ODI World Cup 2023 / ભારત માટે બદલાપુર બન્યું વર્લ્ડ કપ: 2019નો બદલો પૂરો, હવે 2003નો હિસાબ બરાબર કરવાનો મોકો

• ભારત માટે બદલાપુર બન્યું વર્લ્ડકપ
• વર્લ્ડ કપ 2003માં ઓસ્ટ્રેલિયા સામે ભારતની થઈ હતી હાર
• ફાઇનલમાં ઓસ્ટ્રેલિયાનો મુકાબલો ભારત સાથે થશે

ભારતે ODI વર્લ્ડ કપ 2023ની સેમિફાઈનલમાં ન્યુઝીલેન્ડને 70 રનથી હરાવીને તેનો 2019નો હિસાબ ચૂકતે કરી દીધો છે. ઓસ્ટ્રેલિયાએ સાઉથ આફ્રિકાને 7 વિકેટે હરાવીને 8મી વખત ફાઇનલમાં જગ્યા બનાવી છે. ફાઇનલમાં ઓસ્ટ્રેલિયાનો મુકાબલો ભારત સાથે થશે. 2003ના વર્લ્ડ કપની ફાઇનલ મેચમાં ભારતે ઓસ્ટ્રેલિયા સામે હારનો સામનો કરવો પડ્યો હતો. ટીમો ફરી એકવાર આમને-સામને હશે. ભારત 2003ના વર્લ્ડ કપની હારનો બદલો લઈ શકશે કે નહીં તે રવિવારે જોવાનું રહેશે. 

ઓસ્ટ્રેલિયા છેલ્લી 18 મેચમાંથી 15માં સાઉથ આફ્રિકા સામે હારી ગયું હતું, પરંતુ સેમિફાઈનલ મેચમાં કાંગારૂ ટીમે સાઉથ આફ્રિકાને હરાવ્યું હતું. અમદાવાદના નરેન્દ્ર મોદી સ્ટેડિયમમાં 19 નવેમ્બરના રોજ રવિવારે ભારત અને ઓસ્ટ્રેલિયા વચ્ચે ટક્કર થશે.

ભારતે ન્યુઝીલેન્ડને હરાવીને 2019નો બદલો લીધો
ODI વર્લ્ડ કપ 2019ની સેમિફાઇનલમાં ભારત અને ન્યુઝીલેન્ડ આમને-સામને હતા. મહેન્દ્રસિંહ ધોની રનઆઉટ થયા પછી ભારતે હારનો સામનો કરવો પડ્યો હતો. 2019 વર્લ્ડ કપ સેમિફાઇનલ રિઝર્વ ડે ના રોજ રમાઈ હતી. ન્યૂઝીલેન્ડે 8 વિકેટ ગુમાવીને 239 રન કર્યા હતા. ભારતનો સ્કોર 6 વિકેટે માત્ર 92 રન જ હતો અને ધોની આઉટ થયા પછી ભારતીય ટીમ હારી ગઈ હતી. 15 નવેમ્બર 2023 ના રોજ ભારતીય ટીમે 2019ની હારનો બદલો લીધો હતો.

2003નો હિસાબ ચૂકતે કરવાનો છે
23 માર્ચ, 2003ના રોજ, ભારતે ઓસ્ટ્રેલિયા સામે હારનો સામનો કરવો પડ્યો હતો. ઓસ્ટ્રેલિયાએ ભારતને 125 રનથી હરાવીને ત્રીજી વખત વર્લ્ડ કપ જીત્યો હતો. આ મેચમાં રિકી પોન્ટિંગે 140 રનની ઇનિંગ રમી હતી. 20 વર્ષ પછી ભારત અને ઓસ્ટ્રેલિયા ફરી એકવાર ODI વર્લ્ડ કપની ફાઇનલમાં સામસામે ટકરાશે અને ભારત જીતની આશા સાથે મેદાન પર ઉતરશે. 

ભારતીય ટીમ ફોર્મમાં
ભારતીય ક્રિકેટ ટીમ ODI વર્લ્ડ કપ 2023માં ફોર્મમાં છે. ભારતે અત્યાર સુધી ટૂર્નામેન્ટમાં તમામ મેચ જીતી છે. વિરાટ કોહલી 711 રન સાથે ટુર્નામેન્ટમાં સૌથી વધુ રન બનાવનાર ખેલાડીઓના લિસ્ટમાં ટોપ પર છે. વિરાટે 3 સદી ફટકારી છે. સૌથી વધુ વિકેટ લેનારા ખેલાડીઓના લિસ્ટમાં મોહમ્મદ શમી 23 વિકેટ સાથે ટોપ પર છે. ઓસ્ટ્રેલિયાએ 9માંથી 7 મેચ જીતી છે.