મહામંથન / મોંઘી ખેતી કરી રહેલા ખેડૂતોને સરકારી ટેકાના ભાવ કેટલા કામમાં લાગશે? જગતના તાતની અપેક્ષા તો જાણો

• કપાસ-મગફળીના ટેકાના ભાવમાં વધારો
• અડદનો મણનો ટેકાનો ભાવ 1390 રૂપિયા થયો
• મકાઈની MSPમાં પ્રતિ મણ 25 રૂપિયાનો વધારો

મોટેભાગે ખેડૂતો માટે એક સાંધો ત્યાં તેર તૂટે એવા માહોલની વચ્ચે રાહતભર્યા સમાચાર સરકાર તરફથી આવ્યા. સરકારે વિવિધ પાકના ટેકાના ભાવમાં રાહતજનક વધારો કર્યો છે. ગુજરાતમાં મુખ્યત્વે મગફળી અને કપાસ પકવતા ખેડૂતોને પણ સારો ફાયદો થયો. કપાસની મધ્યમ અને લાંબા તારની કેટેગરીમાં અનુક્રમે 108 અને 128 રૂપિયા પ્રતિ મણનો વધારો થયો જયારે મગફળીમાં પણ ગત વર્ષની સાપેક્ષે 105 રૂપિયા પ્રતિ મણનો ટેકાનો ભાવ વધ્યો છે. ટેકાના ભાવ ખેડૂત માટે રાહત લઈને આવે છે તેમાં ઈન્કાર ન થઈ શકે પણ ઘણી વાર એવું પણ ચિત્ર ઉપસે છે કે સરકારના ટેકાના ભાવ કરતા ઓપન માર્કેટના ભાવ ઊંચા હોય. 

MSP વધારાને મંજૂરી આપી
તુવેર, અડદના પાકની MSPમાં સરકારે વધારો કર્યો છે. કેન્દ્રીય કેબિનેટે MSP વધારાને મંજૂરી આપી છે જેમાં તુવેરની MSPમાં પ્રતિ મણ 80 રૂપિયાનો વધારો કર્યો જ્યારે તુવેરનો મણનો ટેકાનો ભાવ 1400 રૂપિયા થયો છે જ્યારે અડદની MSPમાં પ્રતિ મણ 70 રૂપિયાનો વધારો કરાયો છે. અડદનો મણનો ટેકાનો ભાવ 1390 રૂપિયા થયો જ્યારે મકાઈની MSPમાં પ્રતિ મણ 25 રૂપિયાનો વધારો થયો છે. ધાન્ય પાકોની MSPમાં પ્રતિ મણ 28 રૂપિયાનો વધારો કરાયો છે.

ખેડૂતોને સરકારનો ટેકો પુરતો છે?
કપાસ-મગફળી સહિત 23 પાકોના ટેકાના ભાવ જાહેર થયા છે અનેક સાવાલો થઈ રહ્યાં છે તે, પ્રતિ મણે ભાવના વધારાથી ખેડૂતોને કેટલો ટેકો મળશે? તેમજ કપાસ-મગફળીમાં 100થી 108નો પ્રતિ મણે વધારો! તેમજ વધતી મોંઘવારી, મોંઘા ખાતર સામે ટેકો મજબૂત કેટલો? અને ટેકાના ભાવને લઇને ખેડૂતોની અપેક્ષા શું છે?