સાચવજો! / ઉનાળો આવી ગયો: હવે જીવલેણ લૂથી સાચવજો નહીં તો બનશો અનેક બીમારીઓના ભોગ, બચવા માટે અપનાવો આ ઘરેલુ ઉપચાર

• બીમારીઓ અને વાઇરસ જેટલી જ જીવલેણ હોય છે લૂ
• ઘણા લોકો લૂના કારણે મૃત્યુ પામે છેઃ સર્વે
• આ ઉપાયો અપનાવવાથી મળી શકે છે રાહત

ઉનાળાના સતત તડકામાં રહેવાથી લૂ એટલે કે હીટ સ્ટ્રોકની સમસ્યાનો લોકોને સામનો કરવો પડે છે. હજુ તો શિયાળાની વિદાય પણ અનિશ્ચિત છે, સવારે અને રાતે ઠંડક અને બપોરે ઉનાળાની ગરમ હવા સાથેની બેવડી ઋતુમાં અત્યારની બપોરે પડી રહેલી આકરી ગરમીથી લોકોએ સાચવવું પડશે, નહીં તો અચાનક વધી રહેલું તાપમાન સ્વાસ્થ્ય માટે જીવલેણ પણ સાબિત થઇ શકે છે, કારણ કે અન્ય ગંભીર બીમારીઓ અને વાઇરસ જેટલી જ જીવલેણ લૂ હોય છે, જે શરીરનું તાપમાન એકદમ વધારી દે છે. એક સર્વે અનુસાર ઘણા લોકો લૂના કારણે મૃત્યુ પામે છે.

ડિહાઇડ્રેશનની પણ સર્જાય છે સમસ્યા 
સામાન્ય રીતે દરેક વયના લોકોના શરીરનું તાપમાન 37 ડિગ્રી સેલ્સિયસ સુધી હોય ત્યારે શરીરના અવયવો યોગ્ય રીતે કામ કરે છે. ખાસ કરીને ઉનાળામાં લોકોને વધારે તાપમાનના કારણે અનેક સમસ્યાઓનો સામનો કરવો પડે છે, જ્યારે કોઈ વ્યક્તિને લૂ-હીટ સ્ટ્રોક લાગે છે ત્યારે તેનામાં માથાનો દુખાવો, થાક, ઊલટી, તાવ વગેરે લક્ષણો જોવા મળે છે. ઉપરાંત ડિહાઇડ્રેશનની સમસ્યા પણ સર્જાય છે.

બપોરે સતત વધી રહ્યો છે ગરમીનો પારો
હાલના સંજોગોમાં અચાનક જ વાતાવરણ ગરમાયું છે. બપોરે ગરમીનો પારો સતત વધી રહ્યો છે ત્યારે લૂથી બચવા માટેના અનેક ઉપાય છે, જે અપનાવવાથી રાહત મળી શકે છે, જેમ કે ડાયટમાં છાશ બે ગ્લાસ, સત્તુ જીરા ડ્રિંક, કાકડી, જેને લંચ-ડિનરમાં લેવાનો આગ્રહ રાખવો, માખણ, જવ રોટી, ડુંગળી-સલાડ તરીકે, સાદા પાણીના બદલે તેમાં લીંબુ, ફુદીના, ચિયા શીડ્સ એડ કરીને પીઓ. છાશ, સત્તુ જીરા ડ્રિંક, કાકડી, માખણ, જવ રોટી જેવાં ફૂડ્સ અને ડ્રિંકમાં કૂલિંગ એજન્ટ રહેલાં છે, જે ઉનાળામાં શરીરને અંદરથી જ ઠંડું રાખવામાં મદદરૂપ થાય છે અને હિટ સ્ટ્રોક સામે રક્ષણ આપે છે. આ ઉપરાંત વ્યક્તિએ દિવસમાં 3થી 4 ‌લિટર પાણી પીવું જોઇએ, ભોજનમાં સલાડ, છાશ, દહીંનો ઉપયોગ કરવો જોઇએ. ઠંડા પાણીથી સ્નાન કરવાનો આગ્રહ રાખવો જોઈએ અને શરીરનું તાપમાન વધે નહીં તેનો ખ્યાલ રાખવો જોઈએ

લૂ લાગતાં ઘરેલુ ઉપચાર કરો
વરિયાળીનો રસ
જો કોઇ વ્યક્તિને લૂ લાગી હોય તો વરિયાળીના રસનો ઉપયોગ કરી શકાય છે. વરિયાળીની તાસીર ઠંડી હોય છે. તેથી તેના રસમાં બે બૂંદ ફુદીનાનો રસ અને બે ચમચી ગ્લુકોઝ પાઉડર મિક્સ કરો અને તેનું સેવન કરો. 

નારિયેળ પાણી
નારિયેળ પાણી હિટ સ્ટ્રોક સામે રક્ષણ આપી શકે છે. કાચા નારિયેળના ગરને પહેલાં પીસી લો. ત્યાર બાદ તેમાં કાળું જીરું મિક્સ કરીને તેનું સેવન કરો. આવું કરવાથી લૂમાં તાત્કાલિક રાહત મળશે. ડુંગળીના રસના ઉપયોગથી પણ હિટ સ્ટ્રોકની સમસ્યા દૂર કરી શકાય છે. ડુંગળીના રસને ચેસ્ટ એરિયા પર ઘસવાથી પણ લૂની સમસ્યા દૂર થઇ શકે છે.

ફુદીનાનું પાણી
ફુદીનાના ઉપયોગથી પણ લૂની સમસ્યા દૂર કરી શકાય છે. ફુદીનાના પાનને પીસી તેમાં બે મરી ઉમેરો અને ફરી પીસી લો. હવે પાણીમાં મિક્સ કરીને તેનું સેવન કરવાથી હિટ સ્ટ્રોકની સમસ્યા દૂર થશે. જ્યારે કોઇ વ્યક્તિને લૂ લાગે છે ત્યારે તેના શરીરનું તાપમાન વધી જાય છે એવામાં વધારે ઠંડું પાણી પીવાથી સમસ્યા વધી શકે છે. વ્યક્તિએ આવી સ્થિતિમાં સામાન્ય ઠંડું અથવા માટલીનું પાણી પીવું જોઇએ.