ્લા ઘણા સમયથી ચીન સાથે તો ઘણા વર્ષોથી પાકિસ્તાન સાથે સહરદ પર તણાવ જોવા મળતો રહ્યો છે. એવામાં સેના પહેલા આ સ્થળો પર ડ્રોન સર્વેલન્સ તૈનાત કરવા માંગે છે. 

મહત્વનું છે કે કેન્દ્રીય સુરક્ષા એજન્સીઓના સંરક્ષણ અધિકારીઓ ગયા અઠવાડિયે ડ્રોનના ઘણા સ્થાનિક વિક્રેતાઓને મળ્યા હતા અને આગામી દિવસોમાં ટૂંક સમયમાં ટેન્ડર બહાર પાડવામાં આવે તેવી અપેક્ષા છે.